راگەیەنراوى
کۆتایی کۆنفرانسى بزووتنەوەى دیموکراسیخوازانى کوردستان .
جەماوەرى بەشەرەفى کوردستان
هێز و لایەنە سیاسییەکان
دواى ئەو کێشانەى بۆ دیموکراسیخوازان دروست کراو دواتریش بووە هۆى
کەرتبونی حیزبەکە ، بەلاى زۆرینەى کادیرانى ئەم بزووتنەوەوە کۆنفرانسى
خۆڕێکخستنەوە بۆ ئەمڕۆى دیموکراسیخوازان پێویستە ، ئەوەبوو ڕۆژى
26/10/2007 بە ئامادەبوونى نوێنەرانى ڕێکخستنەکانى زۆربەى شارو
شارۆچکەکانى کوردستان کۆنفرانس بەسترا، سەرەتاى کۆنفرانس بە دەقیقەیەک
وەستان بۆ گیانى پاکى شەهیدان دەستى پێ کرد ، پاشان نامەیەکی مامۆستا (
بە هادین نورى )خوێنرایەوە کە وێڕاى هیواى سەرکەوتنى بۆ کۆنفرانس چەند
سەرنج و تێبینى و ڕەخنەیەکى ئاراستەى کۆنفرانس کردبوو .
دواتر ڕاپۆرتى سیاسی کۆنفرانس گفتوگۆى لەسەر کرا کە بەشێکى زۆرى کێشەو
گیرو گرفتەکانى ژیانى سیاسی و حزبایەتى ئەمڕۆى کوردستانى لە خۆگرتبوو ،
تاڕادەیەک کۆدەنگی هەبوو لەسەر ئەوەى کە ژیانى حزبى و سیاسی کوردستان
لەم قەیرانەى ئێستاى پێویستە ڕزگار بکرێت و بە پێی یاسای حزبەکان
ڕێکبخرێتەوەو هەوڵى خولقاندنى هاودەرفەتى بۆ هەموو هێزە سیاسیەکان
بڕەخسێنرێت . هەروەها کۆنفرانس جەختی لەسەر پەیوەندی دۆستانەى نێوان
دیموکراسیخوازان و سەرجەم لایەنەکان کردەوە لەپێناو دروستکردنی کۆدەنگی
نێوان هێزەسیاسیەکان ، ئەمەیش بەئامانجی بەرپەرچدانەوەى ئەو مەترسیانەى
هەڕەشە لەدەستکەوتەکانی گەلى کوردستان ئەکات . هەر لەم بوارەدا بەتوندی
ڕەخنەى لەو بڕیارەى پەرلەمانی تورکیا گرت کە سنوربەزاندنی هەرێمی
کوردستانی بۆلەشکرى تورکیا پەسەند کرد بەبیانوی لێدانی هێزەکانی pkk .
کۆنفرانس پێآ وابوو ئەو هەڵوێستەى تورکیا وەک هەڵوێستى زۆر لەهێزە
سیاسیەکانی ترى عیراق تەنها ئامانجی نکۆڵی کردنە لەمافەڕەواکانی خەڵکی
کوردستان .
کۆنفرانس ئەو پەرتەوازەییەى نێوان هێزە چەپ و لیبرال و
پێشکەوتنخوازەکانی بەزیان بۆپرۆسەى دیموکراسی لەکوردستان لەقەڵەمدا .
بەپێوستى زانی هەرچى زووە ئەم هێزانە لەپێناو بەرەوپێشبردنی خەباتی
دیموکراسیانەو ، نوێنەرایەتى کردنی خەڵکانی هەژارو زەحمەتکێشى کوردستان
لەچوارچێوەى بەرەو پلاتفۆرمی و نوێدا خۆى ڕێکبخات .
بڕگەیەکی ترى ئەم کۆنفرانسە بڕیارى درێژەدان بوو بەکارکردن لەژێرناوى (بزوتنەوەى
دیموکراسیخوازنى کوردستان ) ، چونکە لەدواى کۆنگرەى دووەم کە ناوەکەى
گۆڕى بۆحیزبی دیموکراسیخوازان و وەزارەتی ناوخۆى لێ ئاگادارکردەوە ،
بەم ناوەوە فەرمانی وەزارى لەئەنجومەنی وەزیرانەوە بۆدەرنەچوو ،
لەهەمان کاتیشدا بۆخۆدورگرتن لەهەندێک کێشەى لاوەکی زۆرینەى بەشدارانی
کۆنفرانس بەباشى زانی بۆلەمەولا بەناوی بزوتنەوەى دیموکراسیخوازانەوە
درێژە بەکارەکانی خۆى بدات .
لە کۆتایدا بەئامادە بونی دادوەر و لەپرۆسەیەکی دیموکراسیانەدا
کۆنفرانس دەستەیەکی تازەى بۆ سەرکردایەتی هەڵبژارد . یەکەم کۆبونەوەى
سەرکردایەتی بریارى دا هاوڕێ ( حاجی مەلا سەعید ) بەسکرتێرى بزوتنەوەى
دیموکراسیخوازان هەڵبژێرێت لەگەڵ جێگرى سکرتێر و مەکتەبی سیاسی نوێدا .
کۆمیتەى سەکردایەتى
بزووتنەوەى دیموکراسیخوازانى کوردستان
26/10/2007
|