١٧\٣\٢٠١٠

بێ مۆنتاژ.

بەشدار عه‌لی  

* بەداخەوە لە وڵاتى (هایتى)بومەلەرزەیەکى بەتین روویدا و بەهەزاران قوربانى لێکەوتەوە و هەزارانى تریش ئاوارە بوون،دوایى ئەم رووداوە کۆمەڵگاى نێودەوڵەتى و رێکخراوە خێرخوازی و ئینسان دۆستەکان دەستیانکرد بە گەیاندنى کۆمەک و هاوکارى بۆ برینداران و لێقەوماوانى ئەو وڵاتە و تاکو ئیستاش هەوڵەکانیان بەردەوامە( بەجیا لە ئاماژەمانى پشتەوەى دەستى هاوکارى وڵاتە بۆرژوا و سەرمایەدارەکان)،بەڵام ئەوەى جێگاى تێڕامانى ئێمەیە لەگەڵ گەیشتنى کۆمەک و هاوکارییەکان میدیاکان بڵاویان کردەوە کۆمەڵێک خەڵک ئەو کۆمەک و هاوکاریانەیان نەیانگەیاندۆتە لێقەوماوان و تاڵان و برۆیان پێکردووە و بۆ مەبەستى تایبەتى خۆیان بەکاریان هێناوە،بەکوردیەکەى وەکو لاى خۆمان فەرهودیان کردووە! لەگەڵ بیستى ئەم هەواڵە کۆمەڵێک رووداوى لاى خۆمان و هەڵوێستى کۆمەڵێک نابەرپرسى کوردستانم بیرکەوتەوە کە چۆن کیمیابارانى هەڵەبجە و ئەنفال و گەمارۆى ئابورى بۆیان بوو بە دووشەشێک و کۆشک و تەلاریان پێ بەرزرکردەوە و بە کۆمەک و هاوکارى لەلایەن کۆمەڵگاى نێودەوڵەتى و رێکخراوەکانى مافى مرۆڤ خەریکى کارى بازرگانى بوون و لە ئەنجامدا کارەساتەکانى سەر میلەتەکەى کردنى بە بزنسمان.

تەنها جیاوازییەک لەنێو رووداوەکەى هایتى و ئەوانەى لاى خۆمان بەدیدەکەم،هایتى رووداوێکى سروشتى بوو،بەڵام ئەوانەى لاى خۆمان مرۆیى بوو،بۆیە گومانەکان بەرەو یەقینمان دەبات ،ئەوانەى کۆمەک و هاوکارى خەڵکى لێقەوماوى کوردستانیان خوارد و بازرگانیان بە هەڵەبجە و ئەنفال و ئاوارەیى کرد،هەر خۆشیان هۆکارى روودانى بوون دەستپێشخەرى و کارئاسانیان لەم بارەوە کردووە، چونکە خێرى زۆر بوو بۆ هەندێک کەس..!!

* لەرۆژى عاشقانى جیهان(ڤاڵانتاین )پۆلیسى دەشتى هەولێر دوو عاشقى بەدبەختى ئەو وڵاتەیان بۆماوەى 2 سعات زیندانى کرد، تەنها لەبەر ئەوەى وویستویانە دوور لەچاودێرى کامێراکان و پۆلیسەکان پیاسەیەک بکەن و لەم رۆژەدا مشتێک لە رازى و نیازەکانیان بۆ یەکتر باس بکەن..بەدبەختیەکە لێرەوەیە، عاشق بوون و خۆش وویستنى کچان و کوڕان لەم مەملەکەتەى ئێمە یاساغە،بەڵام ئیهانە و سوکایەتى بە شعور و ئەحساسى تاکەکان لەژێر بەهانەى جۆراو جۆردا رێگەى پێدراوە،رۆژانە دەیان جار هەست و نەستى گەنجان و تازە لاوان و مناڵ و پیر و پەککەوتەکان یارى پێدەکرێت،بێ هۆ نیە گەنجانى ئەو وڵاتە هەموو رێگایەک تاقیدەکەنەوە بۆ دەربازبوون لەم وەزعیەتەى بۆیان خولقاوە..

کەم نەبون ئەو کچ و کوڕە گەنجانەى تەنها پیاسەیەک و نامەیەک و تەلەفۆنێک خەون و خولیاکانیان لێکرا بەسەراب و بۆ هەمیشە بە خاک سپێردران و گوللە باران کران،کەم نەبون ئەو کچ و کوڕانەى تەنها لەبەر ئەوەى رەقیان لەیەکتر نیە و یەکتریان خۆش دەوێت ،بۆ هەتا هەتا نەیانهێشت لەیەکتر نزیک ببنەوە ،کەم نەبون ئەو کچ و کوڕانەى دەسەڵات و عەقڵیەتى ناو گەڵى بەرپرسان و مناڵانى بەرپرس نەیانهێشت هەناسەیەکى ئاسودە لەگەڵ یەکتر هەڵمژن..

کە چارەنوس و دیاریکردنى دوا رۆژى ئینسانەکان لەدەستى خۆیاندا نەبێت،کە پیاسە و قسەکردنێک مەرگى لەدوا بێت،تەنها ژوورێکیان دەست نەکەوێت بۆ پێکەوە ژیان،سادەترین و ساکارترین پێداویستیە رۆژانییەکانیان ببێت بە خەون و خۆزگە و رۆژانە ئاهو ئاخى بۆ هەڵکێشن،کە سیستەم و یاسایەک نەبێت بۆ پاراستنى شەخێیات و کەرامەتیان و دەستدرێژى و ئیهانە و سوکایەتى پێکردن لەسەر سەرەتاترین حەزە تایبەتیەکانیان ببێت بە عادەتێکى رۆژانە،لە باخچە و هۆڵێکدا نەتوانن دوو راز و نیاز بە ئازادى بگۆڕنەوە...ئیتر عەشق و ئەوین و ژیان جگە لە گاڵتەجارییەک چیترە؟!