٧\١٢\٢٠١١

نه‌ ده‌سه‌ڵاتی ئێستا،

نه‌ ده‌سه‌ڵاتێکی ره‌شتر!
 

پارتی و یه‌کێتی هه‌موو شتێکی خراپیان لێده‌وه‌شێته‌وه‌؛ وه‌ک رێگرتن له‌ خۆپیشاندان و سه‌رکوتکردن و ته‌قه‌کردن له‌ خه‌ڵک و ژنکوژیی و دزینی سامانی خه‌ڵک و سوتاندن و داگیرکردنی باره‌گای هه‌ر لایه‌نێکی به‌رهه‌ڵستکار! به‌ڵام که‌س نییه‌ گومانی له‌وه‌ هه‌بێ که‌ سوتاندن و تێکدانی شوێنه‌کانی شێلان و مه‌یفرۆشیی و مه‌یخواردنه‌وه‌ راسته‌وخۆ و ناڕاسته‌وخۆ به‌رهه‌می هزری تاریکپه‌رستانه‌ و کۆنه‌په‌رستانه‌ی دینداریی یه‌کگرتوو و گرووپ و لایه‌نه‌ ئیسلامییه‌کانه‌، به‌رگریکردن له‌ یه‌کگرتووش له‌ لایه‌ن گۆڕان و به‌ره‌که‌ی که‌ پێکدێ له‌ میدیایه‌ به‌ ناو ئازاده‌کانی وه‌ک هاوڵاتی و ئاوێنه‌ و له‌و بابه‌تانه‌ و ره‌شبیره‌کانی پێشانی به‌ر ده‌رکی سه‌را که‌ شانبه‌شانی قیژه‌قیژی مه‌لایه‌کان و نه‌ڕه‌نه‌ڕی (ئه‌ڵاهوئه‌کبه‌ر)ه‌که‌ی ئیسلامییه‌کان باس له‌ ئازادیی ده‌که‌ن که‌ گوایه‌ ده‌یانه‌وێ ئاستێک بۆ دڕنده‌یی پارتی و یه‌کێتی دابنێن.. جگه‌ له‌ هه‌وڵدانێکی سیاسه‌تبازانه‌ بۆ دامه‌زراندنی ده‌سه‌ڵاتێکی ره‌شتر له‌ ده‌سه‌ڵاتی پارتی هیچی دیکه‌ نییه‌.

 

 

 

٧\١٢\٢٠١١ - ئه‌مڕۆ

------------------------------------------------------------------------------------------------------

ته‌نیا هه‌ولێر ده‌ستی دڕنده‌کانی پێنه‌‌گه‌یشتووه‌،

تکایه‌ بیپارێزن!

 

له‌ راستییدا، ئه‌و سوتاندن و ته‌قاندنه‌وه‌ی مه‌ڵبه‌نده‌کانی شێلان و فرۆشگای مه‌ی و مه‌یخانه و هۆتێله‌کان له‌ بادینان و له‌ سلێمانی، به‌ڵگه‌ی ئه‌وپه‌ڕی دڕنده‌یی و دواکه‌وتن و ناشارستانیی کۆمه‌ڵگه‌ی خۆمان نیشان ده‌ده‌ن که‌ هێزه‌ سیاسییه‌کان له‌ پشتیه‌‌وه‌ن، ئه‌وه‌ش له‌به‌ر ئه‌وه‌یه‌ که‌ به‌ شێوه‌یه‌کی گشتیی میلله‌تێکی گوندیین و جگه‌ له‌ که‌سانێکی که‌م له‌ مرۆڤی شارستانیی ‌که‌ ئه‌وانیش په‌راوێز خراوان هه‌موومان فه‌رهه‌نگێکی ده‌ره‌به‌گیی و دینیی کۆنه‌په‌رستانه‌مان هه‌یه و ده‌سه‌ڵاتیش له‌ نێوان هێندێک سیاسه‌تبازی دڕنده‌ی حیزبه‌کان به‌ تایبه‌تییش پارتی و یه‌کێتی قۆڕخ کراوه‌، جا له‌سه‌ر هه‌ر که‌سێکی مرۆڤدۆست و پێشکه‌وتنخواز پێویسته‌ پارێزگاریی له هه‌ولێر‌ بکا وه‌ک پایته‌خت و نه‌هێلێ وه‌ک شار و شارۆچکه‌کانی دیکه‌ بکه‌وێته‌‌ به‌ر هێرشی ئیسلامییه‌کان و گۆڕان و ئه‌و لایه‌نانه‌ی کاری تێکده‌رانه‌ ده‌که‌ن، ئه‌گه‌ر نا ئه‌وه‌ ئه‌و قه‌واره‌ سیاسییه‌ی که‌ ته‌نیا هێندێک ماف و ئازادیی تێدا به‌ده‌ستهاتووه‌ به‌ به‌راورد به‌ سه‌رده‌می رژێمی به‌عسییه‌کان ئه‌ویشمان له‌ده‌ست ده‌چێ.. سه‌رانی حیزبه‌کانیش باکیان نییه‌ و هه‌موویان جێی خۆیان له‌ ئه‌وروپا خۆشکردووه‌ و ته‌نیا خه‌ڵکی هه‌ژار و ره‌شوڕووتی گه‌له‌ داگیرکراو و سته‌مدیده‌که‌مان تێده‌چن.

٥\١٢\٢٠١١ - ئه‌مڕۆ

------------------------------------------------------------------------------------------------------

با هه‌موومان له‌گه‌ڵ پایته‌خت ده‌نگهه‌ڵبڕێن:

نه‌ یه‌کێتی و نه‌ پارتی، نه‌ گۆڕان و ئیسلامیی!

 

که‌س گومانی له‌وه‌ نییه‌ که‌ پارتی و یه‌کێتی دوو ئه‌ژدیهای ترسناکن و چڕنۆکی خوێناوییان تا سه‌ر ئێسکی میلله‌ت چووه‌، به‌ڵام هه‌روه‌ک چۆن رووداوه‌کانی سلێمانی به‌ ده‌سیسه‌ی (گۆڕان)ی نه‌وشێروانه‌ خوێنڕێژه‌که‌ هه‌ڵگیرسا و گاڵته‌یان به‌ ویست و داخوازییه‌کانی خه‌ڵکی ناوچه‌که‌ کرد و ناڕه‌زایه‌تیی ئاسایی خه‌ڵکیان شێواند، رووداوه‌کانی ئێستای بادینانیش به‌ هه‌مان شێوه‌ به‌ ده‌سیسه‌ی لایه‌نه‌ ئیسلامییه‌ دڕنده‌ و کۆنه‌په‌رسته‌کان هه‌لگیرساوه‌، دیاره‌ یه‌کێتیی و پارتی ئه‌و رووداوانه‌ی سلێمانی و بادینانیان زۆر پێ باشتره‌ له‌وه‌ی بزووتنه‌وه‌ی راسته‌قینه‌ی گه‌ل که‌ ناره‌زایه‌تییه‌کی مه‌ده‌نیی و ئاوه‌دانکاریی و ژیاندۆستانه‌یه‌ له‌ به‌رامبه‌ر چه‌وساندنه‌وه‌ و پێشێلکردنی ماف و ئازادییه‌کان بکه‌وێته‌ سه‌رپێ و ده‌سه‌ڵاتداران ملکه‌چ بکه‌ن بۆ ئاوه‌دانکردنه‌وه‌ و پێشخستنی ژیان وه‌ک ئه‌وه‌ی له‌ هه‌ولێر سه‌ره‌تایه‌کی ده‌رکه‌وتووه‌ که‌ ئه‌گه‌ر په‌ره‌بستێنێ و هه‌موو کوردستان بگرێته‌وه‌ ئه‌وه‌ خۆبه‌خۆ ده‌بێته‌ هۆیه‌کی کاریگه‌ر بۆ له‌گۆڕنانی ئه‌و سیسته‌مه‌ دڕنده‌ و چه‌وسێنه‌ره‌ی که‌ یه‌کێتی و پارتی به‌ هاوکاریی ئۆپۆزسیۆنه‌ گه‌مژه‌ و کۆنه‌په‌رسته‌که‌ی گۆڕان و ئیسلامییه‌کان دروستیان کردووه‌.

٣\١٢\٢٠١١ - ئه‌مڕۆ