|
٧\٢\٢٠١٢
ئاستنزمیى
پەیامەکەى (کەمال میراودەلى)ى سەرۆکى ناشەرعیی هەرێمى کوردستان.
هیوا ره‌ش
پەیامێکى دکتۆر کەمال میراوەدەلیم خوێندەوە کە بە سۆنگەى
خۆپیشاندانەکەى دەڤەرى باڵەکایەتى - چۆمان - ئاراستەى خەڵکى کوردستانى
کردووە و جۆرێک لە خۆپەرستى و خۆدەرخستن و خۆبەزلزانینیشى تێدایە ،
ئەمەو وێڕاى ئەوەى چەند خاڵێکى لاوازى ترى لە خۆ گرتووە :
١ - ئەگەر بەڕێزیان بڕوای بە پرۆسەی دیموکراسی و سیستمی ھەڵبژاردنی
ئازاد و سنوقەکانی دەنگدان ھەیە ئەوا بە دڵنیاییەوە ئەو نەک سەرۆکی
ھەرێم نیە بەڵکو سەرۆکی کەلاوەکۆنێکیش نیە ، چونکە لە ھەڵبژاردندا
شکستی ھێناوە .
٢ - ئەگەر بەڕێزیان ئۆپۆزیسیۆن پشتیوانیی لێنەکردایە ، بڕوا ناکەم لە
١٠٪ی ئەو دەنگانەی بەدەست بھێنایە کە ھێنابووی ، نازانم لە پای
چی ڕووی خۆی لێیان وەردەچەرخێنێ ؟ ! سەرۆک نابێت بۆ ویستی خۆی ھەم لە
ناڵ و ھەم لە بزماریش بدات ، دەشتوانێ بۆ ڕاستیی ئەمەش بۆ جاری دووەم
خۆی کاندید بکاتەوە تا سەنگی خۆی باشتر بزانێ .
٣ - ئەگەر بەڕێزیان خۆی بە - سەرۆکی شەرعیی - ھەرێم دەزانێ ! باشتر
وایە سەرۆک لە ناو وڵاتەوە سەرۆکایەتیی گەلەکەی بکات نەک لە
ھەندەرانەوە پلیتەی قین و تۆڵە گڕ بدات .
٤ - ئەگەر بەڕێزیان دەسەڵاتی کوردستان بە - فاشیەت - ناو دەبات ئەدی
چۆن توانی لە ھەندەرانەوە بگەڕێتەوە کوردستان و خۆی کاندید بکات و
شاڵاوی ھەڵبژاردنیش بەرپا بکات ، جا یا جەنابی لە مانای فاشییەت
تێنەگەییشتووە یان ئەم ماستە مویەکی تێدایە !
٥ - ئەگەر بەڕێزیان خۆی بە - سەرۆکی شەرعیی - ھەرێم دەزانێ ! ئەدی بۆچی
لە پەیامەدرێژدادڕییەکەیدا بانگەوازی خەڵکی تەواوی ناوچەکانی ھەرێم (
خۆشەویستانی باڵەکایەتی و سۆران ، نەوەکانی پاشاکۆرەی قارەمان ، خەڵکی
بەشەرەف و بەجەرگی پشدەر و بتوێن و کۆیە ، قارەمانانی ڕاپەڕین و
شێرەکانی سەفین ، ڕۆڵەکانی کوردستان لە برادۆست و زاخۆ و ئامێدی ،
ڕۆڵەکانی دھۆک و ھەولێر ، ڕۆڵەکانی سلێمانی ھەڵەبجە و کەلار و کفری و
چەمچەماڵ ) ی کردووە و ناویانی ھێناوە ، بەڵام - سەرۆکی شەرعیی - ھەرێم
و ناشەرعیی ناوچە داگیرکراوەکان ، کەرکوک و خانەقین و سەعدیە و جەلەولا
و مەخمور و ژەنگار و تەلەعفەر و --- تد لە کولەکەی تەڕدا داناوە ،
ئینشائەڵا لە ئاییندەیدا ختوکەی خەڵکی ئەو ناوچانەش دەدات و ئەمجارەیان
لە ھەندەرانەوە لە باتی پەیام - مۆلۆتۆف - مان بۆ ھەناردە دەکات .
٦ - ئەگەر بەڕێزیان خۆی بە - سەرۆکی شەرعیی - ھەرێم دەزانێ ، دەبا
پاسپۆڕت و ڕەگەزی ئەوروپایی بخاتە ناو تەنەکەی زبڵەوە و ناسنامەی
نەتەوەیی لە گیرفانی خۆی بنێت و - قازی محەمەد - ئاسا لە نێو خاک و
خەڵکی ستەملێکراوی کوردستاندا درێژە بە خەبات بدات و ئامادە بێت لە
پێناویاندا گیان بەخت بکات .
٧ - سەرۆکی شەرعیی سەیرەکەی لەوەدایە تایبەتمەندانە باسی گومرکی
ئیبراھیم خەلیل و سیویەکی ئاب دەکات ، ئەمەش قین و بوغزی تایبەتیی ئەو
لە بنەماڵەی بارزانی و پارتی دەردەخات نەک غەمخۆریی بۆ گەل و نیشتمان ،
چونکە بە ھەماھەنگیی زلحیزب و تەواوی سەرکردەکان ، وڵاتەکەمان کراوەتە
کەلاکی بەردەم قەل و داڵ و چەقەڵ و ڕێوییەکان و ھەریەکە و لە بەزمێک
دەخوێنێ و لەسەر ئاوازێک گۆرانیی دزی و تاڵانی بۆ یەکتر دەچڕن و
نیشتمانەکەمانیان کردۆتە مەیدانی جریتبازیی دوژمنان و دەزگا
ھەواڵگرییەکان و ساغکردنەوەی ململانێکان .
سەرۆکى ناشەرعیى تاراوگەى بەڕێز ، ئەحمەد خەلیلى زاناى ئیسلامیى مرۆڤى
بە چوار بەش ناساندووە :
ا - ئەو کەسەى زانایە و شت دەزانێ دەشزانێ دەزانێ ، ئەوە مامۆستاتان بێ
و لێوەى فێر بن .
ب - ئەو کەسەى شت دەزانێ ناشزانێ شت دەزانێ ، ئەوە بیرى بخەنەوە کە
دەزانێ تا سودى لێوەر بگرن .
ج - ئەو کەسەى شت نازانێ دەشزانێ نازانێ ، ئەوە قوتابییە و فێرى بکەن .
د - ئەو کەسەى شت نازانێ ناشزانێ نازانێ ، ئەوە گەمژەیە و وێڵى بکەن .
بە هیوام بەڕێزتانیش هونەرى سەرکردایەتى لە نێو خەڵکەوە فێر ببن بۆ
ئەوەى متمانە لە دەست نەدەن ، ئەگەر وا دەزانى کە هونەرى سەرۆکایەتیى
خۆڕسکانە لە خودى خۆتدا هەیە یان وەکو سروشێک لە ئاسمانەوە بۆت
دابەزیوە ئەوا دیارە هیچ نازانى و وا دەزانى کە دەزانى ، بۆیە ئێمەش
ناچارین وێڵت بکەین .
ئەگەر بە خۆماندا هەڵواسین وێنەى سەرۆک و فەرخە سەرۆک
هێندە ژمارەیان زۆرن ، جێگەیان نابێتەوە لە سنگ و بەرۆک
ماڵپه‌ڕی
هیوا ره‌ش
|
