په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١١\١٠\٢٠١٩

١٧ حوشتر و ٣ کوڕ.

وەرگێڕانی: محەمەد بەرزی


منداڵە زیرەکەکان : لە سەردەمێکی زۆر کۆندا و لە گوندێکی دووری ناو بیابانێکدا، پیاوێکی پیر لەگەڵ سێ کوڕی خۆیدا پێکەوە دەژیان . ئەم پیاوە پیرە حەڤدە حوشتری هەبوو ، کە سەرچاوەی بژێوی ژیانیانبوو . ئەم حوشترانەی بە کرێ دەدا بە خەڵکی بۆ گواستنەوەی کەلوپەلەکانیان لە ناو بیابانەکەدا . ڕۆژێک لە ناکاو ئەم پیاوە پیرە مرد و لە دوای خۆشی وەسێتنامەیەکی سەیری بۆ کوڕەکانی بەجێهێشتبوو.

 
پاش تەواوبوونی پرسەکەی ، کوڕەکانی وەسێتنامەکەیان خوێندەوە ، تەماشایانکرد باوکیان حوشترەکانی بە سێ بەشی یەکسان بە سەریاندا دابەش نەکردبوو ، جا چونکە ( ١٧ ) بە سەر ( ٣ ) دا بە یەکسانی دابەش نەدەبوو ، ئەو هاتبوو بەمجۆرەی لای خوارەوە دابەشیکردبوون :نیوەی ( ١ ٢ ) ی حوشترەکانی بۆ کوڕە گەورەکەی دانابوو.


یەک لەسەر سێی ( ١ ٣ ) ی حوشترەکانی بۆ کوڕە ناونجییەکەی.
یەک لەسەر نۆ ( ١ ٩ ) ی حوشترەکانیشی بۆ کوڕە پچکۆلەکەی.
بەڵام ئەوەی لە هەموو شتێکیش سەیرتر بوو ، لەم حاڵەتەدا ژمارە ( ١٧ ) بەسەر ( ٢ و ٣ و ٩ ) دا دابەش نەدەبوو.
هەموویان لەم دابەشکردنە سەیرە حەپەسابوون ، نەیاندازانی چۆن چۆنی( ١٧ ) دابەش بکەن بەسەر ( ٢ ) دا تا بەشی برا گەورەکەیان بدەن ، چۆن ( ١٧ ) دابەش بکەن بەسەر ( ٣ ) دا تا بەشی برا ناونجییەکەیان بدەن ، چۆن چۆنیش ١٧ بەسەر ( ٩ ) دا دابەش بکەن تا بەشی برا پچکۆلەکەیان بدەن.


چەند ڕۆژێک ویستییان ( ١٧ ) حوشترەکە وەک وەسێتەکەی باوکیان دابەش بکەن ، بەڵام هەرچەند بیریاندەکردەوە تەقەی سەریاندەهات و نەیاندەتوانی. پاشان بە ناچاری چوون بۆ لای پیاوێکی زیرەک و زانای گوندەکەیان ، تا لە دابەشکردنەکەدا یارمەتییان بدات ، ئنجا چوون زۆر بە وردی کێشەکەیان بۆ باسکرد. پیاوە بلیمەتەکە ، لە دوای ئەوەی بە جوانیی گوێی بۆ کێشەکەیان شلکرد ، چارەسەرێکی ئاسانی بۆ دۆزینەوە . هەر بۆیە بە ڕوویەکی خۆشەوە وتی:

ئێستا بڕۆن هەر ( ١٧ ) حوشترەکەتانم بۆ بهێنن بۆ ئێرە.

کوڕەکانیش بە خێرایی چوون و هەر ( ١٧ ) حوشترەکەیان هێنایە بەردەمی ماڵی پیاوە زاناکە. ئنجا ئەم پیاوە زیرەکە چوو یەک حوشتری خۆشی هێنا و خستییە پاڵ ( ١٧ ) حوشترەکە و ژمارەیان بوون بە ( ١٨ ) حوشتر.. پاشان پیاوەکە بە کوڕە گەورەکەی وت:

ئادەی لە وەسێتنامەکەی باوکتدا بەشەکەی خۆتم بۆ بخوێنەرەوە ، کوڕە گەورەکەش تەماشای وەسێتنامەکەیکرد و وتی : بەشەکەی من نیوەی حوشترەکانە . پیاوە پیرەکە وتی:

کەواتە بەشەکەی تۆ دەکاتە : ( ١٨ ٢ ) ، واتە ( ٩ ) حوشتر.

هەر لە وێدا ( ٩ ) حوشتری دایە دەست کوڕە گەورەکە و وتی:

ئەوە بەشی تۆیە و لە کۆی حوشترەکانیش ( ٩ ) دانەی ماوەتەوە.

ئنجا پیاوە زاناکە ڕوویکردە کوڕە ناونجییەکەیان ، تا وەسێتنامەکەی باوکی بخوێنێتەوە . ئەویش وەسێتنامەکەی خوێندەوە و وتی:

بەشی منیش یەک لەسەر سێی ( ١ ٣ ) ی حوشترەکانە.

پیاوە زیرەکەکە ( ١٨ ) ی دابەشکرد بە سەر ( ٣ ) دا و کردییە ( ٦ ) دانە حوشتر ، هەر لە وێدا شەش حوشتریشی دایە دەستی و وتی:

ئەمەشیان بەشی تۆیە.

بە مەش کۆی حوشترەکانی کوڕە گەورەکە و کوڕە ناونجییەکە بوون بە: ( ٩ + ٦ = ١٥ ) حوشتر و هێشتا ٣ حوشتریشی مـابـۆوە. پاشان ڕوویکردە کوڕە پچکۆلەکە وتی:

دەی فەرموو تۆش وەسێتنامەکەی باوکتم بۆ بخوێنەرەوە.

کوڕە پچکۆلەکەش کەوتە خوێندنەوەی وەسێتنامەکەی باوکی و وتی:

بەشی من دەکاتە یەک لەسەر نۆ ( ١ ٩ ) ی کۆی حوشترەکان. پیاوە زاناکە ( ١٨ ) حوشترەکەی دابەشکرد بە سەر ( ٩ ) دا و کردییە ( ٢ ) حوشتر ، هەر لەوێدا ( ٢ ) حوشتریشی دا بە کوڕە پچکۆلەکە. ئنجا پیاوە زاناکە وتی:

بەشی هەرسێکتان کردییە : ( ٩ + ٦ + ٢ کە یەکسانە بە ١٧ حوشتر ) و یەک دانەش لە ( ١٨ ) حوشترەکانیش ماوەتەوە ، ئەوەشیان حوشترەکەی خۆمە و بردییەوە بۆ ماڵی خۆیان.

بەمجۆرە ئەو پیاوە دانا و زیرەکە توانی زۆر بە ئاسانی ئەو کێشەیەیان بـۆ چارەسـەر بکات.


جا منداڵە خۆشەویستەکان ئەگەر بە وردی بیربکەینەوە ، ئەوا دەتوانیین بۆ هەموو کێشەیەک چارەسەرێکی گونجاوی بۆ بدۆزینەوە ، چونکە هیچ کێشەیەک نییە بە بیرکردنەوە چارەسەری بۆ نەدۆزرێتەوە.
_______________________________________
تێبینی: ئەم چیرۆکە لە ئینگلیزییەوە کراوە بە کوردی و ناوی نووسەری لەسەر نییە.

 

 

mkbarzy@hotmail.com


 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک