ئازادی دوێنێم لە ''ئەمڕۆ'' دا.

کازیوە ساڵح  

باوەڕناکەم هیچ ئازادیەک هێندەی ئەو ئازادیە بەهاداربێت لەنێو ئاگربارانی کۆیلەیەتیدا بە دەستی دەهێنیت .هیچ گۆڵێکیش هێندە ئەو گوڵە کیویلەیانە یاخی و قەشەنگ نین کە ڕوخساری متمانە لە پێدەشتی دڕکدا پیشان ئەدەن . ئەی لە زەمەنی مەملەکەتێکدا کە یاخی بوون سەری خۆی تێدا هەڵگرتبێت کام هەنگاو هێندەی یەکەم هەنگاو ناحەزدارە؟ کام چەمک هێندەی چەمکی ''سەربەخۆی'' دژوارە ؟

ڕۆژنامەی ئەمڕۆ لەو زەمەنەدا و لە نێو پێدەشتی دڕک و دژواریی سەربەخۆبووندا پێشەنگی سەربەخۆییبوون و ئازادی ڕادەربڕینی هەڵبژارد بانگی کردین بۆ وتن .لە ساڵی ١٩٩٦ سەرەتای کاری نووسین و ڕۆژنامەگەریم بوو ، جار جاریش بە بینین نا تەنها بە بیستن سەدای ئەو بانگەم بۆ باسکرابوو ، وەلێ خوداکانی حیزببازی و شەڕی ناوخۆ پەیوەندی و هەواڵگۆڕینەوەی ئێمەی مرۆڤی نێوان هەولێر و سلێمانی لە یەک کردبوو بە گۆڕینەوەی مادەهۆشبەرەکان . دەرەوەی سروشت و یاسا بوو بە قاچاغ نەبێت بڵاوکراوەکانمان بە یەکتری بگەیەنین. لەو زەمەنەی نیشتمانمان خرابووە سەر پشتی ئەسپەکانی حیزب و ئەوان لە کوێ دەواری ململانیەکانیان هەڵبدایە لایەنگیرانیانشیان دەبوو هەمان گەرمیان و کوێستان بکەن . لە ڤێستڤاڵی گەلاوێژی هەمان ساڵدا هەندێ لە ئەندامانی ئەمڕۆ خۆیان پێ ناساندم و گوتیان ئەوان ماوەیەکە ئەمڕۆ لە سلێمانی چاپ دەکەن و باوەرَیشیان وایە کۆمەڵێ خەڵکی ئازادیخواز لە خۆیان کۆبکەنەوە ، هەر لەویشدا پێشنیازی کارکردن و ڕووی هاوکاریان لە من نا. لەوێوە من بووم بە هاوکاری ئەمڕۆ .ئەو سەدای سەربەخۆیی و ئازادیە و بۆ یەکەم جاریش بینینی ناوی ژنێک وەکو خاوەنی ئیمتیاز منی پەلکێشی خۆی کرد لەوێوە ئەمڕۆ بوو بە یەکەم ماڵی ڕاگەیاندنی نووسراو بۆ من و بووم بە بەڕێوەبەری نووسینی ئەمڕۆ.

ئەوەندەی پاراستنی سەربەخۆیی ڕۆژنامەی ئەمڕۆ لە چنگی کویلەخوازەکاندا دژواربوو ئەوەندە و زۆر زیاتریش بوونی من وەکو یەکەم بەڕێوەبەری نووسین لە ڕۆژنامەیەکدا ڕۆژنامەی ژنان نەبوو دژواربوو. هەتا لە کۆتاییدا ڕۆژنامەی ئەمڕۆ بە زۆر گرفتی لابەلادا برا و خرایە ژێر زۆر فشاری دەرەوەی کاری ڕۆژنامەگەری، چەند ئەندامێک کە خواستیان بوو ماف بۆ دامەزرێنەری ئەمڕۆ و ئازادی و سەربەخۆی بۆ ڕۆژنامەکە بگەڕێتەوە و ناچاربوون واز بهێنن و بۆ ئەوەی ڕووبەڕووی وەها ئەزموونیەکیش نەبنەوە و پەنا بەرنە بەر کاری گرانی تاکڕەهەندی لە کاری ڕاگەیاندندا و بە تەنها بکەونە بڵاوکردنەوەی گۆڤار و ڕۆژنامە ، من گۆڤاری نڤارم چاپکرد و بە دوایدا نوێکار ، پاش ماوەیەک کەریمۆکیش ڕۆژنامەی سپێدەی چاپکرد . ئەوەی نڤار پراکتیکی کرد وەکو پەسەندکردنی بەرانبەر و مافدانی وەکو یەک بە هەموو لایەک بە بێ جیاوازی بیروڕاو و ئایدۆلۆژی و ڕاڤەکردنی کێشە هەنویەکانی ئەو کاتە بە بێ سنووری کویلەتی کێشان ، گەڕانەوەی ڕێز بۆ نووسەران بە پاداشتی پەسەند هەتا ئێستاش لە ڕۆژنامەگەری کوردیدا نەهاتوەتە ئاراوە هەر بۆیەش نڤار زوو سەربڕا و منیش بووم بە یەکەمین و هەتا ساتی نووسینی ئەم وتارەش دوایین سەرنووسەری مێینە لە سەر ئازادی ڕادەبڕین زیندان بکرێت لە زەمەنی کویلەتیدا ، زەمەنێک کە یەک دوو ڕۆژنامە زیاتر کەس نەیوێرا ئەو هەواڵە بڵاو بکاتەوە . بەڵام زیندان بۆ مرۆڤی خاوەن باوەڕ هێز دەبەخشێت ، بۆیە بەر لەوەی کێشەی نڤار لە دادگا یەکلا ببێتەوە ، بە گۆڤاری ''نوێکار'' بە هەمان میتۆدی نڤار وەڵامی تاریکخوازانم دایەوە و پاشان هەوڵێکی زۆر بۆ ئەکادیمی بوونی ڕۆژنامەوانی لە کوردستاندا (ئەمەیان چیرۆکی ئەم وتارە نییه) ، ئەمەش گۆمانی چارەسەری لای حیزببازان و دەسەڵاتی تۆتالیتاری کرد بە یەقین کە چیدی کۆکردنەوە و مۆڵەت سەندنەوەی گۆڤار و زیندانیکردن پێشم پێناگرێت، چاکترە بە ئاشکرا پێم بگوترێت '' ئێرە نیشتمانی تۆ نییه‌ بڕۆ نیشتمانێک بۆ خۆت بدۆزەرەوە ''، چ دارا ئەحمەد و چ من مەنفا کرا بە نیشتمانمان ، بەڵام ڕۆژنامەکەی چەمکی ئازادی ڕادەبڕینی هێنایە بواری ڕاگەیاندنی کوردی و چەند ئەندامێکیشی بە شێوەی نوێ بەرگریان لێکرد، ئەو هەنگاوانەش بوون بە هەوێنی ئەو نیمچە ئازادیەی ئەمڕۆ فەراهەم بووە ، زیندانی کەس لە تاریکی و بە نهێنی نامێنێتەوە. کۆڵنەدانی دارا ئەحمەد لەو ڕیبازەی گرتبووی و دەرکردنەوەی ''ئەمڕۆ'' لە ستایلی ئەلکترۆنیدا، دوورکەوتنەوەی لەو تەهریج و پەت پەتێنە دەمامکدار و ناپەسەندەی لەم سەردەمەدا ڕووی ئازادی ڕادەبڕینی و دنیای نووسینی بە قەدەریەکی ناچیزە بەخشیوە ، هەناسەیەکی دی بە ڕووی ئومێد و هاندان بۆ بڵاوکردنەوە دەبەخشێت . جگە لەهەزاران گوڵی پیرۆزبایی ، وەنەوشەی ماندوونەبوون بۆ " ئەمڕۆ " و ستافەکەی، ئەوەی خوازیارم لە یادی پازدە ساڵەیدا ڕەچاوی بکات هەر وەکو ئێستا و جدی تریش سوڕانەوەیە دژی ڕەوت، ئەو ڕەوتەی ڕێبازی ڕۆژنامەگەریی لە کوتلەی حیزبیەو دابەشکردووە بە سەر کوتلەی عەشیرەت و کۆمەڵە هاوڕێ و شار و ناوچە و تەنانەت گەڕەکیشدا . ئەو ڕەوتەی خەریکە یاخی بوون و تەسلیم بوون لە یەک قاڵب ڕۆدەنێ و بەهای دووەم بە یەکەم دەبەخشێت.. .

تێبینی: داوای بەخشین لە خوینەرانی '' ئەمڕۆ '' دەکەم ، کە تەنها یەکشه‌ممان هەندێ کاتی کەمم هەیە، نەمتوانی دوێنی ١٥\٨ لە کاتی خوێدا ئەم چەند سەرەپێنووسە بنووسمەوە.