|
٢٤\١٢\٢٠١١
ته‌وه‌ری ''ئایه په‌رله‌مانی
کوردستان سه‌رسه‌خت و لامله یان کارتۆنییه یان ئاسایی و له‌باره؟''.
ئارام حه‌مه‌ساڵح:
په‌رله‌مانی کوردستان دیکتاتۆر و عه‌سکه‌رتاره
و هیچ بایه‌خێک به داخوازییه‌کانی خه‌لکی کوردستان نادا.
سازدانی: ئه‌مڕۆ
 من
هه‌رگیز په‌رله‌مان و حکومه‌تی کوردستانم به نوێنه‌ری راسته‌قینه‌ی گه‌ل
نه‌زانیوه ئه‌مانه هه‌موو که‌سانی حیزبین و هه‌موو کار و کرده‌وه‌یه‌کیشیان
له به‌رژه‌وه‌ندیی ته‌سکی حیزبیانه‌وه بووه، له‌مه‌ش کاره‌ساتتر هه‌ردوو
حیزبه ده‌سه‌ڵاتداره‌که حیزبی بنه‌ماڵه و سه‌رۆکی تاک و ته‌نهان ،
سه‌رۆکی حیزب به لای ئه‌مانه‌وه پیرۆزییه‌کی تایبه‌تی دراوه‌تێ و گه‌یاندویاننه‌ته
ئاستی په‌رستن بۆیه ته‌نها یه‌ک قسه‌ی سه‌رۆکی حیزب یان ئه‌ندامه
نزیکه‌کانی بنه‌ماڵه سه‌رله‌به‌ری بریاره‌کانی په‌رله‌مانی پووچه‌ڵ
کردۆته‌وه و له مێژووی ٢٠ ساڵه‌ی حکومه‌تی هه‌رێمدا ته‌نیا بۆ
رۆژێکیش یاسا سه‌روه‌ر نه‌بووه و نابێ!!!!
شایانی گوتنه که من خۆم یه‌کێکم له واژۆکه‌رانی ئه‌م هه‌ڵمه‌ته و
هیچ کاتێکیش چاوه‌ڕوانی وه‌ڵامێکی پۆزه‌تیفم له په‌رله‌مانی ده‌ستوده‌مبه‌ستراوی
کوردستان نه‌کردووه، جگه له‌مه‌ش من په‌ندم له پڕۆژه‌ی ریفراندۆمیش
وه‌رگرتووه، هه‌روه‌کو ئاگادارن پرۆژه‌ی راپرسی ریفراندۆم له
سلێمانیه‌وه ده‌ستیپێکرد و له ماوه‌یه‌کی زۆر کورتدا هه‌موو کوردستان
و هه‌نده‌رانیشی ته‌نیه‌وه، من وه‌کو نوێنه‌ری باڵێکی ئه‌م پرۆژه‌یه
له ئه‌مریکاوه گه‌ڕامه‌وه بۆ کوردستان و به‌شدارییم له دووه‌م
کۆنفرانسیدا - ٢٠٠٤ - کرد که له هۆڵی بازرگانی سلێمانی به‌سترا،
پاشان نوێنه‌رمان چووه په‌رله‌مانی کوردستان و دواتریش په‌رله‌مانی
عێراق، ئه‌وه‌بوو ئه‌و هه‌موو هه‌وڵ و خه‌بات و ماندووبوونه‌یان به هه‌ند
نه‌گرت و بزووتنه‌وه‌که‌یان به گورگان خوارددا، ئه‌مه له کاتێکدا که
ئاخێوه‌رانی بزووتنه‌وه‌ی ریفراندۆم ده‌یان جار له واژۆکه‌رانی ئه‌م
هه‌ڵمه‌ته زێتر و چڕتربوو!!! مه‌به‌ستمه لێره‌دا ئه‌وه‌شتان به بیر
بهێنمه‌وه له پێناوی یه‌کگرتنه‌وه و په‌رته‌وازه نه‌بوونی زمانی
ستانداردی کوردیدا (هه‌ڵبه‌ته مه‌به‌ست زمانی نووسینه) چه‌ند ساڵێک
به‌ر له ئێستا به هه‌وڵ و هیمه‌تی چه‌ندین نووسه‌ر و لینگویست که‌مپینێکی
به‌ستانداردکردنی زمانی کوردی سازدرا و له‌م سۆنگه‌یه‌وه پرۆژه‌یه‌ک
درایه په‌رله‌مانی کوردستان به ئومێدی جێکه‌وتکردن و به‌ده‌نگه‌وه‌چوون!!
که‌چی په‌رله‌مانی کوردستان له ئاست ئه‌م پڕۆژه گرنگ و چاره‌نووسسازه‌دا
بێده‌نگیی هه‌ڵبژارد، په‌رله‌مان هیچ پێی شه‌رم نییه له دهۆک به
زمانێک بنووسرێ و له هه‌ولێری پایته‌ختیش به زمانێکی تر!!! په‌رله‌مان
خۆی به تاوانبار نازانێ له‌وه‌ی که دانشتوانی دهۆک له‌و بزووتنه‌وه
رۆشنبیریی و ئه‌ده‌بییه بێبه‌شه که سلێمانی و هه‌ولێری گرتۆته‌وه و
رۆژانه ده‌یان و سه‌دان رۆژنامه و گۆڤار و په‌رتووک دێنه په‌خش و
چاپکردن.. ئه‌مه په‌رله‌مانی گه‌له یان دارده‌ستی بنه‌ماڵه‌یه‌که که
خۆی به خوا و به که‌له‌گای هه‌موو کوردستان ئه‌زانێ!! ئه‌و نموونانه‌ی
سه‌ره‌وه راسته‌وخۆ پێمان ده‌ڵێن که په‌رله‌مانی کوردستان دیکتاتۆر
و عه‌سکه‌رتاره و هیچ بایه‌خێک به داخوازییه‌کانی خه‌لکی کوردستان
نادا.
له وه‌ڵامی به‌شی دووه‌می پرسیاره‌که‌تاندا؛ له‌م ساته‌وه‌خته‌دا راپه‌ڕینی
ئاشتیانه‌ی جه‌ماوه‌ریی و ریسواکردنی داموده‌زگا حکومییه‌کان و
لێپرسراوان له لای کۆڕ و کۆمه‌ڵه نێوده‌وله‌تییه‌‌کان و نه‌چوونه سه‌ر
سندوقی ده‌نگدان بۆ ئه‌وه‌ی به ته‌واویی شه‌رعییه‌تیان لێ بسێندرێته‌وه
به باشترین چاره‌سه‌ر ده‌زانم.
ماڵپه‌ڕی ئارام حه‌مه‌ساڵح
|
