٢٧\٩\٢٠١١

    بێرموودا سێ.

وشەجاڕ  

سێگۆشه‌یێ
      خوێنی کچێک پۆلێ به‌رد و گه‌لی گورگ.
              له‌ سه‌ر نوکی سێ گۆشه‌که‌
                           بۆم دانیشتووی.
ئه‌وە بڵێی ھه‌ر ئه‌مجارە له‌ «بێرموودا»ت بپه‌ڕمه‌وە؟!
   *   *   *
ھاماڵ، ھاماڵ کردتان به‌ ژووری دەمارما و
                        له‌ رەگ و ریشه‌ت دەرھێنا.
   *   *   *
ئه‌و دیدارە
ئه‌و به‌ردەوردانه‌ باران به‌ سه‌ر ئه‌وا ...
«باران»یش به‌ سه‌ر ئێمه‌دا.
   *   *   *
ئه‌ی ئه‌و که‌سه‌ی خوێن له‌ دەمارما به‌ شوێن «پێ»تا ئه‌گه‌ڕا
                        کچێ ده‌با
له‌ جێی ئه‌و گه‌له‌ فرمێسکه‌
دەشتێ «ماچ»ی سه‌رتاپا سه‌وز
له‌ به‌ر «پێ»«م» و «سپێدە»ما رات خستایێ.
                                 نیازم وا بوو
                           ئه‌گه‌ر بوومه‌له‌رزەی «تۆ»یێ
بێت و «به‌رد»م، بێت و «ده‌رد»م راچڵه‌کێنێ
گۆنای؟ «ته‌خت» و «به‌خت»ێ بکەم
بۆ «شاژن»ی ماچه‌کانم
سینگی بتەنم وه‌کوو باخ بە توتڕکی دەستەکانم.
... دایبچێنم به‌ «توو»ی خۆم و
له‌ جێی «تاژ»یش
مه‌مکی بنێم بە قوللەی باڵابەرزترین شیعرمەوە و
                                 نیازم وایه‌... .
ئه‌ی ئه‌و که‌سه‌ی خۆر له‌ ئاسمانما به‌ شوێن «پێ»تا ئه‌گه‌ڕا
نیازم وایه‌ تاڵ، تاڵ قژت پێوه‌ن بکه‌م له‌ «خۆر»م و .
                   خه‌ڵفه‌، خه‌ڵفه‌ پێکه‌نینت له‌ «وجوود»م.
         نیازم وایه‌ شێری دڵم پاوه‌ن بکه‌م له‌«ئاسانه»‌ی حه‌زره‌ت تدا و
                   نیگاکانم بده‌م به‌ سه‌ر به‌ردێکی به‌ر «خۆرەتاو»تا - با هەڵقرچێن -
من به‌ رووتی و بێ دەس دیاری خۆشم ئه‌وێی که‌چی ...
        ھه‌موو جارێ له‌ گه‌ڵتدا گەلێ فرمێسک ئەکەنە سەر لاکی دڵم و ... .
                              ئه‌ی «به‌رد»
                                        بۆ جێیان دێڵی؟
   *   *   *
ئه‌م نامه‌یه‌
         به‌ رووتی و به‌ دەستی خاڵی بۆت ده‌نێرم
حه‌زم ئه‌کرد به‌ڵام به‌ڵام دڵم نایه‌ت و ناوێرم
        ته‌نانه‌ت «خۆشه‌ویستی»مت بۆ بنێرم
                 نه‌ک «ابابیل» «رەجم»ت که‌ن و... .
   *   *   *
ئه‌رێ بڵێی؟!!... ھه‌تیو بڵێی؟؟؟!
زۆر ئه‌ترسام... و ئه‌ترسێم.
            نه‌ء
مه‌گه‌ر بێیت و فریام که‌وی
            تێی که‌وتوم.

ماڵپه‌ڕی وشەجاڕ