|
٢٦\١٢\٢٠١٠
ئایا داخوازیی
و خۆپیشاندانى توێژەرانى کۆمەڵایەتى و دەروونى لە
٢٧\١٢\٢٠١٠رەوایە؟
کۆمەڵناس: حەمەى ئەحمەد رەسوڵ
لەمێژە، بەڕێز کاک جەزا حەمە ساڵح والى/ سەرۆکى کۆمەڵەى کۆمەڵناسان و
دەرووناسان لەشارى هەڵمەت و خۆپیشاندان، وەکو ماندوونەناسێک کارو
ئیشەکانى لە خزمەتى توێژەرە کۆمەڵایەتى و دەروونییەکاندا خستۆتەگەڕ، بۆ
باشترکردنى گوزەران و ژیانى کۆمەڵایەتى و ئاسوودەترکردنى حاڵەتى
دەروونیى ئەوان تێدەکۆشێت..دەنگى دلێرو بڵندى ئەو جوامێرە بەرزترە لە
وەڵامنەدانەوەو بەدوادانەچوونى بەرپرس و وەزیرو بەڕێوەبەرەکانى ئەم
بوارە.
داخوازییەکانى توێژەرانى کۆمەڵایەتى و دەروونى هێندە زۆر
و بارگران نین بۆ هیچ وەزارەتێک بە تایبەت وەزارەتى پەرەوەردە،
چونکە تەنیا ئەوان دەیانەوێت دابمەزرێن و مووچەو دەرماڵەکەیان زیاد
بکرێت، ئایا دەیانەوێت ژنیان بۆ بێنن و خەرجى زەماوەندەکانیان
بۆ مەیسەر بکەن، کە دەبوا لەم وڵاتە زۆر زەنگینەى سیخناخ لە نەوتەدا،
ئەوەشیان بگرتایەتە ئەستۆ و وەکو کوڕ
و کوڕەزاکانى خۆیان تەماشایان بکردنایە کە وەکو ملیۆنەرە
ئەوروپییەکان ژیانى هایلایڤ دەژین؟
ئایا ئەوان داخوازن خانوو یان شووقەیان بۆ تەرخان بکەن و ئێوەش زۆر
هەژارن و دەرەقەت نایەن بۆیان مەیسەر بکەن؟ کە دەبوا ئەوەشیان بۆ
فەراهەم بکەن چونکە ئەم نیشتمانەى ئێمە داهاتەکەى وەکو ئۆقیانووس بەرین
و فراوانە و خەڵکانى زۆرینەى کوردستانیش
کرێنشین و کرێچین و زۆرن ئەوانەى وەکو قەرەج و رەوەندى هەناسەسارد
دەژین.
ئەم کوردستانە ئازادو زەنگینە کراوەتەوە بەسەر ئاریشەو کێشە کۆمەڵایەتى
و دەروونییە زۆرو زەوەندەکانیداو رۆژ دواى رۆژ پڕترو ئاڵۆزتر هەگاو
دەنێت و تاکەکانى ئەم کۆمەڵگەیە زەلیلترو بێئیرادەترو بێسەروبەرەترو
خەمبارترو دڵتەنگترو تووڕەتر و بێزارتر
و توندوتیژتر و شەڕانگێزتر هەنگاوى
نێگەتیڤ دەنێن.. ئەوە ئێمەى کۆمەڵناس و دەرووناسین کە پێشتر درک بەوە
دەکەین و وەکو زاناى کۆمەڵناسیى گەورەى عێراقى (دکتۆر عەلى وەردى)
پێشنیهادو خوێندنەوەمان بۆ رەوشى ئەمڕۆو ئایندەى نزیکى ئەم کۆمەڵگەیە
ئەوەیە کە پەیوەندییە کۆمەڵایەتیەکان بەرەو هەرەسهێنان و تەنگژە دەڕۆن..
بیر و هزر و
دەروونى تاکى کوردى پشێوتر و راڕاتر
و لەرزۆکتر و دوودڵتر هەنگاو دەنێت..
تۆ بڕوانە پەیوەندى نێوان خوێندکار و
مامۆستا چى بەسەرهاتووە؟ خۆکوشتنى خوێندکارى یەک لەسەر یەک ئاماژەیە بۆ
هەڵوەشاندنەوەى ئەو پەیوەندییەو نەمانى رێز
و خۆشەویستى و متمانەى نێوانیان.. هەروەها شەڕ
و توندوتیژیی بەکارهێنانى نێوان
خوێنکاران بەرەو خراپترو زۆرتر هەنگاودەنێت..
کوڕان و کچانى هەرزەى خوێنکار بەهۆى بەکارهێنانى پێچەوانەوەو چەواشەى
مۆبایلەوە زۆرترین کارەسات و ڕووداوى بەدواى خۆیداهێناوە، ئەو ئاکامن و
دەرەنجامانەى لەمیانەى ڕوودانى ئەو ئاریشەو کێشانەدا دێنەکایەوە بە
مامۆستاو بەڕێوەبەرو یاریدەدەرە بەڕێزو هێژاکانى خوێندنگەکانى کوردستان
چارەسەر نابن و نازانن رێگەچارەشى بۆ بدۆزنەوە..
نەوەى نوێى ئەمڕۆ بە منداڵ و مێردمنداڵ و گەنجییەوە هیچ شتێکى لە نەوەى
کۆن و تەمەن مامناوەند ناچێت، هیچ رەفتارو هەڵسوکەوتێکى کۆمەڵایەتى و
پێداویستیەکانیان لە رەفتارو پێداویستى نەوەى پێش راپەڕین ناچێت. بۆیە
بەڕێزانى وەزارەتى پەروەردەى (مەعنى) بەم باسوخواسە، تەنیا چارەسەر
بۆئەوەى کێشە کۆمەڵایەتیەکانى ئەمڕۆو ئایندەى نزیک زیاترو ئاڵۆزتر نەبن
و کۆمەڵگاش بەرەو نەخۆشى پەتاى زیاتر نەبەن، دەبێت توێژەرانى زیاتر
دابمەزرێن، دەبێت مووچەشیان بۆ زیاتر بکەن، چونکە ئەوان دەبنە پارێزەرو
نوژدارو پزیشکى کۆمەڵگاو دەرونى تاکە هیلاک و ماندووەکان، ئەگەر ئێوە
هەست بەو مەترسییە دەکەن و ئاگاتان لەوەیە کە شۆڕشى ئایندەى نزیک،
شۆڕشى بەلێشاوى گرفتە کۆمەڵایەتى و فشارە دەروونییەکانە.. ئەگەر ئێوە
دەزانن و ئەو زانیاریەتان لەلا نییە، دەبێت هێژایانى بەرپرس ئەوە چاک
بزانن کە ئەم قۆناغەى کۆمەڵگاى نوێى کوردستان زۆر هەستیارە.. بەڵام
ئەمە بۆچى؟؟
چونکە لەقۆناغى ئینتقالیدا، بوژانەوەى ئابوورى و ئاوەدانى و عیمرانى
زیادبوونى داهات و سامان و بەرهەمهێنان، قەیرانى نیشتەجێبون و
لێکترازانى کۆمەڵایەتى و زۆربوونى بێزارى و ماندووبونى ناکاو و فشارى
دىروونى و نەخۆشى و کێشە کۆمەڵایەتیەکانى بەدوادا دێت. مرۆڤى ئەم
سەردەمە بەرەو نامۆبوون دەچێت، تەنانەت منداڵیش دووچارى خەمۆکى دەبنەوە،
زۆربونى ئامێرە کارەبایى و کەرەستەکانى وەکو سەیارەو تەلەفزیۆن و
سەتەلایت و مۆبایل و پۆشاک و زێڕو.........تاد. هەموویان دەبنە
سەرچاوەى سەریەشەى زیاترو جەنجاڵتر کردنى هزرو دەروونى مرۆڤ. نەمانى
متمانەو ساردبونەوەى ویژدان و ماناى راستەقینەى هاوڕێیەتى و خزمایەتى و
دراوسێیەتى و هەروەها زیادبوونى بەرژەوەندى تاکەکەسى وا لە تاکى کوردى
هاوچەرخ دەکات، خۆپەرست و بەتەماعترو پارەپەرسترو بێناوەرۆکترو
توندوتیژتر بێت... ئمێستاکە ڕاستەوڕاست کۆمەلچگا ئازادەکەمان بەو
قۆناغەدا تێدەپەڕێ..
باوەڕتان هەبێت، بێئەوەى پەنا بۆ درۆکردن بەرین، دەبێت ئەو راستییە
تاڵە بڵێین کە زۆرینەمان دووچارى فشارى دەروونى و خەمۆکى و دڵتەنگى و
تووڕەیى و بێزارى بووینەتەوە، بۆیە ئەمڕۆ توێژەرانى کۆمەڵایەتى و
دەروونى پێویستن و کارەکەیان بێسێودوو کردن، لەکارو خزمەتگوزارى پۆلیسى
هاتووچۆو دکتۆرو پەرستیارانى هێژا دەچێت بۆ تیمارکردنى دەروونى تاک و
پەیوەندییەکانى نێو کۆمەڵگه‌ى.
بۆیە لەکۆتاییدا، بەندە کە نزیکەى پێنج ساڵە لە هەندەران گەڕاومەتەوەو
دانەمەزراوم (چونکە واستەم نییەو بێ پشتوپەنام) لەڕۆژى 27ى12ى2010 دا(
کە هەموو دونیا ئاهەنگى جەژن و کریسمەس و دیارى بەخشینەوە دەگێڕن!!!!)
بەندەى دانەمەزراو، لەپێشەوەى ئەو خۆپیشاندانەدام کە دوێنێ بوو
پەرلەمانتارە بەڕێزەکان و سەرۆکى هەرێمى هێژامان ئیمزایان کرد کە دەبێت
بەپێى مۆڵەت و یاسا خۆپیشاندانى ناکاویش ساز بکرێت!!
کەواتە بەڕێزەکانم: دانەمەزراندنى توێژەران زۆر زۆر ناڕەوایە
و زیادنەکردنى مووچە و دەرماڵەشیان
لەو ناڕەواتر. رۆژانە خەڵکانێک هەن کە واستەیان هەیە
و خزم و کەسى بەرپرسەکانن بە تەنها
تەلەفۆنێک دادەمەزرێن، یان لەوە جەرگبڕتر ئەوەیە کە هەندێکیان، ئەمڕۆ
دادەمەزرێن و سبەینێ بە پلەى وەزیر خانەنشین دەکرێن.. ئەمە ئەوپەڕى
ناڕەواییە و چەقى گەندەڵى نیشان دەدا..!!
ماڵپه‌ڕی
حه‌مه‌ی ئه‌حمه‌د ره‌سوڵ
|
