٩\١٢\٢٠١١

لەوەتى هەم دەمتۆقێنن.

هیوا ره‌ش      

بڕوا ناکەم شوێنێک لە دنیادا هەبێت لەم کوردستانە سوتماکە بێسنور و بێئاڵایەى ئێمە مزگەوتى زیاترى تێدا بێت ، گەلێکیش نیە لە ئێمە باوەڕدارتر بە ئایینى ئیسلام و تۆقیوتر لێى ، مێژوو دەیگێڕێتەوە کە کاریگەریى تیغ و تیر چەند بە هزرى کۆمەڵگاکەماندا شۆڕبۆتەوە ، تەنانەت وانەى ئایین مێشکى منداڵە خنجیلانەکانیشمانى لە خوێندنگاکاندا ئاڵۆسکاندووە و ڕێگەى لێدەگرێت و ناهێڵێت ئاسایى لە دنیاى دەوروبەرى بڕوانێت و سروشتیى بیر بکاتەوە و بپشکوێت ، بۆیە کاتێک دەگەڕێنەوە ماڵ ، بە سادەیى خۆیان پرسیارگەلى : من شر ما خلق ، یانى چى ؟ خودا کێیە ، لە کوێ دەژیت ، کێ دروستى کردووە ؟ دەچینە بەهەشت یان نا ؟ کە خودا خۆى دروستمانى کردووە مەبەستى چییە لە سوتاندنمان ؟ چ پێویستى بە نوێژە بۆى بکەین ؟ گەلێک جار شتى لە تواناى خۆیان و قەوارەى مێشکیان و بارتەقاى جەستەیان زلتر دەڵێنەوە ، بێحەوسەڵەمان دەکەن و ناچار بۆ وەڵامەکانیان دادەنیشین و وردورد وەکو تەونى جاڵجاڵۆکە حیکایەتیان بۆ دەهۆنینەوە و درۆیان بۆ دەکەین ، چونکە ناوێرین ڕاستییان پێبڵێین نەبادا قسەکانمان بگوازنەوە بۆ کۆڵان و لەوێوە دەماودەم بگاتەوە بە خەلیفۆکە شمشێربەدەستە مرۆکوژەکان و ئەوانیش فتواى ملپەڕاندنمان بۆ دەربکەن ! بۆیە منداڵەکانمان ترساو و سەرسام و گوماناوى گەورە دەبن .

هەزار ساڵە لە بڵندگۆى مزگوتەکانەوە الله اکبر بە گوێچکەماندا دەدەن و ڕێگەى شایەتومانمان پێپیشان دەدەن و لە هەینییەکاندا بە نێوچەوانى مۆن و دەنگى بڵند هەرشەشاوى و پەنجەڕاوەشاندنەوە بە فریشتە و ئەهریمەن ئاشنامان دەکەن و بە دۆزەخى ئاگرین و بەهەشتى خەیاڵیى ناوکمان دەبڕن و بە یا ویل ناومان دەنێن و ڕۆژیمان بۆ دەبڕنەوە و ڕۆژى دواییمان بۆ دیارى دەکەن و پرسیارە بێوەڵامەکانمان لێیاساغ دەکەن و دەمانکەنە بونەوەرێکى بێئیرادە ، وتەیەکى قەڕەزاوى لە مێژووى شێخ شەعیدى پیران و قازى محەمەد و شێخ مەحمود و مەلا مستەفا بەرزتر و بەهادارتر دادەنێن و شانازى بە مەزارى ئەسحابە کوژراوەکانى کوردستانەوە دەکەن و لەبرى ئەوەى بپرسنەوە بۆچى گەییشتونەتە وڵاتەکەمان بە فریادڕەس ناوزەدیان دەکەن ، ئیسلامى سیاسیى دەیانەوێت بە ( لا فرق بین العربی و العجمى الا بالتقوى ) سترتیژى نەتەوەییمان بکەنە ( کبش الفدا ) ى تاکتیکى دامەزراندنى دەوڵەتى تاڵیبانى .

منى مەلازادە ، هەر لە پێش چوونە قوتابخانەوە قوڕئانیان پێ - خەتم - کردم و فێریان کردم دەبێت نوێژ بکەم و لە خزمەتى مزگەوتدا ببم و پرسیارە - شەیتان - ییەکانم بجوومەوە و مێشکم لە قتوو بنێم و لە پرسیارى خودا کێیەدا ؟ مێشکم دابخەم و کلۆم بدەم ، ئەگەر وا نەکەم دەڵێن شیوعییە مولحید و خوانەناسەکان بیرى نامۆ بڵاو دەکەنەوە مێشکى ئەمیشیان تێکداوە و ململانێ فەلسەفى و فیکرییەکانى پێش زایینیش وەئەستۆى ( مارکس ) ى مرۆدۆست دەخەن ، وێڕاى ئەوەى خودى ئیسلامەتى بە لاى منەوە نامۆ یە ، دەبێت وەکو کۆیلەیەک لەبەردەمیدا کڕنوش ببەم و لە بەرامبەر ئەوەدا بە حۆرى و غیلمان و شەراب پاداشتم بدرێتەوە ، ئەو پاداشتە تۆبزییەى لە خواستى خۆمدا نیە و دەبێت بمەوێت ، ئەمەیە ڕاى ئازاد و ئازادیى تاک لە بونیادى فیکریى ئوسامە و مەلا عومەرەکانى کوردستان .

ژەمێک نانى تێرسکى خۆم نەدەخوارد و دەبوایە ڕۆژوو بگرم و لێوم وشک هەڵبێت و گورچیلە بچووکەکانیشم بە درێژایى ڕۆژگارى درێژى قرچەى گەرماى هاوین چاوەڕوانى بانگى مەغریب بکەن تا چۆڕە ئاوێکیان بۆ ڕۆ بچێتە خوارێ کە دەبوایە لە ڕۆژهەڵاتن ( تاڵە دەزوى سپى ) ەوە تا ڕۆژئاوا ( تاڵە دەزوى ڕەش ) دەم و دڵ و چاو قوڕەپەست بکەم ، هەرچەندە ئێستا دڵم بەو هاوڵاتییانە دەسوتێ کە لە وڵاتێکدا بژین ڕۆژهەڵاتن و ئاوابوونیان لا مەعلوم نیە و کەمتر خۆرى تێدا دەردەکەوێت ، کە بە پێى پێوەرى کۆن و ئەو دیارى کردنەى جەزیرەى عەرەبى بێت ڕۆژوویان لەسەر نیە و بە ڕۆژووش نەبن تاوانبار و کافر دەبن ، ئاى لەم سەرگەردانییە کە نابێت و ناکرێت بپرسین ئەگەر عیلم لە دینەوە وەرگیراوە دەبوو حیساب بۆ ئەو مەسەلەیەش بکرایە و ئیکتیشافى ئەو وڵاتانەى تێدا بەیان بکرایە کە کەشوهەواى جیاوازتر لە دوڕگەى عەرەبییان هەیە یان لەو دەمەدا بە کاتژمێر مەودا و کاتى ڕۆژوو دیارى بکرایە ، بۆ ئەوەیش کە فەرز کردنى ڕۆژوو گوایە بۆ تەندروستى باشە و لە وەزعى هەژاران ئاگادار دەبین ، ئێمە خۆمان برسیى بووین و لەگەڵ هێڵى هەژاریدا تەریب بووین و جەستەم لەڕولاواز و پێویستى بە نەشونماى زیاتر هەبوو بۆیە دەکرا ئەوانەى ئێمەئاسابوون لەو فەریزەیە ئیستیسنا و عەفو بکرانایە .

دایکە مەلاژنە سەیدزادەکەم کە سێساڵ لەمەوبەر و لە تەمەنى هەشتاوسێساڵیدا و دواى حەفتاوپێنجساڵ لە نوێژ کردن کۆچى دوایى کرد ، بەسزمانە بە - الحمدلله - ى ئەوت ئەلحەمیلا و - ولا الزالین - یشى ئەکرد بە وەلالڵاڵین و هەموو ژیانى لە خزمەتى شەقى باوکم و چاوەڕوانیى شەقى - ئەوسەر - دنیاى خودادا بەسەر برد ، جگە لەوەى لە ماناى تەنها یەکتاکەوشەى عەرەبى تێنەدەگەییشت ، بەڵام لەبەرئەوەى ترسى خوداى زۆر لە دڵدا بوو ، دڵنیاشم لە - یوم الاخرە - دا لە خۆفى ئەودا ئەژنۆى دەشکێت و زمانى تێکدەئاڵێت و ئەوەى دەشیزانێت بیرى دەچێتەوە و ناتوانێ وەڵامێکى تێکشکاوى تەنها یەکتاکەپرسیارى ( قیامەت ) بداتەوە ! دەزانم چۆن ئێرەى بە کوێرەوەرى گوزەراند ( ئەوێ ) شى هەروا دەبێت .

بۆم نیە بپرسمەوە بۆچى و بۆچى و --- بۆچییەکان ؟ خودا بۆچى شەیتانى دروستکردووە ؟ کە دروستى کردووە بۆچى بە قسەى فریو نەخۆم ، بۆ ئەوەى فریو نەخۆم بۆچى هێندەى عەقڵ پێنەبەخشیم زاڵ ببم بەسەریدا ، کە بە قسەى بکەم ، ئەدى بۆچى سزا بدرێم ؟ ( خودا ) یە بۆچى شەیتانت خوڵقاندووە تا لە ڕێگەم دەربکات و تۆش سزام بدەیت و ئەگەرنەیەتە بنکڵێشەى من و ئەم و ئەو و بە زۆڵییەکانى تەفرە نەخۆین ئەدى ئیتر جەنابى چ کارەیە و بۆچى خوڵقاوە ؟ دەکرێت خەڵقەندەیەکى یەزدان بێکار و بێپیشە و بێهۆ دروست کرابێت ؟ ئایا موعجیزەکە لە چیدایە ؟ دۆزەخ بێکۆتا هەڵخرابێت و گرمە و لرمەى نێزەى ئاگرى بێکۆتا نەکوژاوە بێت ، دەبێت چ چێژێک لە گڕدانى مندا بێت و دەبێت من چ بم تا خودایەکى مەزن خۆى بە عەبدێکى ( نەفام ) ى وەکو من خۆش نەبێت ، خەییام وتەنى من خراپ و تۆش بە خراپى من بکەى ئیدى جیاوازیى من و تۆ لە چیدایە ؟ منێک هێندە ڕزقت نەدابم شوکرانەت بکەم و باى ئەوەندە عەقڵت پێنەدام شەیتان ملشکێن بکەم ؟ ئیتر گلەیى و سزا لە پاى چى ؟ !

ڕۆژێکیان وتم : ئارمسترۆنگ چۆن گەییشتە سەرمانگ ؟ باوکم لەگەڵ زللەیەکدا وتى : حەرامزادە جارێکیتر گووى وا نەخۆیت و بڕوا بەو درۆ شاخدارانە نەکەیت با کافر نەبین ، وتم ئەى باشە لە شەوى میعراجدا چۆن ( حەوت تەبەقە ) ى ئاسمان بڕدراوە بە بێئەوەى بە ڕێگەیەکى زانستییەوە بۆشایى ئاسمان تەى کرابێت و لێکۆڵینەوە و توێژینەوە و ئیکتیشافى پێشوەختى بۆ کرابێت ؟ حاجى و مەلاکانى مزگەوت وتیان : مامۆستا کوڕەکەت مەنێرە بەر عیلمى شەیتان با لە دین دەرنەچێ ! کەچى ئێستا دەڵێن هەموو زانستەکان لە قوڕئانەوە وەرگیراون ، خۆ ناوێرین بپرسین ئەگەر وایە ! دەبوایە ئوممەتى قوڕئان ببوونایەتە سەرچاوەى زانستەکان و گەلانى سەر ڕووى زەمین لەوانەوە ڕێگەى پێشکەوتنیان بگرتایەتە بەر و لە باتى تەقاندنەوەى تیئێنتى لە ناو ئاپۆڕاى خەڵک ، سمێڵ و شەڕواڵ کورتکردنەوە ، ڕیش بەردانەوە ، سیواک و ئینفیعال و ترس و تیرۆر بڵاوکردنەوە دەبا لە قوڕئانەوە فێر بوونایە و زانستەکان لە زار و بیرى ئەوانەوە چرۆى بکردبایە ، دکتۆر عەبدولواحیدى مامۆستاى زانکۆ و پسپۆڕى نەشتەرگەرى و میوانى بەرنامەى - بەبوێرى - ى کەناڵى ئێنئارتى ، کە داکۆکیکارێکى سەرسەختى ئاوێتە کردنى زانست بوو بە دینەوە ، هەموو نهێنییەکانى زانستى گەردونناسى و فەلەکناسى و کۆمەڵناسى و زیندەوەرزانى و کیمیا و بایۆلۆجى و - - -لەبەردەمى ئیسلامییەتى خۆیدا کۆڵەوار و دەسەپاچە کردبوو ، کەچى بە درێژایى سێ ئەڵقەى بەرنامەکانى کە زۆر بە تەحەددا و لوتبەرزییەوە قسەى دەکرد و ڕایدەگەیاند : ئەگەر کەسێک ئامادەیى هەبێت چەلەحانێى لەگەڵدا بکات ئەوا بەرامبەر سەد کەس دەگرێت بە بێئەوەى ئیختیراع و ئیکتیشافێکى زانستیى خۆشى ڕابگەیەنێت ، زۆرباش دەشزانێت هەر کەسێک بەو کارە هەستێ ئەوا ژیانى خۆى و ماڵ و منداڵ و دراوسێکانى و لەوانەیە گەڕەکەکەشیان توشى مەترسیى حەتمى ببنەوە بۆیە خۆى بە بێ ڕکابەر دەبینێتەوە و بە سەرکەوتنى وەهمى زانایى بۆ خۆى تۆمار دەکات ، ئەو دەزگا دەسکردانەى ( غرب الکافر ) کە ڕۆژانە ئیسلامییەکان بۆ خزمەتى خۆیان و دینەکەیان بەکارى دەهێنن لە ( مۆبایل - تەلەفزیۆن - ڕادیۆ - چەک - فڕۆکە و ئۆتۆمبێل و ---- ) خۆیان دروستیان بکردایە و داهێنانیان تێدا بکردایە واوەیلا بۆ ئەو ڕۆژە ! کە تەنانەت جلوبەرگ و پۆشاک و پێڵاو و ناوماڵ و حیجاب و مێزەر و کەشیدە ) کانیشیان زۆربەى هى ( زڕبرا ) غەیرە دینەکانیانە و بگرە ئەو سەتەلایتەش کە شێرەبەفرینەکان دەیکەنە مینبەرى تەحەداى دکتۆر عەبدولواحید ئاسا وتەنى ( نەفام و نەزان و بێئەقڵ ) ەکان هیچ فەزڵێکى بۆ ئەو و هاوبیرەکانى ناگەڕێتەوە ، هەموو ئەمانە بە لایەک و لە لایەکى تریشەوە نازانم بۆچى ئەو بەڕێزە نەیتوانى تەنها یەکتاکەواژەى قوڕئان بەکار بهێنێت لە بوارى تایبەتمەندێتى زانستى کۆرپەڵەناسیدا کە تێیدا پسپۆڕە و زۆر بە سنگ دەرپەڕاندنەوە پەناى وەبەر واژە ئینگلیزى و لاتینییە زانستییەکان دەبرد ، تەحەدداى دەکەم لە وشەى داتاشراوى عەرەبى زیاتر کە هەر وشەیەک و جۆرەها ڕاڤە هەڵدەگرێت ، توانیبێتى یەکتاکەواژەى زانستیى بەکار بهێنێت ، جا نازانم دڵى نەدەهات واژەکانى خۆیان لە فەرهەنگى ئایدیۆلۆژیاکەیان دەربهێنێت و بەکاریان بهێنێت ؟ ! یان سەرچاوەى زانستەکان بەرهەمى ماندوبوونى ئەو زانایانەن کە بە ڕێکەوتیش دەورى قوڕئانیان نەکردۆتەوە و بە لاى دەرسى ئیسلامیدا نەچوون و لێى نزیک نەبوونەتەوە و لە ژیانداهێنانیشیان کردووە ، نەک وەکو ئەوەى بەڕێزیان شانازیى پێوە دەکات .

پێم سەیرە هەڵا بۆ سوتاندنى بارەگا دەنرێتەوە و نەزانبیرە سیاسییەکانیش بە دوایدا ( سەڵەوات ) لێدەدەن و شەرمنانە لە باسى دەسدرێژى کردنە سەر ئازادى تاکەکان دەدوێن ، بانگدەرانى ئازادیى سەراى ( ئازادى ) لە بادینان مردنى خۆیان و زیانى خاوەنیان دەوێ ، لە دژایەتى پارتیدا شاباش بە تاریکتر دەکەن و بەرژەوەندى باڵاى نەتەوەیەک و ئەزمونەکەى دەخەنە موزایەدەى سیاسییەوە و بێئەوەى ئەوە وەبیر بهێننەوە کە دەبێت فشار دروست بکرێت بۆ وەدەرنانى بارەگاکان و ئەوسا با حیزبەکان لە دەشتودەردا یەخەى یەکتر دابدڕن نەک ئاساییشى خەڵک تێکبدەن و بێڕێزیى بە پیرۆزییەکان و سەرچاوەى بژێوییان بکەن ، ئەرێ دوکانى مەیفرۆشیى و مەساژ و هوتێل و شوێنە گەشتوگوزارییەکان مەترسییان بۆ سەر گەل و ئەزمونەکەى و ئاساییشى نەتەوەیى زیاترە ؟ ! یان خاکبەزاندن و سنورشکاندن و تۆبباران و بۆمبارانى فڕۆکە و گوند خاپور کردن و ڕەز سوتاندن و سڤیل و بێگوناه کوشتن و ئاوارە کردنى گوند نشینان و تیرۆر و تەعریبى نوێ لە لایەن ئیسلامە فەرمانڕەواکانى تورک و فارس و عەرەبەوە ؟ ( ڕۆشن ) بیرە گۆڕانخواز و چاکسازەکان لە خۆیان ناپرسنەوە هەندێک لەو مەلایانەى باس لە دامەزراندنى دەوڵەتى ( ئەخلاق ) دەکەن کەنگێ ئەخلاقیان دەبزوێ و شەهامەتیان وەکار دەکەوێ و ئیعلانى جیهاد دەکەن بەرامبەر داگیرکەران کە جگە لە سەرکوتى سەربازیى سەرقاڵى هەناردەکردنى بیرى کۆنن لە ڕێگەى کۆمپانیاکانیانەوە ؟ ئەو ( ڕۆشن ) بیرانەى باس لە ئازادى تاک و بیروڕا و دیالۆگ وسەروەریى یاسا و دیموکراسیەت و یەکتر قبوڵکردن دەکەن ، ئەگەر جورئەتیان تێدایە با داکۆکى لە مافى ئاینگۆڕینیش بکەن کە بەشێکى گرنگە لە مافى تاک لە چۆنێتى بیرکردنەوەیدا ، چۆن لە وڵاتانى ڕۆژئاوا کەسێکى مەسیحى بێئەوەى ڕێگرى لێبکرێت بە ئیسلامبوونى خۆى ڕِادەگەیەنێت و کۆلکە خەلیفەکان بە زماندرێژییەوە شاباشى بۆ لێدەدەن ؟ ! دەبا لێرەى ئێمەى بنسایەى حومکى شەریعەتى ڕەوابەخش بە بڕینەوەى ئەندامانى جەستەى مرۆڤ ، خەڵکیى ئارەزومەندانە بتوانن بۆ خۆیان دینى خۆیان بگۆڕن ، دەبا لە ئاوەها پرسێکدا بێنە دەنگ و ئاسایى بێت ئەگەر کەسێک لە بەئیسلامبوونى خۆى هەڵگەڕێتەوە و شەریعەتى بارەگاسوتاوەکان فتواى کوشتنى بۆ دەرنەکەن ، ئەوسا منیش دەڵێم بژى ئازادى و دیموکراسى و مافى مرۆڤ و ئەو ئیسلامەتییەى هەرگیز لەگەڵیاندا وێک نایەتەوە ، لەم وڵاتە بندەستە ماف ( پارێزراو ) ەى ئیسلامییدا ، ئەگەر ئیسلامێک کچە فەلەیەک مارە بکات دەبێت کچەکە ئایینى خۆى بگۆڕێت ئەوسا مارەى دێت ، لێ کچە ئیسلامێک کوڕە مەسیحییەک بکات بە دڵخوازى خۆى حومکى مڵپەڕاندن بە شیرى دەستى ئیسلامییەکانى بۆ لەکاردا دەبێت و کەچى بێشەرمانە باس لە ڕێزگرتن لە عەقیدە و ئازادى و پاراستنى مافى مرۆڤ دەکەن ، جەهالەتى ئیسلامییەکان زۆر بێباکانە ڕێگە بە فرەژنى و گەورە بە بچووک و مارەبڕینى منداڵى ناو بێشکە دەدات ، لەولاشەوە باس لە دادپەروەریى کۆمەڵایەتى دەکەن ، مەخسەرەکە لەوەدایە فاکتەرى پێشکەوتنە زانستى و کۆمەڵایەتییەکانیش دەگێڕنەوە بۆ خۆیان !

میانڕەو و توندڕەو لە ئیسلامدا نیە ، چونکە هەموویان لە یەک سەرچاوەوە ئیلهام وەردەگرن و شەریعەت بە دایکى یاساکان دەزانن ، ئەوانەى ئەمڕۆ توندڕەون زۆر باشترن لەوانەى خۆیان بە میانڕەو پیشان دەدەن ، چونکە بوێرانە ناوەڕۆکى بەرنامە و ئامانجەکانیان دەخەنە ڕوو ، فێڵ لە بەرامبەر ناکەن و ڕاشکاوانە باس لە دەوڵەتى خەلافەت و کۆتکردنى مرۆڤ و ئازادییەکانى دەکەن و بێبڕوایى خۆیان بە کۆمەڵگەى مەدەنیى دەردەبڕن و ڕاشکاوانە لە سەر وشەى ( جێندەر ) ژاوەژاو دەکەن و لە ئاستى قڕکردنى گەریلا شۆڕشگێڕەکان قڕوقەپیى هەڵدەبژێرن ، هەرچى ( میانڕەو ) ەکانن وەکو مارى پەپکە خواردوو بە دواى هەلێکدا دەگەڕێن تا ژەهرى کوشندەیان لە جەستەى خەڵکدا بەتاڵ بکەنەوە ، بە فێڵ و فەرەج ڕەفتار دەکەن و سیماى ڕاستەقینەى خۆیان حەشار دەدەن ، لە هەموو حاڵێکدا هەردولایان ، شەریعەتى ئیسلامیى بەرنامەیانە و دامەزراندنى دەوڵەتى دینیش ئامانجیانە و لە پەنهانى تاریکەوە سەرقاڵى بنیاتنانى دنیایەکى تاریکترن .

کارەساتەکە لێرەوە دەست پێدەکات کە دەسەڵاتدارانى عەوداڵ بە دواى گەندەڵیى و ناعەدالەتى ، کەشێکى لەباریان ڕەخساندووە بۆ هەڵێنانى گەراى ئیسلامى سیاسیى ، لە ئاکامى ڕەفتارى دەسەڵاتداران ، ئینتیماى نیشتمانیى دادەکشێ و نامۆبوون ( اغتراب ) لە نێو چین و توێژە نەدارەکانى کۆمەڵگا بە تایبەتى گەنجاندا هەڵدەکشێ ، لە ئاکامدا ئیسلامى سیاسیى دزە دەکاتە نێو هاوکێشەکە و دەبێت بە ژمارە ، ئەگەر بێت و دەسەڵاتداران بە مکوڕییەوە بەخۆداچوونەوە نەکەن و پێداگریى نەکەن لەسەر دابڕانى حیزب لە حکومەت و شەریعەت لە دەستور و یاساکان ، ئەسپى چاکسازى لە مەیدانى گەندەڵیدا تاو نەدەن ، بە دادپەروەریى جێگە لێژ نەکەن بە ( زۆرى لە بەرهەم و خراپى لە دابەشکردن ) دا ، دەبێت چاوەڕێى نەک سوتاندنى دوکانى مەیفرۆشیى بەڵکو مەیفرۆشان خۆیان و زیندە بەچاڵکردنى ئەو کچانەش بکەین کە ناویان ( مەى ) ە ! ئەمەیە کۆمەڵگەى مەدەنییەت کە ئیسلامى سیاسیى لاف و گەزافى بۆ لێدەدەن .

ماڵپه‌ڕی هیوا ره‌ش