|
بۆ بەردەم
وەزارەتى پەروەردەى حکومەتى هەرێمى کوردستان .
سالار بابەشێخ
بیگۆمان لە سەرلەبەرى ئەم جیهانە پان و بەرینەداو لە زۆربەى وڵاتانى
پێگەیشتووى دنیا، پەروەردەو لە سەرووى هەموویانەوە قوتابى و مامۆستا،
رۆڵێکى هەرە مەزنیان لە پێشکەوتن و پەرەسەندنى تەکنۆلۆژى و بە پیشەیى
کردنى وڵاتەکەیاندا هەیەو هەر حکومەتێکیش حیسابى تابەتییان بۆ دەکات،
بەڵام بە داخەوە لە وڵاتى ئێمەدا لە جیاتى ئەوەى مامۆستا چەکى سپیى
بانکى پێبدرێ، یان لانیکەم هەموو پێداویستییە سەرتاییەکانى ژیان و
بژیوى رۆژانەى بۆ دابین بکرێت، لە کەمترین مافەکانیشى بێبەش کراوە و
تەنانەت کرێى هاتووچۆیان بۆ دابین ناکرێت!!
لە کۆمەڵگەى سێبیران هەتا هەنووکە قوتابخانەى ناوەندى و دواناوەندى،
مامۆستایان نییە و مامۆستایان ناتوانن هەموو رۆژێک لە سەر حیسابى خۆیان
لە پۆلەکانیان ئامادە بن و وانە بڵێنەوە، ئەمەش تەنها گرفتى کۆمەڵگەیەک
یان شارۆچکەیەک نییە، بەڵکوو هەزاران شوێنى تر هەن کە کێشەوگرفتى
هاوشێوەیان هەیەو هەتا ئێستا چارەسەر نەکراون.
بەڕێزانى کار بەدەست لە وەزارەتى پەروەردە و لایەنى پەیوەندیدار دەبێت
ئەوە بزانن کە هەموو مامۆستایەک، قوتابخانەکەى لە تەنیشت خانووەکەیدا
نییە، هەتا کرێى هاتووچۆى رۆژانەى لەسەر نەبێت و بە مووچەیەکى زۆر کەم،
گرانترین ئەرکى سەر شانى مرۆڤایەتى راپەڕێنێ... کە پەروەردەى نەوەکانى
داهاتووە.
کەس نییە لەم وڵاتەى ئێمەدا کە ئاگاى لە نرخى سووتەمەنى و هۆکارى گرانى
کرێى هاتووچۆکان نەبێت، گومانیشم نییە خودى بەڕێز وەزیرى پەروەردە
ئەگەر تەنها جارێک ببێتە سەرنشینى تەکسییەک یان بە نەفرات سەردانى
گوندێک بکات، دەتوانێت حیسابى بکات کە مامۆستایەک، چ رێژەیەکى نزیک بە
گشتیى لە مووچەکەى، دەبێت بۆ کرێى هاتووچۆى تەرخان بکات!!
گرانى نرخى کرێى هاتووچۆ تەنها لە سەر چینى کەمدەرامەت بارگرانى دەکات
و هەندێک لە قوتابیانیش ناچارن بۆ خۆ دەرباز کردن لە گرانى کرێى
هاتووچۆ ببنە سەرنشینى "کەروعەرەبانە"!!! ئایا وەزارەتى پەروەردە
ئاوڕێک لەم قوتابییە هەژارنە و ئەو هەموو مامۆستا بەڕێز و کەمدەرامەتە
دەداتەوە؟ ئایا بەوە رازى دەبێت کە مامۆتایانیش بە عەرەبانەى لەمجۆرە
بڕۆنە قوتابخانەکانیان یان کێشەى هاتووچۆیان بۆ چارەسەر دەکات؟ وەڵامى
ئەم پرسیارانە لە لاى کاربەدەستان و لایەنى پەیوەندیدارە؟
تێبینى: ئەم بابەتە لە لاپەڕەى 7ى ژمارە 314ى رۆژنامەى کوردستان راپۆرت
لە رێکەوتى 21/10/2007 بڵاو بۆتەوە.
|
