١٨\٨\٢٠١٣

١٢ی پێشنیوەڕۆ + ١٢ی پاشنیوەڕۆ = ٢٧ دەمژمێر.

هێمن عـوسمان عەبدوڵا

بە "سالار توتمانى" پێشکەشە.

پەیڤێکى نهێنى لە دەرەوەى ئەم چیرۆکە...

ئەم چیرۆکە بۆ خۆت بخوێنەوە و ، پیشانى هیچ کەسى مەدە . بۆ من ئاساییە بۆ تۆ ناگونجێ و خراپ دەشکێتەوە ، ناوى من "میریدا" یە تەمەن و ڕەگەزى خۆم نازانم ، تا ئێستا خۆم ڕووت نەکردووەتەوە جلێکى هێجگار ئەستور و ، قەبە ، بەردەوام لەبەرم دایە ئەمەش بەهۆى ئەو ڕوودوانەى لە ژیانم ڕوو ئەدات بێزارى کردووم . هەڵدێم لەخەو و ، لە بێدارى ، کەیف ساز نیم بە هیچ کامیان ، مژۆڵى ڕووداوى دووبارەى ژیانمم . گەر پێش نیوەڕۆیەک مرۆیەک ببینم و سڵاوێکى لێ بکەم شەویش بەهەمان شێوە و لەهەمان شوێن شتێک ڕوو ئەدات ، گەر سڵاو نەکردنیش بێ لە بیست و چوار کاتژمێردا ، دوانزە ى (A.m) ، هەرچى ڕووبدات لێم بەدرێژایى دوانزە کاتژمێرى (P.m) هەمان شت ڕوو دەدات تەنها کاتژمێرەکان وەک یەک وان ڕووداوەکان جودان ، کاتژمێر سێى نیوەڕۆ باپیرەکەک ووتى کاتژمێر چەندە ؟ کاتژمێر سێى شەو لەخەو لەهەمان شەقەام ڕابووم دەبینم کاتژمێر سێیە و چاوەڕێ بووم ئێستا نا ئێستا باپیرە دەردەکەوێ و دەڵێ کاتژمێر چەندە لێ نەهات و من ڕۆشتمەوە ، ناوێرم بیجامە یان بە شۆرت و فانیلەى بێ قۆڵەوە بنووم دەبێ ڕەچاوى چوونە دەرەوەى بێ ئاگاى شەوانەم بکەم لە بارێکى گونجاو بم.

"ڕووداوەکان لە دوانزە کاتژمێرى (A.m)دا ".

بەدروستى کاتژمێر

 10 : 00 A.m

لەخەو ڕا دەبم ، ژێرم تەڕە و لەکەنار دەریا یان لە ژێر تاوە بارانێک یان لافاوێک بە تەنیشتمدا تێپەڕیوە و لەپاڵیدا نووستبم وا دەردەکەوێ و هیچیان نییە ، گەر بگەڕێى هێندى سەرەدەرزییەک وشکایى لەخوار کەمەرم نابینیتەوە ، بۆێکى ناخۆش ژوورەکەى پڕکردووە ، پێم شەرمە دەستێک بە ژێرمدا بکەم ، بزانم ئەو لافاوە ، ئەو تاوە بارانە ، لەکوێى ئەم دیوار بەندییە هاتووەتە ژێر چرپاکەم ، لەکوێ و چ کەنار دەریایەکدا بووە نوستووم ، ئەو بۆ نە لە زۆر بۆنى پاریسى و ئەمریکى ڕوونترە مەوداێک بۆ شەرم ناهێڵیتەوە ، بەدیار دەکەوآ چرکەساتێکى منداڵییە و ئێستا دووبارە بووتەوە ، دەبێ ئاسایى بێ منداڵیت تێ پەڕاندبێ ، دۆخێک جیاواز لە لێدانى دایک و سەرزەنیشتى باوک و تووڕەبوونى خوشکە تا هەڵخستنى چرپاکەت ، هەموو پەیڤێکى ناشیرین و هەوڵدانیکى بۆ بچوککردنەوەى سایکۆیى کەسێتیت و بەدەمیدا بێ ڕووبدا.

11:6 A.m

لەبەر لاپتۆبەکە دانیشتووم ، چوون باوکم هەوڵى داوە بێتە ئەمدیو ، دایکم تاکە نەعلى تێگرتووم و ، هاورێکانیشم کلکە ماسیحە ، شاشەکە درزى گەوەرى تێبووە ، ڕەش و ، مۆر دەچێتەوە هیچ پیشان نادات .

8 : 00 A.m

هێندێ کتێبم لە بن هەنگڵ ، کڵاوەکەم تا سەر برۆکانم هێناوە ، دەنگێک ئەژنەڤم بێ ئەوەى بیبینم ئەزانم داپیرەمە ، لەم ماڵە جگە لەمن و ئەو کەسى دیکەى تێدا نییە دەڵێ " سەر قوڕاویى دیسان بۆکوێ ؟ ئەتەوێ ئەمشەویش نەیەیتەوە ؟ وەک موعتادەکان لەسەر جادە دەنوویت ، لەداخى ئەم سەرە ڕۆییەیت ، من ڕۆژێ سەرلوتى خۆم ڕەش دەکەم " خەریکم لە دەرگەى کۆتایى و دەرچوون لەماڵ نێزیک دەبمەوە بەدەنگى بەرز دەڵێم "بۆ نەخۆشخانە یان بۆ شکایەت کردن لە بنکەى پۆلیس ".

" بۆ نەخۆشخانە ".

دەزانم شەو لەهەمان کاتژمێر کتوپڕ و ناکا و بەبێ ئاگابوون لێرە دەبم ، چوون بۆ بنکەى پۆلیس دەخەمە داوانزە کاتژمێرى دادێ ، ڕێدەگرم بۆلاى پزیشک لەوێ ، لە نابارى خۆمدا لە هۆڵى چاوەڕوانى کلینیکى پزیشکەکەدا لەگەڵ کەسێک دەیکەمە شەڕ ، جەنابى دکتۆر زوو دەمباتە ژوور ، پیاوێکى کەر دیارە ، چاویلکەیەکى تا سەر لووتى هێناوە ، لە تەماتە فرۆش دەچێ نەک لە دکتۆرى دەروونى ، دەست بە ووشەوە دەگرێ و بە هێما دەپەیڤێ.

"من نەخۆشم یان ئەم کتێبانە؟ یان نووسەرەکانیان ؟ " .

ڕێگە نادەم قسان بکات دیسان درێژەى پێدەدەمەوە:
" یان من ئیحالەى نەخۆشخانەى دەروونى بکە یان نووسەرى ئەم کتێبانە " .

بەجۆرێک لە ووشەکان تێ ناگا ، وادەزانێ بەهەڵە خۆم لە کلینیکە کەیدا کردووە ، گەمژە ، گەمژە ، لەگەڵ قسەکانیدا سەرى بادەدات و دەڵێ " ئەو کتێبانە بخوێنەرەوە ، بە ئیزنى خوا شیفات بۆ دێ " لەوە دەگەم لێم تێنەگەیشت ، ئەو لەمنیش و لە کتێبەکان نەخۆشترە.

3 : 00 A.m

دونیایەکى بێدەنگ ... شەوێکى جوانە ، لەهەمان شوێنم دوانزە کاتژمێر لێى بووم ، بە تەنیشت دیوارى دادگەوە دێمە خوار ، ماڵەوە دوورە تا بۆى بڕۆمەوە .. تا دەڕۆمەوە گەر سڵاوێک یان ڕوداوێک بێتە ڕێم دەبێ لە دوانزە کاتژمێرى دادێ بێمەوە ئێرە ، دەچمە باخى گشتى ، دەستێک بەسەر هەرێزەکەدا دەهێنم بۆێکى خۆش تەڕو شێدارە ، بەکەڵکى خواردن دێ ، هەرچى شت هەیە بەکەڵک دێت من نەبێ " گەر ماڵت نەبێ بۆی بگەرێیتەوە و ،لە کوڵانە سەگێکدا بژیت . ئاساییە گەڵای ئەم درەختانەی لەگەڵ بخۆیت ، سەرم شۆڕ کردووەتەوە ناو کۆشم ، خەریکە ڕۆژ دەبێتەوە ، سەگێک پێم دەوەڕێ ، سەر هەڵدەبڕم بەدەست خانمێکەوەیە ، دووری دەخاتەوە لێم ، وە دووى خۆى دەکات ... تا لەچاوم وون دەبێ ، دەوەستم بێ جوڵە و ، چاوم لەسەری ناتروکێ دێڕیکی ئۆگۆست ستریندبێرگم دەکەوێتەوە یاد "خۆزگە سەگی کەسێک بوومایە و دوای بکەوتمایە ، بۆ ئەوەی قەت بە تەنیا نەمێنمەوە ، جار نا جارێک نەختێک خواردن ، جار و بار شەقێک ، جار نا جارێکیش دەست پێدا هێنان و دووجاریش قامچی ".

خۆزگەێک یان تۆزێک کەیف پێویستە هەبێ ، بۆ درێژە پێدان بە پێوەندییەکی کۆمەڵایەتی ، یان بۆ نووستوون لەپاڵ ڕەگەزێکى بەرامبەر ، یانژى دانیشتن لە دەورى خوانێک من نیمە ، کەواتە تەواو . ئەویش لەدەماغمدا دێت و دەچێ خەریکە دەهریم دەکا ، لەو جۆرە ئەندێشە ئەگەڕێم و خەریکم دەگەڕێمەوە ، ماندووم لەگەڵیشی برسیمە ، تینوومە و ، دەبەێک ئاوم پێیە ئەی بۆ نایخۆمەوە و ، تا تێنوم نەبێ ... ئاوەکە گەرمە کەڵکی تێنو شکاندنی نییە ، دەچمە دواوەی پاسەکە شۆفێرەکە نا ، ئەو پیاوەی پارە کۆ ئەکاتەوە تەماشای من ئەکات، بە جۆرێک وادەزانێ من لە مرۆڤێکی باش ، زۆر ماقول ئەچم دەڵێ "بەڕێز ئەوە لەو جێگەیە هەڵدەسی تا ئەو عایلەیە دانیشن ...".

هەموو ئەو بۆچوونە باشانەی کابرا لە ڕووکەشدا لەسەر من بۆی دروست بووە ، پێچەوانە دەکەمەو و دەڵێم "من ناتوانم ئینسانێکی ئەوەندەباشبم تا جێگەی خۆم بەوان بدەم" .

من نەباشم نە مرۆڤێکی باشم.

"ڕووداوەکان لە دوانزە کاتژمێرى (P.M)دا".

بە دروستى کاتژمێر

10 : 00 P.m

خەریکم هەستم ، وەک لەزگەێکى بەهێزگرتبمى لە جێگە نوێنەکەم نابمەوە ، خەو بەرى نەداوم ، دوانزە کاتژمێرە ژێرم تەڕە . دەمەوآ هێندێکى دیکە سەر بە ژێر بەتانییەکەمدا بکەمەوە تەڕى و بۆنى پیس ڕێگە نادا ، گەر خۆم نەبم هەرکەس ئەو بۆنەى لێبێ هەردوو کونە کەپووم بە چیمەنتۆ پڕ ئەکەمەوە ، تا بتوانم دوورى لێ ئەگرم ، چرپاکە هەڵدەگرم ، بەخێرایى فرتە ئەکەم بۆ سەربان بە تەنافەکەیدا ئەدەم ، دێمەوە ژوور، لاپتۆبەکە دا ئەگیرسێنم ، ئەمەوێ نامەیەکت بۆ بنووسم و ڕووداوەکە سادە بکەمەوە ، لەگەڵیشى هێندێک پێبکەنم " خۆشە گەر جار ، جار ، بە میزبەخۆداکردنێکیش بێ بگەڕێیتەوە بۆ منداڵى " بۆم نانوسرێ ، پەنجەکانم لەسەر پیتى لاپتۆبەکە خۆى ڕاناگرێ ، ووشەکان تێکەڵئ ئەبن ، هیچیان لێ دەرناچێ ، دەترسێم بەهەڵە شتێکى دى دەربارەى " ئەو خوخدە خراپەتەوە بنووسم بە تیڤى یەکەوە گرتووتە ، کە ئامادەیت بەدیار درامایەکەوە بمریت ، تا دەرگە نەچیت و تەماشاى سندوقى پۆستەکە نەکەیت ، بزانیت نامەى منى تێدایە بۆ تۆ یان نا... " چى دەکەیت ؟ قامکم هەر ئەو ووشانە دەزانێ بنووسێ ... بەم مانگى تەممووزە لەرز دایگرتووم ، فێنککەرەوەکە خامۆش دەکەم ، چاکەت و بلوسێکى ئەستوور بەسەر جلە ئەستورەکانى بەرمدا ئەکەم ، بە بەتانییەکەوە دەچمە بەلەکۆنەکە ، بە چیچکانەوە وەک پیرە مرۆڤێکی ئیماندار"حى اللە" دەکات خۆم بە پشت و پاشدا ئەخەم ، چۆقە چۆقى ددانم حەوت گەڕەک نا ، یەک دوو کۆڵان ئەولاترى خۆمان ئەڕوا و چاوەڕێ ئەکەم بێن، لەدەرگە بدەن و بەم شەوە بەئاگایان بهێنم و بڵێن "ئەوە چ هەرایەکە لەسەربانى ئێوە؟ ".

11:6 P.m

لەئەنجامى ئەو سوڕانەوە بێ هەژمارەى زەوى دەگەڵ خزم و ئاشنایانم لێک دوورکەوتینەوە ، لێ دەگەڵ دروست بوونى ئەو حەمکە شاشە بێ هەژمارە توانیومە ، مامم لە ئەڵمانیا ، خاڵۆم لە بەریتانیا ، کوڕى پورم لەپرتوگال ، کچى مام لە ئەرجەنتین ، باوکم لە کەنەدا ، دایکم لە ڕووسیا و ، هاوڕێکانم لەم وڵاتانەى دەرووبەر بدۆزمەوە ، شەوانە لە ڕێگەى شاشەوە دەردەکەوین و دەپەیڤین ، لەوەتەى شاشە کۆى کردووینەتەوە ناکۆکییەکان زیاد بووە ، دڵمان لەیەک پیسە و لەناو خۆمان لەسەر میراتى دەبێ بەشەڕ، هیچ دەرکەوتنێک نییە بێ دەمەقاڵێ و ، قسە هەڵبەستن بۆیەک و ، گێڕانەوەى لاى یەکێکى دیمان. شەوێک تێ ناپەڕێ جنێو بە مامم نەدەم ، میلى دەمانچە لە خاڵۆم دەهێنمەوە ، ڕووە و کچە پورم دەیچرکێنم ، هەزار چووک بە قوونى کوڕى مام دەنێرم ، باوکم دەیەوێ لە شاشەکەوە بۆم بێتە ئەمدیوو ، دایکم لە دوورەوە تاکە نەعلم تێ دەگرێ ، هاوڕێکانیشم دار ماسیحەم بۆ هەڵدەگرن لێم بدەن . دەبینم شاشەیە بۆ حیکەمەتەکانى ستایشى ئەکەم کە ڕێگە نادا دەستى ئەوانم پێ بگات ، ئۆخژەنێک دەکەم . سوێند دەخۆم داهۆڵێک سەد هێندە لە مرۆڤى بەر شاشە چاترە . ئێمە شاشە کۆیکردوینەتەوە ، ئێَمە ... "کۆ"یــَکى ناکۆکین .

8 : 00 P.m

."بۆ بەندینخانە" .

بەرەوە بنکەى پۆلس رێم گرت ، خەریکم سکاڵاى یاسایى تۆمار ئەکەم ئەفسەرى لێکۆڵەر گوێم لێدەگرێ " قوربان ... یان من لە بەندێ بکەن ، یان نووسەرى ئەم کتێبانە ، بە جۆرێک ژیانى منیان تێک نەداوە ، گۆڕیوە بە جۆرێکى زۆر خراپ " زۆر بەهێواشى خەریکە ناوەکانیانم لێوەر دەگرێت و لەگەڵ نووسینیاندا دەڵێ " بەخوا ڕاست دەفەرمووى ئێمەیش گیرۆدەى دەستى ئەمانەین " .

ئۆخژەنێک دەکەم و بە خۆم دەڵێم ئەمیش دەیانناسێ پێدەچێ خوێنەرێکى باش بێ ، درێژەى پێدەدات " ئا ڕامبۆ ... ئەو هەتیوە چەقۆ وەشێنە پێ پەتییەکەیە ، کەس نازانێ کێ خاوەنییەتى ، ڕۆژ نییە لەگەڵ چەند کەسێک بەشەڕ نەیت ، کافکا کوڕە گەنجەکە هەموو ڕۆژێ شارەوانى خۆى و شمەکە هەڕاجییەکانى ڕاو دەنێ ، دۆستۆیڤسکى ئەوە پیاوە پیرە پاقلە فرۆشەکەیە باشە مرۆڤێکى بێ وەیە دەبێ چى کردبێ؟" ، " قوربان زۆر شتى کردووە.. " .

قەڵەمەکەى مرەکەبى تێدا نامێنێ ، چەند جارێک بە مێزەکەیدا دەکێشێ ، داوا دەکات بۆى بگۆڕن ڕوو دەکاتە من و دەڵێ فەرموون ئەوانى دیکە کێن ، لەگەڵ ناوهێنانى ئەوانى دیکە دیسان لەبەر خۆیەوە قسان دەکا "بۆرخیس .. ئایى لەم پیرە هەتیو بازە ، بەخوا دەبێ دار لە قونى ببڕم ، تەمبێى بکەم بۆت . مارکیز .. ئەوە پیاوە فیعل چییەکەیە ، لەگەڵ سەدان ئافرەت سێکسى کردووە ، دەبێ بە گوون هەڵیواسم بۆت . سادقى هیدایەت ... سەر با ئەدات و" ئاهــ ێک دەکات.. لەمێژە بە شوێن ئەم تلیاک کێشەدا دەگەرێم ، بیگرم دەبێ کارەبا لە زووبانى بدەم ".

دەست دەخاتە سەر شانى من و دەڵێ " ئێوە ئێستا دەتوانن بڕۆن .. بەڵێن بێت سەرجەمیان بهێنمە ئێرە و پشتیان بشکێنم ئەمانە چۆن دەتوانن تەداخولى ژیانى خەڵک بکەن "سوپاسگوزارى ئەفسەرەکە دەبم و دێمە دەرەوە .

3 : 00 P.m

لە تەنیشت دیوارى دادگەوە دێمە خوارێ بە هەرکەس دەگەم:
"سڵاو .. بێ ئەرک .. موو هەڵکێشت پێیە؟".
" تێکچوویت ؟".

ئەو پەیڤانەى دادوەر لە زارى دەهاتنە دەر لەناو گوێم ماوەتەوە و ئازارم ئەدات ، دادگە شوێنێکە تەنها بۆ جیابوونەوە ، بۆ گرێبەستى پێکەوبوون نابێ ، ئێمە ماویەکى زۆر پێکەوە بووین ، بێ ڕەزامەندى هیچ نووسراو ، دادوەرێک بوو . ئێستا چاترە بێ هیچ نووسراوێک لێک جیا بینەوە و ، منت خۆشنەوێ چوون ناتوانم باوکی منداڵت و ، هاوسەرت بم بەهۆی ئەو ئازارە زۆرەی هەمە ، شەوان لە ناو چرپاکەم خۆم ناگرم دەست و قاچەکانم بە هەرچوار لا دەوەشێنم ، گەر بێت و لەتەنیشتم بیت زەبرێک بەر سکت دەکەوێ ، زیان بە دووگیانییەکەت دەگەیەنێ ، دەبینە بکوژی کۆرپەیەک ئەوکات لێک جیا دەبینەوە ، چاتر وایە لە ئێستاوە لێک جیابین ، سەرقاڵبوون بە نووسین و خوێندنەوە ئەوەی باشە گیرۆدەی بوویت ، تا ئەبەد ئازارت ئەبێ ، بەو هۆکارەیش ناتوانی ببیت بە باوکی هیچ منداڵێ ، هاوسەری هیچ ڕەگەزێکی بەرامبەر ، ئەتوانم هاوڕێت بم ... دوور و دۆست سڵاوێک لەنێوانمان هەبێ ، لەکاتی سێو پاککردن ئەودەمەی قامکی خۆم دەبڕم ، خوێنی لێ دەتکێ تۆم بیر بکەوێتەوە و تەلەفونت بۆ بکەم و بڵێم " ئیستا یش وەک جاران خۆشت دەوێم ؟ منداڵەکەى ناو سکت ماوە ".

تەلەفونەکە دادەخەمەوە و بیرم دەچێ پێت بڵێم: ئۆهــ چەند گرانە باوک بیت وەک باوکی من!

دووەم پەیڤى نهێنى لە ناوەڕۆکى چیرۆکەکەوە...

بە تەنێ لەگەڵ داپیرەم ئەژیم ، لەگەڵ خێزانم جیابوومەتەوە ، دوورم لە گشت ئاشناێک ژیانم لێ بووتە ژەقنەمووت گیرۆدەى ئەو نەخۆشییەم هێندێجار بە ئاگا و هێندێجار نا ئاگا لە کاتژمێرە دووبارەکاندا دەچمەوە شوێنى ڕووداوەکان . ماوەێکى زۆرە چەند ماهێک دەبێ تاقەتم لە ڕێگرتن چووە و لە ژوور لەبن تاریکى لێى ڕاکشاوم ، زانیومە ئەفسەرى لێکۆڵەرەوە بە فەرمانى دادگە بەهەردوو تۆمەتى " گەر هاوسەرگیرى بکەم ئەوا زەبرێک بەسکى هاوسەرم دەخەم و منداڵى لەبار دەبەم و ، ناوى هێندێک کەسایەتیم داوە بە بە بنکەى پۆلیس کە ئەوان لە ژیان نەماون وتەنها کت]بیان دەست دەکەوآ ، پێیان وایە من بەرامبەر بە یاسا شۆخیم کردووە " بەدوامدا دەگەڕێن و دەیانەوێ دەستگیرم بکەن چەند ڕۆژ ئەوان بە خۆیان و فەرمانیان دێن من لەنێو تانکى سەربان خۆم حەشار دەدەم ، هەموو شەوێ کە دەنووم ئەفسەرەکە دێتە خەونم و دەڵێ " لە هەرکوێ بتگرم دەبێ دار لە قونت ببڕم و بە گون هەڵتواسم و کارەبا لە زووبانت بدەم و پشتت بشکێنم " ئیدى بەیانیان کەلەخەو ڕادەبم دەڵێى لافاو هاتووەتە ژێرم یان باران لەسەرم نا لە ژێرمدا دایکردوو و چرپاکەم بەجۆرێک بۆنى پیسى لێدێ کە بە دەریایەک ئاو پاک نابێتەوە.

ماڵپەڕی هێمن عوسمان عەبدوڵا