په‌یوه‌ندیپه‌رتووکخانه‌ئێمهلینکئه‌رشیفنووسه‌رانده‌سپێک

 

            بۆ وێنه                 

سه‌ید عه‌لی ساڵحی

 

وه‌رگێڕانی له فارسی‌‌يه‌وه: كامه‌ران هه‌ڵوه‌دا

گوتيان:

 ئێوا‌ره‌ی سێ‌شه‌ممه، زستان بوو، حه‌وتی به‌فرانبار

تۆ په‌ڕه‌سێلكه‌يه‌كی خووساوت له قۆڵدا هێنايه‌وه ماڵێ!

گوتم: حاشای لێناكه‌م.

 

گوتيان:

سبه‌ی به‌يانیش، شتێكی وه‌ك باڵنده‌يه‌كی عاشق

له‌ سه‌ربانی ئێوه‌وه رووه‌و ده‌ريا فڕیوه!

گوتم: حاشای لێناكه‌م.

 

گوتيان:

تۆ له‌ كۆبوونه‌وه‌ی هه‌ندێك گۆرانی لێڵ، بۆ مانايه‌كی‌تر

چنگێ مانات له ناوله‌پی ئاسمان رنيوه!

گوتم: حاشای لێناكه‌م.

 

گوتيان:

تۆ، حيزبابی په‌شێو، تۆ....!

هۆی متمانه‌ی ئاوێنه‌ بووی به نه‌وای له‌نته‌رێ له هه‌يوانی شه‌وا!

گوتم: حاشای لێناكه‌م.

 

گوتيان:

سه‌رپاكی ده‌ڵێن تۆ به‌دگومانترين گومانلێكراوی تێكده‌ری

زارت لێوانلێوه له به‌رامه‌ی پیاڵه‌يه‌ك شير!

گوتم: حاشای لێناكه‌م.

 

گوتيان:

له ده‌وری غه‌زه‌لێكی تاريك، يا ره‌نگه له گوێی حه‌وزی هاوسێ

بۆ ئه‌و سووره ماسييه

له رۆخی ده‌رياوه گورانيت چڕيوه!

گوتم: حاشای لێناكه‌م.

 

گوتيان:

له نێو هه‌موو گڵكۆكاندا، به شوێن گۆڕێكی وندا

بێده‌نگ له‌سه‌ر قۆڵی خۆت گرياوی!

گوتم: حاشای لێناكه‌م.

 

گوتيان:

تۆ هه‌واڵی گومانی گوڵدانێكی وشكت

بۆ باغچه‌ی باران بردووه!

گوتم: حاشای لێناكه‌م.

 

گوتيان:

بۆ ورده كه‌لوويه‌ك، گۆرانی پشكووتنی سۆزيت چڕیوه،

ئه‌وه‌ش هیچ...، تۆيان له سرته‌سرتی ده‌ريا و ده‌لاقه‌دا ديوه!

گوتم: حاشای لێناكه‌م.

 

گوتيان:

به تۆمه‌تی غه‌زه‌لێكی قه‌ده‌غه

هه‌زار وته‌‌ی نوێت له قسه‌ی شه‌تيلا داتاشيوه!

گوتم: حاشای لێناكه‌م.

 

گوتيان: به‌سه!

پێت وانييه له حاشاكردنی عيشقا

تۆ خاوه‌نی چه‌شنێ بێده‌نگی پیرۆزی؟

گوتم: حاشای لێناكه‌م.

 

گوتيان:

بنووسه!

بنووسه كه حاشا له چاره‌نووسی نه‌نووسراوی خۆم ناكه‌م!

نووسيم: حاشای لێناكه‌م!

نووسيم و هاوده‌نگانی نامۆ له‌ود‌يو شووره‌كانی جيهانه‌وه وه‌ده‌نگ هاتن:

ده‌ڵێن شاعيرانی مه‌زن به‌م چه‌شنه ژياون.

 

29/4/1388

 

       هه‌ندێ گازنده بكه‌م؟!     

 

ئه‌ركی ئێمه نه‌بوو تا له‌ دوانه‌ی بوون و داره‌مه‌يت

ته‌نيا يه‌كێكیان هه‌ڵبژێرین.

 

ئه‌ركی ئێمه نه‌بوو تا له‌ دوانه‌ی كێرد و زلله

ته‌نيا يه‌كێكیان هه‌ڵبژێرین.

 

ئه‌ركی ئێمه نه‌بوو تا له‌ دوانه‌ی سروود و خود

ته‌نيا يه‌كێكیان هه‌ڵبژێرین.

 

ئه‌ركی ئێمه نه‌بوو تا له‌ دوانه‌ی ده‌سپێك و كۆتا

ته‌نيا يه‌كێكیان هه‌ڵبژێرین.

 

ئه‌ركی ئێمه نه‌بوو تا له‌ دوانه‌ی به‌له‌م و ده‌ريا

ته‌نيا يه‌كێكیان هه‌ڵبژێرین.

 

ئه‌ركی ئێمه نه‌بوو تا له‌ خود و خه‌ونی هاوسێ

ته‌نيا يه‌كێكیان هه‌ڵبژێرین.

 

هه‌ر تێناگه‌م، ده‌ڵێن رێگه‌ی هه‌ساره به‌خۆمان نه‌بوو.

دايكم ده‌يگوت:

ئاسۆی چاره‌نووست ڕوونه، به‌ڵام داهاتوو نادياره.

 

29/4/1388