١٨\١\٢٠١٣
نەتەوەپەرستیی و
دین هیچوپووچترین هەست و باوەڕی دژەمرۆیین!
عوسمان رەحمانی
نەتەوەپەرستیی و دین، بە تایبەتی لە ماوەی ٤ دەیەی رابردوودا، هۆکاری
کوشتار، ئاوارەیی، دەربەدەریی، سووکایەتی، ریسواکردن، پاکسازیی
نەتەوەیی و دینیی هەزاران ملیۆن مرۆڤ بووە و هەیە لە سەرتاسەری جیهاندا.
سەرانی نەتەوەیی و دینیی، بە بەکارهێنانی هەڵاواردن و نابەرابەریی
کۆمەڵاێەتی و ئابووریی و کولتووریی تەنها لەبەر وابەستەبوونی نەتەوەیی
و دینیی، مرۆڤەکانیان لە هەست و باوەڕی کوێری دژەمرۆیی دینیی و
نەتەوەپەرستیی و ڕەگەزپەرەستیدا نوقم کردوە و خاڵی هاوبەشی مرۆیی و
رەوشتیی مرۆییان لێ وەرگرتوونەتەوە. ئەم سیاسەت و هەست و باوەڕە
دەستکردانە مرۆڤەکانیان بەرانبەر بە یەکتر راگرتوە و بوونەتە هۆی
دووبەرەکێ و دوژمنایەتی و مرۆڤایەتییان لە مەرگ و بەدبەختیی و کوشتار و
خوێندا نوقم کردوە.
هەڵخڕاندنی هەستی نەتەوەیی و دینی لە لاێان هەلپەرستانی دەسەڵاتدار و
دەسەڵاتخوازی سەرمایەدارنی نەتەوەیی و دینییەوە، بووەتە هۆی رووودانی
بەردەوامی شەڕی خوێناوی و رۆژانە گیانی خەڵکی بێتاوان دەگرێ و شار و
گوند و وڵاتان خاپوور و نابود دەکا. شەڕی نەتەوەیی و دینیی لە
سکاندیناوی، ئەرمەنستان و ئازەربایجان، ئەفغانستان و چیچان، ئەندونزیا
و کەشمیر، ئەفریقا و وڵاتانی عەرەبی، ئێران و عێراق، تورکیە و دەکرێ
بڵێین هەموو جیهان، مەرگ و خوێن و ئاوارەیی و برسیەتی کردوەتە ڕۆتینی
ژیانی رۆژانەی ملیونان مرۆڤ.
ئەم تەقینەوانەی کەرکوک و دوزخورماتوو، تەنها بەشێکی بچووکن لە کوشتاری
رۆژانەی مرۆڤەکان کە بەرهەمی هەستی هیچوپووچیی نەتەوەپەرستیی و دینن و
ئاوا دڕندانە و شەلم کوێرم ناپارێزم تیرۆر و کوشتار دەکن. ئەم
تەقینەوانە بەرهەمی فدرالیسمی ساختەی نەتەوەییە و دینی کە راستەوخۆ
دەستی خودی سەرانی حیزب و گوروپە نەتەوەیی و ئیسلامیەکانی تێدایە.
سەرانی کورد و عەرەب، سەرانی دینی ئیسلام بە شێعە و سوننەێەوە، هەم لە
ناڵ دەدەن و هەم لە بزمار. لە لاێەک دەوڵەتێکی فدرالیان پێکەوە پێک
هێناوە و پێکەوە کۆمەڵانی خەڵکی کرێکار و زەحمەتکیش و ستەمکێشی عێراق و
کوردستانی پێ سەرکوت و دەمکوت دەکەن، لە لاێەکی دیکەوە خەڵکی خۆیان بە
پشت بەستن بە هەستی کۆنەپەرەستانە و سەخیفی نەتەوەپەرەستی و ئایینی کە
دەستکردی خۆێانە، بەرداوەتە گیانی یەکتر بۆ وەرگرتنی ئیمتیاز لە یەکتر
و پتەو کردنەوەی دەسەڵاتی ستەمکارانە و چەوسێنەرانەی چیناێەتیان. لەم
نێوانەدا ئەوەیکە وا بووەتە قوربانی و رۆژانە کوشتار دەکرێ، منداڵی
دەکوژرێ و بە کۆمەڵ لەت و کوت دەکرێن، سەرماڵی تاڵان و ئاوار دەکرێ،
خودی ئەو خەڵکەیە کە فریوی ئەم هەست و باوەڕە دژی مرۆییەی نەتەوەیی و
دینی خواردەوە و بە دەستی خۆێان یەکتری نابود دەکەن لە پێناو قازانج و
بەرژەوەندی سەران و دەسەڵاتدارانی خۆیاندا، سەران و دەسەڵاتدارانێک کە
لە کۆمەڵگاکانی خۆشیاندا بە دڕندانەترین شێوە خەڵکی خۆیان دەچەوسێننەوە
و سەرکوتیان دەکەن.
ئەم تەقینەوانە و هەڕەشەی شەڕ و سنگەر لە یەک گرتنەی دەسەڵاتدارانی
عێراقی و کوردستانی، تەنها سیناریویەکی ڕیاکارانەی داڕێژراوە بۆ فیودان
و چەواشەکاریی خەڵکی ستەمکێش و چەوساوەی عێراق و کوردستان. ئەم
تیرۆرانە سیاسەتی خودی سەرانی نەتەوەیی و ئیسلامیە بۆ ئەوەی کە بە
ئاسانیی و بێ کێشە لە دزین و تاڵانکردنی سامانی خەڵک بەردەوام بن. ئەمە
سیاسەتی پێکهێنەرانی حکومەتی عێراقی و کوردستانە تا کەس دەرفەتی
بیرکردنەوەی لە سەر مافە مرۆییەکانی نەمێنێ و هەر هەموو لە ترس و بێ
ئاسایشییدا بژین و بەم شیوەێە ڕقی و دەمارگیریی نەتەوەیی و دینی پتر و
بەرینتر بکەن.
هیچ عەقڵێکی سەلیم ناتوانێ ئەم گاڵتەجاڕیە قەبوڵ بکا کە، سەرانی کورد
خۆێان کۆلەکەێەکی بەهێزی حکومەتی عێراقین و پۆستە گرنگ و کلیلیەکانی
حکومەتی عێراقیان بەدەستە، سەرکۆماری عێراق کورد، وەزیری دەرەوەی عیراق
کوردە، سوپاسالاری عێراق کوردە بەڵام سوپای عێراق هەڕەشە لە کوردستان
دەکا؟
(رۆناکبیران)ی نەتەوەیی کورد کە زۆر خۆیان زۆر پێ سیاسی و شارەزا و
هوشیارە، ئاگاهانە یان نائاگاهانە بونەتە مقاش و بووقی ئەم سیاسەتە
دژەمرۆییەی سەرانی حیزبە دەسەڵاتدارەکانی عێراق و بەردەوام خەریکی
دنەدان و هاندان و بەهێز کردنی نەفرەتی نەتەوەیی و دینیی خەڵکی کرێکار
و زەحمەتکێش و چەوساوەی کوردستان و ناوچەکەن. وەک میراوێکی لێهاتوو
بەردەوام ئاو بە ئاشی فاشیسم و ناسیونالیسم و دین و خورافەی
سەرماێەدارنی ستەمکاری ناوچەکەدا دەکەن.
هەتا ئەم شاعیر و نووسەر و ئەدیب و هونەرمەندانە نەتەوەییانە پێشرەوی
خەڵکی کوردستان و ناوچەکە بن، بە دڵنیاییەوە دەبێ رۆژ لە دوای رۆژ پتر
چاوەڕوانی تیرۆر و کوشتار و خوێنڕشتن و کاولکاری بن! تەنها ڕێگای
چارەسەری ئەم بارودۆخە پڕ لە ترس و نائومێدی و کوشتارانە، یەکەیەتی و
یەکگرتنی خەڵکی چەوساوە و جەماوەری کرێکار و زەحـەتکێشی بەشمەینەتە بۆ
پێکەوە ژیان و ئاشتی و خەباتی چینایەتی لە دژی دەسەڵاتی مافیاکانی
نەتەوەیی و دینی.
osman_r@hotmail.no
|