په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٨\٩\٢٠١٦

پەیامێک بۆ رای گشتی.

 


ئێمە وەک بزاڤی پێشەنگ کە گرووپێکی ڕەوەندی کوردین لە تاراوگە، نیگەرانی خۆمان ئەخەینە ڕوو، سەبارەت بەم بار و دۆخە ناجێگیرەی کوردستان بە گشتی و باشوور و ڕۆژئاوا بە تایبەت. درک بە سیاسەتی بەرژەوەندیخوازانە و هەمیشە لە گۆڕانی زل هێزەکانی دنیا و ناوچەکە لە لایەک و هەڵوێستی دوژمنکارانەی دەوڵەتانی داگیرکەری کوردستان دەکەین، لەبەردەم گۆڕانکاری یەکجار خێراو بە پەلەداین، بۆیە بە گرنگ و پێتڤی دەزانین بانگ لە هەموو تاکێکی کوردستانی، پارت، ڕێکخراوە و گرووپی سیاسی، پیشەیی، کۆمەڵایەتی و بە تایبەتی کوردانی تاراوگە بکەین، لە ئامادەباشی تەواو دابن بۆ هەر ئەگەرێکی نەخوازراو. بۆ ئەنجامدانی کار و چالاکی سیاسی، هونەری و ڕۆشنبیری بە شێوازی دیموکراسی و سەردەمیانە، بۆ بەدەست هێنانی پاڵپشتی سیاسی و جەماوەری لە گشت ووڵاتانی دنیا و بە تایبەت لە ئەوروپا و ئەمریکا، لە ئەگەری هەر گۆڕانکارییەکی نێگەتیڤ و نەخوازراوی دژ بە دەسکەوتەکانی خەڵکی کوردستان. بۆ پێش گرتن لە ڕوودانی هەر کارەساتی تر بەسەر نەتەوەکەماندا. هەرواها وەک گەورەترین گەلی بێ دەوڵەت لە ڕۆژگاری ئەمڕۆ، بە گوڕ و تینێکی نوێ، بوونی خۆمان بە دونیا ئاشنا بکەین ئیتر سەردەمی گەلەکۆمەکی نێونەتەوەی بەسەر کوردستاندا تێپەڕیوە و نابێت پێگە و هێزی کوردستان لە ڕۆژهەڵاتی ناوەڕاست لەبەرچاو نەگیرێت.


گەلی ئێمە سەلمانویەتیی پێشەنگە لە خەبات و بەرخۆدان بۆ ئازادی، دادپەروەری و بەرگریکردن لە مافی مرۆڤ لە سەنگەری هەرە پێشەوەی بەدژ داچونەوەی تیرۆری و گرووپە توندڕەوەکان وەک داعش و هاوشێوەیان بووین و دەبین. پێویستە گەلی ئێمە لە پێشهاتی هەر پلان وگەلەکۆمەیەک کە هەڕەشە لە بوون و خەونی نەتەوەیمان دەکا بە ئاگا بێت،بە یەک ڕیزی وهاوبەشی لە سەنگەردا دژی بووەستین. بۆ هەمان مەبەست داواکارین لە سەرکردەکانی باشووری کوردستان، بێ شەن و کەوکردنی بیر و ڕاکانیان، بچنە گفتووگۆوە و چارەی هەنووکەیی وخێرا بۆ کێشەکان بێننە کایە، تا باشوور بتوانێت، لە ڕۆڵی پارسەنگیدا بۆ کوردستان بمێنێتەوە.


بژی ئازادی بژی ماف و داد بژی یەکسانی.

وێنەیەک بۆ:
سەرۆکایەتی هەرێمی کوردستان
پەرلەمانی باشوو و ڕۆژئاوای کوردستان
سەرۆکایەتی حکومەتی هەرێمی کوردستان
هەموو پارت و حزبە کوردستانیەکان
تەواوی دام و دەزگای میدیایی بینراو و بیسراو خوێندراو

 

دەستەی راگەیاندنی بزاڤی پێشەنگ
٤\٩\٢٠١٦


sarkash@hotmail.se

 

 


 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک