١٧\٣\٢٠١٥

١٦ی ئازاری ١٩٨٨ دوا تابلۆی جەنگی عێراق - ئێران.

هەژێن

 
١٦ی ئازاری ١٩٨٨ دوا تابلۆی جەنگی هەشت ساڵەی عیرق-ئێران بوو، کە بەخوێنی هەزاران کەسی سڤیل و فلچەی شۆڤێنیزمی عەرەب و ناسیونالیزمی کورد و فاشیزمی ئیسلام و دەوڵەتانی ناوچەکە و زلهێزەکان و کۆمپانییە چەکفرۆشەکانیان نیگاری کێشرا.

هەشت ساڵ درێژەی جەنگی عێراق - ئێران ناوچەکانی هۆرامان و هەڵەبجە و شارەزووری وەک ناوچە سنوورییەکانی دیکەی عیراق و ئێران، بەردەوام لەبەردەم بۆمبارانی ڕژێمی کۆماری ئیسلامی ئێراندا بوون، بەڵام ئەوە شاکاری بزاڤی چەکداریی ناسیونالیزمی کورد بوو، کە ئەو ناوچانە و هەڵەبجەی کرد بە بەشێک لە بەرەی جەنگی عیراق-ئێران و ماڵوێرانی بەسەر خەڵکدا هێنا و خەڵکی هەڵەبجەی ئاوارەی ئوردووگەکانی ئێران و عیراق کرد.

تاوانی ١٦ی ئازاری ١٩٨٨ تۆڵەسەندنەوەی دەوڵەتانی ناوچەکە و پارتییەکانی ناسیونالیزمی کورد بوو لە سەربەخۆیی جەماوەرێک، کە لە دەرەوەی بڕیار و ویستی ئەوانەوە لە ١٧ی ئایاری ١٩٨٧دا ڕاپەڕیبوو و لە بڵندگۆی مزگەوتەکانەوە دروشمی "کرێکارانی جیهان یەکگرن"ی لەجیاتی بانگ چڕیبوو.

هەڵەبجە شاکاری ناسیونالیزمی کورد و شۆڤێنیزمی عەرەب و فاشیزمی دەوڵەت بوو، نهێنییەک کە تا ئێستاش دەسەڵاتخوازان بە ڕاست و چەپەوە نایانەوێت بۆ خەڵک ئاشکرابێت، هەڵەبجە سەرەتای ئەو تاوانانە بوو، کە دواتر ناسیونالیزم و شۆڤێنیزم و فاشیزم لە بۆسنە و هەرزەگوین و کۆسۆڤۆ و ..تد بە لوتکە گەیاندن.

بەداخەوە ٢٧ ساڵە هەم میدیای جیهانی و هەم میدیای کوردی تاوانی کۆمەڵکوژیی هاوڕێیانی گوردانی شوانی (کۆمەڵە)، کە ئەو کات بنکەیان لە گوندی وێرانبووی بیارەی ناوچەی هۆرامان بوو و ئێوارەی پێش ١٦ی ئازار لەلایەن بەسیجیان و سوپای پاسدارای قەرارگای ڕەمەزان و ئیسلامییەکانی عیراقەوە لە دەوروبەری دەریاچەی سیروان [ئیمامی زامن و کانی بەردینە] ئەنجامدرا، پەردەپۆشدەکرێت و تەنانەت خودی (کۆمەڵە) و کۆمەڵە جیابووەکانی دیکەش لە ئاستێکی پێویستدا ڕۆشناییان نەخستووەتە سەر ئەو مێژووە چەپەڵەی ناسیونالیزمی کورد، کە پێشلەشکریی سوپای پاسداران بوو بۆ سەر ناوچەکانی هۆرامان و هەڵەبجە و شارەزوور.

تاوان و تراجیدیای ئازاری ١٩٨٨ کڕۆک و دیوی ڕاستەقینەی پەیام و ئامانجی ئایین و دەوڵەت و ناسیونالیزم بوو و لەو کاتەوە کە ئایین و دەوڵەت و ناسیونالیزم توانیویانە وەک تەلیسمێک بەسەر هۆشی مرۆڤدا زاڵببن، تەنیا نەهامەتی و کۆمەڵکوژیی و چەوسانەوەیان بەرهەمهێناوە؛ کۆیڵەتی زۆرینە بۆ سەروەریی کەمینە، هەموو جەنگەکانیش هەر لەپێناو پاراستنی ئەو سەروەرییەدا ئەنجامدراون و سووتەمنیشیان تەنیا کەسانی سڤیل و چەوساوانی ناهوشیار بوون. لەبەرئەوە تەنیا ڕێگەیەک بۆ بەرگرتن لە چەندبارەبوونەوەی کیمیابارانی هەڵەبجە، نەفرەت و ڕەتکردنەوەی ئایین و دەوڵەت و ناسیونالیزم و شۆڤێنیزم و فاشتیزم و ڕامیاریی و پارتایەتیی و چەک و جەنگە؛ گێڕانەوەی ویستە بۆ تاک و کۆمەڵ و ڕۆنانەوەی ژیانی ئازادە لە دەرەوەی سەروەریی مرۆڤ بەسەر مرۆڤ؛ لە دەرەوەی دەوڵەت و لە دەرەوەی سنوورە ئەفسانەکردەکانی ناسیونالیزم و شۆڤێنیزم و فاشیزم و ئێتنۆسێنتریزم و خۆشباوەڕیی بە فەرمانداریی [حکومەتی] باش.
_____________________________
• بیست و حەوتەمین ساڵیادی کیمیابارانی هۆرامان و هەڵەبجە و شارەزوور، سات ١١:٣٤ خولەک.

١٦\٣\٢٠١٥
ماڵپه‌ڕی هه‌ژێن