با هەموومان چەک نەفرەت بکەین!!

- بانگەوازێک بۆ دەسەڵات و هاووڵاتى -

  
حەمەى ئەحمەد رەسوڵ

تەنها لەبەرئەوەى نەتەوەیەکى جیاواز بووین، بەرامبەرە دڕندەکانمان هەلاهەلای کردووین، گشت کەرەستەکانی زەبروزەنگ و توندوتیژی بۆ قەڵاچۆکردنمان بەکارهاتوون.. ئاسوودە و دڵنیا نەبووین لە ژیانمان..چونکە مێژوویەکی درێژمان لەگەڵ مەترسی فەنابوون و مەرگدا هەیە، چرکەکانی حەوانەوەو پشوومان هێند کەمبوون، متمانەمان بە دەوروبەرو کەسی بەرامبەر کەمبووە.. لەبەرئەوەى دوژمنەکانمان هەمیشە چەکیان بەدەستەوە بووە، گەرەنتیمان بۆ مانەوە زۆر کزبووە.. لە پەرچەکرداردا و بە ناچاری پەنامان بۆ چەک بردۆتەوەو مێژووى نەگریس چەکی نەفرەتى لێکردوینەتە هاوەڵ و یاوەر! ئەم نیشتمانەی ئێمە بێنمونەیە لە دیمەنە پڕ لە خوێن و سەربڕینى مرۆڤەکانی خۆیدا.. ئەم کۆمەڵگایە، سیخناخە لە دیرۆکی کوشتارو قڕکردنی تاکەکانى خۆیدا، ئارەزووی چەک هەڵگرتن لاى هەر تاکێکمان بۆتە هۆکار و پاڵنەرێک کە بە یەکسانی هەر ماڵە و چەکێک یان زیاتری بەربکەوێت..

بۆیە ئیگۆىEgo کورد بکەر بووە، لە داپۆشینى ئەو حاڵەتە کێماسییەدا کە بەدەمانچەوە ڕۆڵى خۆبەزلزان و خۆگیڤردنەوە لە کۆڵان و شەقامدا بگێڕێت و رۆحى تۆڵەسەندنەوە و قارەمانێتى ببێتە خەسڵەتی سەرەکى تاکی کورد.. بۆ سەلماندنى ئەم بۆچوونەمان، بڕوانە لە هەموو خێزانێکدا دەمانچە دەدەینە دەست کوڕ و بوکەشووشە بۆ کچە بێنازەکانمان ئامادەیە.. کە لە ئێستادا کوڕەکان بە زەبری پەروەردەی چەواشەمان بەو چەکە دایک و خوشک و خێزانی خۆیان دەکوژنەوە!

جەرگبڕ ئەوەیە وەکو حکومەت، بێپلان و بێبەرنامەین بۆیە بازرگانەکانمان کە دەچنە دەرەوەی وڵات، چەک و تەقەمەنیان بۆ منداڵ و گەنجی ئەم وڵاتە هەناسەساردە بیرناچێت.. تەنانەت وایلێهاتووە کە نێو خوێندنگەو تاکسی و نەخۆشخانەو چاخانەو ماڵەکانمان جمەیاندێت لە چەکى هەمەجۆر..!

بەکاریگەری لاسابیکردنەوە ئەم حەزو ئارەزووە لای منداڵی کورد گەورە بووە و لەنێو گەنجانیشدا بە رێژەیەکی بەربڵاو زیادی کردوەو لە تەشەنەکردندایە، رێژەیەکی زۆر لەگەنج.. لە پیاوان هەڵگری چەکن.. بۆیە لێرەولەوێ کارەساتی دڵتەزێن روودەدەن.. فاکتەریش ئاشکرایە: زۆرجار لەسەر شتێکى زۆر بێماناو بێنرخ، لەبەر قسەیەکی رەق و جنێوێک، لەبەر بێ حەوسەڵەیی و بێئارامى و یەکتر قبوڵنەکردنمان رۆژانە چەندان قوربانى پێشکەش بە گۆڕستانەکان دەکەین. مەڵبەندو بنکەکانی پۆلیس.. لوورەی نەجدەو ئیسعاف، نێو بەندیخانەکان: شاهید و گەواهی ئەوە دەدەن کە ئەم دیاردەیە زۆر خراپ زیادیکردوەو پەتاکەى ئەمەریکا گەیشتۆتە لامان، چونکە رۆژ نییە کەسێک بریندار یان کوژراو نەبێت.

هۆکارەکانى چەکهەڵگرتن و پەرەسەندنى تاوان و کوشت وبڕین فرە هۆکارن و بریتین لە نەزانى و نەخوێندەوارى و هەژارى و بێکارى و دواکەوتوویی و ڕێز لە یاسانەنان و پاشاگەردانیی پەروەردەى کۆمەڵایەتى و رکێفى دابونەریتى کۆمەڵایەتیى کۆنەپارێز و وتارى ئاینیى پەڕگیر و دواجار فەرهەنگى توندوتیژى ورۆحى تۆڵەسەندنەوەش بەرکەماڵە.

چارەسەرکردنى ئەم دیاردەیە ئاسان نییە بە تایبەتى کە چەک بۆتە هاوەڵ و براى زۆرینەمان، وەکو گەنمێکى پڕژاوى نێو دڕکى لێهاتوە و کۆناکرێتەوە.. بەڵام ئەرکى حکومەت و دەسەڵاتە کە پێویستە یاسا سەروەر و سەردار بکات  و سزاو غەرامە پتەو و سەقامگیتر بکات.. رێکخراو و سەنتەرى ئەهلى و مەدەنى و حکومیى ئاکتیڤ و خەمخۆرتر بکات بەتایبەت لە شارۆچکە و گوندەکانى کوردستاندا، میدیاکان چالاکتر بن لە هۆشیارکردنەوەداو کولتوورى ئاشتیخوازىو تەبایی و برایەتى بکەنە ڕێساو یاسا، چەک نەفرەت بکرێت و هەڵگرتنى نایاسایی ئەم بەڵا نەگریسە بکرێتە تاوان.. سزاو غەرامەى توند بخرێتە سەر سەرپێچیکاران و ئاشقانى چەک و تەقەمەنى..

کۆمەڵگاکەمان لەقۆناغى وەرچەرخان و بوژاندنەوەى ئابووریدایە، کە دەبێت باجەکەى ئەم دیاردانە بێت: رێژەى تاوان و دزى و ژنکوشتن و تەڵاق و درۆکردن و لەشفرۆشی و لەشکڕین و قومارکردن و ئالودەبوون بە خواردنەوەى کحولییات و حەشیشە و تریاک کێشان و روو لەهەڵکشانن..

بەندە پازدە ساڵان لە ئەوروپا ژیاوم و بۆیە دەزانم کە لەوێش حکومەت و پۆلیس زۆر توندن لە هەمبەر چەکبەدەستاندا.. چەقۆو دەمانچەى شەخسی نایاسایی وەکو کوفرێک دەرهەق بە مرۆڤایەتى حسێبى بۆ دەکرێت!

بۆیە حکومەت و حیزب و دەسەڵاتى کوردى دەبێت وشیارتر و دڵسۆزتر و کاراتربن بۆ قەلاچۆکردنى چەک، بەڕاستى ئیدى ناکرێت باسی کۆمەڵگەى مەدەنى بکەین و بە کەمتەرخەمیەوە حوکمڕانبین.. تاکى کوردو هاوڵاتیش ببنە گورگەکەى هۆبز دژ بەیەک. دەبێت دروشمى حکومەت ئەمە بێت: با هەموومان چەک نەفرەت بکەین و لاسایی گاندیی مەزن بکەینەوە کە هیندستانێکى زەبەلاحى بەبێ چەک ئازادکرد..ئەگەر هەقبێژ وراستگۆبین دەڵێین: لە داماڵینى چەکدا یەکگرتووى ئیسلامى پێشەنگە.