١٥\٤\٢٠١٤
(حیزب)ی دەمامک و
دەموچاوەکان.
شوان عوسمان
لە رۆژهەڵاتی ناوەڕاستدا بەگشتی و بە تایبەتی لە (کوردستان)یشدا سیاسەت
بووەتە دەمامکێک و راستی دەموچاوە شاراوەکان دادەپۆشێت، (حیزب)یش خۆی
لەخۆی بۆتە دەمامکێکی گەورە بەسەر دەموچاوەکاندا دابەش دەبێت و کاڵای
بەقەد باڵا بە رادان دەدات و رووی راستەقینەی کەسەکان بزر دەکات، ئەوەی
بیەوێت لە (حیزب)ێک ئیش بکات دەبێت دەست لە کەسێتی خۆی هەڵگرێت و
خاوەنی کۆمەڵێک دەمامکی دەستکرد بێت تا بتوانێت ببێتە خاوەنی کۆمەلێک
دەموچاوی وەرگیراو ، بە هۆی ئەوانەوە دەتوانێت لە چەند بوار و بارێکی
نادیاردا رۆلێکی دیاری هەمەڕەنگ ببینێت، ئەوکات سەر لە دەوروبەری خۆی
تێک دەدات و بەمەش ئامانجی گەورە دێتە دی کە شتێک بکەی تا بزانن شتێکت
کردووە، ئەو کەسانە ناچارن تا پێگەیەک بۆ خۆیان بگرن بە گوێرەی خواست و
ئارەزووی (حیزب)ەوە دەموچاوی خۆیان دابتاشن و دەمامکی خۆیان دابدڕن و
کارەکتەریان بگۆڕن...
هاوکات ئەوان دەبێت بە عەقلیەتی ئەمڕۆکەی سیاسەتی باوەوە رەفتار بکەن
ئەگینا دەموچاوی هەرزان زۆرن، یەکێکی دیکە هەر دەبێت جێگەی ئەوان
بگرێتەوە، هەروەها ئەوان دەبێت لە ناوەوە و دەرەوەی پێگەو پێکهاتەی
(حیزب) دا خاوەنی کۆمەڵێک دەمامک ودەموچاوی تایبەت بە خۆیان بن تا لە
ناوەوە و دەرەوەیاندا خۆیان بخەنە روو ، ئەوکات زۆر بە ئاسانی دەتوانن
لەگەل (سەرکردایەتی و مەکتەبی سیاسی ناوەند و جومگەکانی دەسەڵات و
ستراتیژی حیزب) هەروەها جەماوەری (حیزب) و هاوڵاتیان و نەیارانی
(حیزب)یش لە ئانوساتی خۆیدا دەموچاوی تایبەتی خۆیان دیاری بکەن...
بۆیە دەتوانین ئەمڕۆکە (حیزب) بە ناوێکی دیکەوە ناوزەد بکەین، (حیزب)ی
دەموچاوە گۆڕاوەکان، چونکە لەیەک چرکەساتدا جۆرەها دەموچاو تەشریف دێنن
و تەشریف دەبەن هەروەها دەگۆڕێن، لەبڕی ئەوەی (حیزب) ببێتە مقەستێکی
تیژ بۆ بڕین و دادڕانی دەمامکەکان، دەبێتە دەمامکێکی گەورە بۆ شاردنەوە
و پۆشینی روخسار و رووکەشی راستەقینە و داپۆشینی بنچینەی قەلپ و
نارەسەنی ناوەوەی کەسەکان، بۆیە (حیزب) بۆتە کۆمپانیایەکی نیشتیمانیی
هاوردەکردنی دەموچاوی دەستکرد و ناسروشتی و خەسلەتی نادروست..
هەروەها ئەمڕۆکە لە بن هەر دەمامکێکی سیاسی تەنیا یەک دەموچاو و یەک
رەنگ و یەک دەنگ نابینرێت و نابیسترێت، بەڵکو بە گوێرەی پێویست و
بەرژەوەندی گەورە و کەس و کەسایەتیەکانی (حیزب) دەگۆڕێن و خۆیان
دەگۆڕن، ئەوە کارەساتە کە لە بن هەر دەمامکێک کۆمەڵە دەموچاوێکی
ناسەقامگیر و ناراستگۆ هەبێت، کە لە کاتوساتی ئەوان بیانەوێت ئەو خۆی
دەگۆڕێت دەگۆڕێت، ئەوسا ئەو کۆمەڵگایە دەبێتە جەنگەڵێک لە چەند روویی و
فرەکەسێتی نەخۆش لەیەک کەسدا، لەبڕی ژینگەیەک بێت و جێگەی ژیانی تێدا
ببێتەوە، دەبێتە گۆڕەپانی شەڕ لە پێناو مانەوەدا، لەبن پێستی هەر مەڕێک
کۆمەڵە گورگێک خۆیان دەشارنەوە...
ئەگەر هەر دەموچاوێک دەنگ و رەنگێکی جیاواز بدات، کەوابوو ئێمە لە هەر
چرکەساتێکدا رووبەرووی کۆمەڵێک دەنگ و رەنگ و دەموچاوی سیاسەتمەدارێکی
جیاواز دەبینەوە، کەوابوو چۆن بتوانین لەگەل ئەو هەموو دەمامک
ودەموچاوانە هەلسوکەوت بکەین، ئایا دەبێت ئێمەش ببینە خاوەنی کۆمەڵێک
دەمامک و دەموچاوی جیاواز یاخود کۆیلەی ئەو دەموچاوانە بین، ئەوکاتیش
خۆمان هیچ جیاوازیەکمان لەگەل ئەواندا نابێت، دەبێت ئێمە لە بەرامبەر
ئەو دەمامک و و دەموچاوی سیاسیانە بە ئاگا بین و خاوەنی هۆش و هزری
خۆمان بین، خۆشباوەڕ نەبین و باوەر بە هەموو شتێکیان نەکەین و گومان لە
هەموو قسە و گفت و بەلێن و بڕیارێکیان بکەین...
ئەوکات ئەوان هەست دەکەن خۆیان رووبەرووی یەک کەس و یەک کەسێتی
نابنەوە، بەڵکو کەسانێکی شارەزا و لێزان و پڕ رەنگودەنگی هۆشمەندی
جیاواز کە لە زمانی هەموو رێنووس و فاریزە و خاڵ و پیتی قسەکانیان
دەگەن و هیچیان نامۆ نین پێیان، هەروەها بۆ ئەوەی هەمیشە ئەو ترسە لە
بەردەمیاندا قووت ببێتەوە، دەبێت دەست لە سۆز و ساویلکەیی خۆمان بەر
بدەین و هەمیشە لە ئامادەباشی بردنەوەی ئەو شەڕە سپیەدا دابین کە فەزای
(دیموکراتی) ئەنجامی دەدات، تا هەموو ئەو دەمامک و دەموچاوانە ئاشکرا
دەکەین و بۆ کۆمەڵگاش راستی ساغ دەبێتەوە، ئەوەش بێگومان ئەرک و کاری
رۆشنبیر و بیرمەندەکانی کۆمەڵگایە کە نابێت ببن بە قوربانی ئەوان و
بەرژەوەندیەکانی خۆیان، تا نەبن بە پردێک بۆ پەڕینەوەی ئەوان بۆ
ئەودیوی دونیای سەلامەت...
٢٠١٤ - هۆلەندە
ماڵپهڕی
شوان عوسمان
|