|
١٨\٤\٢٠١١
ئایا حەقیقەت
رەهایە؟
ئەنوەر فەتاح محەمەد ئەمین
هەر یەکسەرو بێ هیچ چەندوچوونێک وەلام دەدەمەوەو دەلیم: نەخیر، رێژەییە.
حەقیقەت لە زەمەنی دیاری کراوی خۆیدا لە لای هەرکەس جۆریکە، ئەخریتە
ئاستی گومانەوەو ئیتر تەمەن راستی و دروستی یان هەڵەی دەسەلمینیت.
ئەمەیە بۆچوونی ماتریالیستانە. حەقیقەتی رەها نیەو ناشبیت. کەسانیکیش
هەن دژی ئەم بۆچوونەن و عەقل و ئیمانی چەقبەستوو لە لایان وەستاوو
جیگیرو پیرۆزە.
هەر لەم روانگەیەوە، هەموو تەوژمیکی ناسیۆنالیستی و ئایینی، لە سنووری
بەرتەسکی بیرکردنەوەیاندا، لە هەمان ریرەودان، فەزیلەت دەکەنە
موقەدەسات. هەر لەبەر ئەوەیشە هیچیان پێ قبول ناکریت و لە بیرشێواویی
خۆشیانەوە، هەموو بەرامبەرەکانیان بە پیاو خراپ و دەستی دەرەکی و سیخور
و تەنانەت بێرەوشتیش دەناسینن.
لە رۆژهەلاتی ناوەراستدا، ئەو ئیمانپەروەرانە، ئەم بیروبۆچوونە قیزەونە
سەدانجار دووپات دەکەنەوە. ووشەی دەستی دەرەکییش شیوەیەکی بە کافر
ناساندنە. دەنا ئەمە لە ئەوروپادا هەموو پیگەو نرخیکی خۆیی لە دەستداوە،
بەتایبەت لە چەرخی گلۆبالیزمدا. هەر لەبەر ئەمەیشە ئەو بیروبۆچوونە
دوگمایانە، تەنانەت لە دیدێکی دواکەوتووی کۆنەوە، گەشەی پیشەسازی و
کشتوکالییش هەلدەسەنگینن و هەرگیز ناتوانن واقیعی گەشەسەندن و
دەرئەنجامە کۆمەلایەتیەکانی وەک خۆی ببینن.
هەر لەبەر ئەمەیشە ئەم بۆچوونانە تا ئەوێ بر دەکەن کە بیانوو بیت بۆ
پیرۆز راگرتنی ناسیۆنالیستی بیر تەسک، وە هەر ئەوەندەش دەروات کە
پاساوی کرداری ئەوان بیت و بەهانەی عەقلیکی عەشرەتگەری بیت بۆ پشتگیری
سیاسەت و فەرمانرەوایی خۆیان. هەر لەم گۆشەیەیشەوە دەتوانین بلیین: ئەم
بۆچوونە ئاستتەنگانە، ناوخۆیی یان جیهانی، هیچیان پێ ناکریت خەتابار
کردنی خەلکی نەبیت. هەربۆیە وەلامی داواکانی خەلکییش بە سووکایەتیەک
دەزانن بەخۆیان.
ئا ئەمە هەر دەستەلاتی نەگرتۆتەوە، بەلکو ئۆپۆزیسیۆنیش لە میانەی
جیاکردنەوەی دین لە دەولەت وە حکومەتی تەکنۆکراتی بە هاوپەیمانیتی
ئیسلامیەکان، سنووریکیان بۆ ئەسلی بزووتنەوەی جەماوەری داناوەو
خەلکیشیان لە پەلاماردەرەوە کردووە بە گوێگرو چەپلە لیدەر.
بەم مانایە، ئەوەی لەلای هیچیان حسابی بۆ ناکریت، جەماوەرەی سەربەخۆیە.
ئەمەیش جەماوەر رووبەرووی ئەرکیکی مەزن دەکاتەوە، ئەویش دژایەتی هەموو
ئەو پیگە سیاسیانەیە لەناو بزووتنەوەی خۆرسکی جەماوەردا رەگی قوولیان
داکوتاوە، ئەو سیاسیانەی پایەی سەرەکی گەندەلی نین و بەس، بەلکو لە
هەمانکاتدا، بێ نرخ کردنی هیزی جەماوەرن لە
رێی حیزبایەتیەوە، ئەمەیش هەنگاوی یەکەمە بۆ ملکەچ پیکردنی خەلکی نەک
ئازادکردنیان لە کۆیلایەتی.
ماڵپه‌ڕی ئه‌نوه‌ر فه‌تاح محمه‌دئه‌مین
|
