١٣\٨\٢٠١٠
بەیاننامەی
ناڕەزایی لقى کەرکوکى سەندیکای رۆژنامەنووسانى کوردستان
دژی بەرتەسککردنەوەى ئازادی کاری رۆژنامەوانی.
ماوەیەکە بەهۆى کەمتەرخەمیی فەرمانگە خزمەتگوزارییەکان و تەشەنەکردنی
گەندەڵیی لە زۆربەی دامودەزگا حکومییەکاندا، تادێت درزی نێوان دەسەڵات
و جەماوەری خەڵک لە زیادبوونێکی لە رادەبەدەردایە، بەجۆرێک کە خەڵکى،
دەسەڵات بە هێزێکی نامۆو دوور لە خۆى بزانێت، کە ئەمەش دەرئەنجامێکى
ترسناکی لێچاوەڕوان دەکرێت. خۆپیشاندانە جەماوەرییەکانی ئەمدواییانەی
کەرکوک و شارۆچکەکانى دەوروبەری وەکو چەمچەماڵ و پردێ و ناڕەزایی
جەماوەرییانەى هەندێ لە گەڕەکەکانى خودی ناوشاری کەرکوکیش نیشانەی
زیاتر ئاڵۆزبوون و هاتنەکایەى تەنگژەی ترسناکی ئەو دۆخەن. وەڵامدانەوەی
توندی دەسەڵاتیش بۆ جەماوەری ناڕازی و خۆپیشاندەر و پەلاماردان و
لێسەندن و شکاندنى کامیراى راگەیاندنکاران و رۆژنامەنووسان و سوکایەتی
کردن پێیانەوە، دەرهاویشتەیەکى ترسناکی دیکەى دۆخەکەن و رۆژ لەدواى
رۆژیش هەست بە زێدەبوونی دەکرێت و پێویستی بە چارەسەرێکى بەپەلەیە.
ئێمە لە لقى کەرکوکی سەندیکای رۆژنامەنووسانى کوردستان، وێڕای پشتیگریی
تەواومان لە مافى خۆپیشاندانى جەماوەری و داواکارییە سەرەتاییەکانى
خەڵک، رووماڵکردنێکی بێلایەنانەى ئەو خۆپیشاندان و ناڕەزایەتییانەش
لەلایەن رۆژنامەنووسان و راگەیاندنکارانەوە، بە مافێکى رەوای
رۆژنامەنووسان دەزانین و زۆر بە توندیش ناڕەزایی خۆمان دژی ئەو رەفتارە
نابەرپرسیارێتیانە دەردەبڕین کە دەرهەق بە رۆژنامەنووسان و
راگەیاندنکاران پەیڕەوو پیادە دەکرێن و ئەو دەستدرێژیانە بە پێشێلکردن
و سەرکوتکردنى ئازادى خەڵک دەزانین. ئەمە لەکاتێکدایە کە چاوەڕوانی
دەرفەتی زیاتری پیادەکردنی ئازادی کاری رۆژنامەگەریی لە کوردستان و
ناوچە داگیرو دابڕاوەکانی وەکو کەرکوک و شوێنەکانی دیکە دەکرا، کەچی
بەداخەوە ئەوەى لەم یەکدوو رۆژەى دوایی روویاندا، جێگای هەڵوەستەو قسە
لەسەرکردنەو بەهیچ شێوەیەک ناکرێ تاسەر لێی بێدەنگ بین. ئەوەی زیاتریش
نیگەرانی کردووین سەرنجدان و مامەڵەکردنی دەسەڵاتە لەگەڵ رۆژنامەنووس و
راگەیاندنکاران، بەجۆرێکى نائاسایی و نایاسایی، وەک ئەوەى
رۆژنامەنووسان هۆکاری ئەو ناڕەزایەتی و خۆپیشاندانە جەماوەرییانەی خەڵک
بن لە داواکردنی مافە سەرەتاییەکانى وەکو کارەباو ئاوو رێگاوبان ...تاد،
نەک خودى دەسەڵات!!
هەر لێرەشەوە داوا لە رۆژنامەنووسان و راگەیاندکاران دەکەین کە لەکاتی
رووماڵکردنی خۆپیشاندانە جەماوەرییەکان و رووداوەکانی دیکەدا بنەما
سەرەکییەکانى کاری رۆژنامەوانی و ئیتیکی کارەکەیان لەبەرچاو بێت و هەتا
بۆیان دەکرێت خۆیان لە هاتنەپێشی رووداوو بارگرژی لەگەڵ پۆلیس و
ئاساییشدا بەدوور بگرن و زیرەکانە مامەڵە لەگەڵ رووداوەکاندا بکەن،
بەجۆرێک کە پاساو نەدەنە دەستی کەسەوە، تا کامیراو پێداویستییەکانی
دیکەى کارى رۆژنامەوانییان لێبسێنرێت –کە هەرگیز نابێ لێیان بسەنرێت-.
هەروەها نەبنە هۆى ورووژاندنی زیاترى رووداوەکانیش کە بەداخەوە لە
زۆربەی رووداوەکاندا دەسەڵات دەیەوێ ئەو جۆرە پاساوە بۆ پەلاماری سەر
رۆژنامەنووسان بهێنێتەوەو رەوایەتی بداتە پۆلیس و لایەنەکانی دیکە بۆ
ئەوەی لەکاتی ئەنجامدانی کاری رۆژنامەوانیدا هێرش بکەنە سەر
رۆژنامەنووس و راگەیاندکاران و کامیراو پێداویستییەکانى دیکەى
کارەکەیان لێبسێنن کە تەواو دژی بنەماکانى مافى مرۆڤ و یاساى کاری
رۆژنامەوانییە لە کوردستان.
بەڵێ.... بۆ خۆپیشاندانی ئاشتیخوازانەى جەماوەری و ئازادیی کاری
رۆژنامەوانی..
نا....... بۆ بەرتەسککردنەوەو رێگرتن لە داواکردنی مافە رەواکانى خەڵک.
لقى کەرکوکی
سەندیکای رۆژنامەنووسانی کوردستان
12\8\2010
|