۴\٨\٢٠١٤

ئایا کورد دەکرێتە ئامانج؟

ستار محەمەد قادر   

تا دوێنێ رووی هێڕشەکانی داعش لەناوەند بوو، بەڵام دوای ئەوەی نەیانتوانی یان نەیانویست بەرەو ناوەند پێشڕەویی بکەن، ئێستا رووی هێڕشەکانیان بۆسەر ئەو شوێنانەیە کە هێزی پێشمەرگەی لێیەو لە حاڵەتی بەرگریکردندان، ئەمەش دەکرێت دەیان خوێندنەوەی بۆ بکرێت و بپرسین داعش بۆ چ مەبەستێک هاتووەتە ئەم ناوچەیە و چ ئامانجێکی هەیە؟

راستە داعش بە خراپیی سوودی لەو پانتاییە وەرگرتوە کە سونە مەزهەبن، ئەوەش راستە کە هەموو سووپاکەی مالیکی چەک کران و زۆریشیان لێ کووژرا، بەڵام ئەمە تەواوی سیناریۆکە نیە، کورد دەبێت خوێندنەوەی ووردو درشت بکات بۆ داڕێژرەرانی پشتی ئەم سیناریۆیە، نەک وەکو ئەوەی هێزێکی تووندڕەوی ئیسلامی مانیفێستی خەلافەتی دەوڵەتێکی ئیسلامی کردووە تەماشای سیناریۆکە بکات، لای کەس ئەوە شاردراوە نیە، لەپشتی داعشەوە کۆمەڵێک ئەجێندا هەن، رەنگە هیی وڵاتانی هەرێمی و نێو دەوڵەتیش هەبێت بە خودی وڵاتی عێراقیشەوە، چونکە ئەگەر تەماشای دیمەنەکان بکەین، دەبینین لەئێستادا حکومەتی عێراق دەیەوێت بۆ شەڕی داعش لەڕووی چەک و زانیاری هەواڵگری و هێزی پشتیوانی ئاسمانیەوە، سەرنجی وڵاتە یەکگرتووەکانی ئەمریکا بۆ لای خۆی رابکێشێ و هاوکاری بکات، لەکاتێکدا هەر خودی ئەو حکومەتە هۆکاری ئەوە بووە کەناوچەی سونە نشینەکان بکات بەمۆڵگەی ئەو هێزە تووندڕەوانەو بەو دەردەیان بەرێت، ئێستا خەڵکێکی زۆر ئاوارەن و روویان لەهەرێمی کوردستان کردووە، حکومەتی هەرێمیش بەهۆی بڕینی مووچەوە لەلایەن ناوەندەوە لەژێر گوشاردایە، لەلایەکی ترەوە هێزی پێشمەرگە بەدرێژایی ١٠٥٠ کیلۆمەتر لەسەنگەری بەرگریکرندایەو رۆژانە رووبەڕووی هێڕش و پەلامارەکانی داعش دەبنەوە، بەبێ ئەوەی حکومەتی ناوەندی هیچ هاوکاریەکی لۆجستی و ماددی پێشکەش بەهێزەکانی پێشمەرگە بکات.

کەواتە ئێستا حکومەتی هەرێمی کوردستان کەوتووەتە ژێر دوو گوشارەوە، یەکێکیان حکومەتی ناوەندیەو ئەوەکەی تریشیان رووبەڕونەوەو بەرگریکردنە لەخاکی پیرۆزی کوردستان، دەکرێت لێرەوە بێین ئەوە شرۆڤە بکەین، بۆچی کاتێک سەرۆکی هەرێمی کوردستان خودی مالیکی لەجمو جۆڵی ئەو گرووپە تووندڕەوانە ئاگادار دەکاتەوەو دەستی هاوکاری بۆ درێژ دەکات، لێ مالیکی رەتیدەکاتەوە؟ لێرەوە دەبێت لەداعش بکەوینە گوومانەوەو رەنگە سیناریۆکە بەشێوەیەک داڕێژرابێت، کوردو سونەی عارەبی تێدا بکرێتە ئامانج، چونکە ئەوە لەلای هەمووان ئاشکرایە، ئەم هێزە لێرە نامێنێتەوە، بەڵام کاتێک بەجێیدەهێڵێت، داشی حکومەتی عێراقی سوار دەکات، بەمانایەکی تر، کورد دەبێت تا چ ئەندازەیەک رووبەڕووی داعش دەبێتەوە، بەبارتەقای ئەوەش روبەڕووی پیلانگێڕی ناوەند ببێتەوە؟ لەبەر ئەوە چۆن لێکیدەدەمەوەو شەن و کەوی دەکەم، ئەم ماستە بێ موو نیەو رەنگە لەمەو دوا ئایەتەکە قڵپەوە ببێ و کوردو ناوچە کوردنشینەکان بکرێنە ئامانج، بۆیە نابێت باوەڕ بەو جموجۆڵە تاکتیکیەی داعش بکەین کە هاتووە بۆ تەقاندنەوەی مەزارگەکان، ئەوە دیوێکی سیناریۆی داعشە، دەبێت هەوڵ بدەین بۆ ئەوەی دیوەکانی تری بهێنینە زوبان؟

ماڵپه‌ڕی ستار محه‌مه‌د قادر

_________________________________

هەموو بابەتەکان دەربارەی ''داعش'' لێرە ببینە:

www.emrro.com/dosyeydahish.htm