|
٢\٣\٢٠٢٥
باکووری کوردستان
لە نێو گەمەی ''وتووێژ''ی ترک و
سەرلێشێواویی
سیاسەتکاری نانەتەوەیی و کورتبینی کورد!
سیروان کاوسی
پەیامی بەڕێز عەبدوڵڵا ئۆجەلان کە لەلایەن سیاسەتکار و نیشتمانپەروەری
ناسراو ئەحمەد ترک رێکەوتی ٢٧\٢\٢٠٢٥
بۆ ئاگاداریی نەتەوەی کورد و کۆمەڵگەی ترک و کۆمەڵگەی نێونەتەوەیی
خوێندرایەوە، هەروەک چاوەڕواندەکرا، پەیامی خۆبەدەستەوەدانی
سەرکردەیەتیی پێ کێ کێ و هێزی گریلا و هەڵوەشاندنەوەی هەموو
رێکخستنەکانی پێ کێ کێ بوو لە کوردستان و لە دەرەوەی وڵات.
پەیامەکەی ئۆجەلان لە رۆژی ٢٧ی شوباتی (رەشەممە) ٢٠٢٥ بۆ هەموو
نیشتمانپەروەران و دڵسۆزانی رێگەی پیرۆزی سەربەخۆیی کوردستان، رۆژی
ماتەمینی و رۆژێکی تاریک و نگریسە لە مێژووی خەباتی رزگاریخوازانەی
نەتەوەی کورد و، فەرمانی ئاشبەتاڵێکی دیکەیە لە چارەکی یەکەمی سەدەی ٢١
لەلایەن سەرۆکی حیزبێکی کوردییەوە بەسەر نەتەوەی کورددا دەسەپێندرێتەوە،
دوای چل دانە ساڵی خوێناویی گەلێک بتوانێ لەپێناو مانەوەی خۆی بەرامبەر
یەکێک لە دڕندەترین رەگەزەکان بە درێژایی مێژووی سەدان ساڵەی رابردوو،
خۆی رابگرێ و ببێت بە گەورەترین سەرئێشە و کێشە و گرفت بۆی، چلۆنە و لە
پێناوی چی سەرکردەکەی ئاوا نابەرپرسیارانە داوای چەکدانان و
خۆبەدەستەوەدانی لێبکات!؟
لە خستنەڕێی گەمە و شانۆگەریی ''وتووێژ''، بە ناو ''ئاشتی و برایەتی''ی
کاربەدەستانی ترک بێدەنگن، سەرکۆماری ترک دەڵێ کێشەیەکمان نییە بە ناوی
کورد، هاوکات راوێژکارەکانی هانی سیاسەتکاری کورد لە باکوور و باشوور
دەدەن بەشدار بن لەسەرخستنی پرۆسەی ئاشتیی، گوشار بخەنە سەر پێ کێ کێ
وەک مەرجی سەرەکیی بۆ دەسپێکی وتووێژ، چەک دانێت! لەم پێوەندییەدا
بەڕێز نێچیرڤان بارزانیی وەک دەمڕاست و گوتەبێژی دەوڵەتی ترک و رووداو
تی ڤی وەک زمانڕەوشی رژێمی ترک لێدوان دەدا و، دڵنیایی دەدات بە کوردی
باکوور، ئاماژە بە نیازپاکیی کاربەدەستانی ترک بۆ پرسی ئاشتی دەکا،
داوا لە پێ کێ کێ دەکات گوێ لە بڕیاری سەرۆکیان بگرن و، چەک دابنێن!
وەک ئەوە وابێ بەڕێز نێچیرڤان بارزانیی خەڵکی کوردستان نەبێ، مێژووی
ترک نەزانێ و لە ناخی بیری رەگەزپەرستیی رژێم و کۆمەڵەگەی ترک
تێنەگەیشتبێ و، بە کووریی بیری لەوە نەکردبێتەوە ئەو کارەساتانەی
داهاتووی نێزیک بەسەر باکووری کوردستان دەهێندرێنەوە، ئۆباڵی ئەویش
دەگرێتەوە و لەلایەنی مێژووییەوە بەرامبەر گەلەکەی سووچبار دەبێ! دیارە
کاک نێچیرڤان بە تەنێ نییە و، زۆرینەی حیزبەکانی باشووری کوردستان بۆ
ئەوەی لەم پرۆسە مێژووییە بێبەش نەبن و ناویان بچێتە ناوانەوە،
پشتیوانیی خۆیان بۆ پەیامەکەی عەبدوڵلا ئۆجەلان دەربڕیوە!
دۆخی ئیمڕۆکەی ترکیا لە بارودۆخی سیاسی و کۆمەلایەتیی سالانی
نەوەدەکانی سەدەی رابردووی ئەفریقای باشوور دەچێ، کە سەرکۆماری رژێمی
رەگەزپەرستی وڵات بە ناوی
''فرێدریک وێڵم د. کلێرک
- Frederik Willem de Klerk'' دوای دوو سەت ساڵ بە کۆیلەکردنی زۆرینەی رەشپێستی وڵاتەکە، ساڵی
١٩٩٣ بڕیاریدا کۆتایی بە سیستەمی ئاپارتاید بهێنێ، بۆ ئەمەش نێلسۆن
ماندێلا سەرۆکی خەباتی رزگاریخوازانەی رەشپێستەکان دوای ٢٧ ساڵێک لە
بەندیخانە ئازاد کرا، دوو بە دوو کەوتنە گفتۆگۆی چڕ بۆ گۆڕینی سیستەمی
سیاسیی وڵات کە هەردوو رەگەز وەکیەک تێیدا بەشدار بن، یاسای بنچینەیی
وڵات گۆڕدرا و، ساڵی ١٩٩٤ نێڵسن ماندێلا لە هەڵبژانردنی ئازاد و
دێمۆکراتیک بوو بە یەکەم سەرکۆماری رەشپێستی وڵات. بەڕێز فرێدریک
ویلیام بە فەرمیی داوای لێبوردنی لە رەشپێستەکان کرد کە بە هۆی سیاسەتی
رەگەزپەرستانەی رژێمەکانی یەک لەدواییەکی سپیپێست زیانی زۆریان پێگەیوە!
لێ رژێمی ترکیای رەگەزپەرست تەنانەت بۆ خاپاندنی کوردیش بووە، ئامادە
نین بچووکترین پەیامێک بۆ نەتەوەی کورد بڵاوبکەنەوە. بەردەوام
پەیامەکەی ئۆجەلان بە عععمێژووییعع لە قەڵەمدەدەن، کەچی رێگەی پێنادەن
فیلمی لێبگیرێ و لە رێگەی کامێراوە لە گەڵ رێکخراوەکەی و گەلی کورد لە
باکووری کوردستان بۆچوونی بڵاوبکاتەوە. لەنێو کاربەدەستانی ترک چ باسێک
لە گۆڕینی یاسای بنچینەیی ولات و داننان بە مافی کورد لە چوارچێوەی
ترکیا نەکراوە و ناکرێت، ئەوی ئێمە لە کاربەدەستانی ترکی دەبیسین، قسەی
سەرزار و بنزاریان داوا دەکەن پێ کێ کێ رێز لە بڕیاری سەرۆکیان بگرن
چەکدانێن، بەوەش، ولات پێدەنێتە ترکیایەکی بێ تێرۆرەوە!!؟
بۆ رێگرتن لە هەرەسهێنانی بزاڤی رزگاریخوازانەی باکووری کوردستان، بۆ
رێزگرتن لە خوێنی دەیانهەزار شەهیدی کوردستان، بۆ رێزدانان لە هەزاران
گیراوی کورد لە بەندیخانەکانی ترکیا لە ژێر ئەشکەنجە و بێڕێزیی
بەردەوامدان، سەرۆکایەتی و ئەندامان و هێزی گریلای پێ کێ کێ پێویستە
لەسەریان، گۆڕانێکی بنەڕەتیی بکەن لە بەرنامە و رامانی رێکخراوەکە، واز
لە بیرۆکەی چەوت و سەقەتی دێمۆکراسی بۆ ترکیا و رۆژهەڵاتی ناڤین
بهێندرێ، بڕیاری یەکلاکەرەوە بدەن بۆ درێژەپێدان بە خەباتێکی چڕتر و
بەهێزتر لەپێناو ئامانج و ستراتیژی نەتەوەیی کوردستان، ئەمەش پێویستی
بە کۆنگرەیەکە رای گشتیی کوردستان و دەرەوەی کوردستان و داگیرکەرانی لێ
ئاگادار بکرێتەوە. ئەوانەی لەنێو پێ کێ کێ خۆیان بە دەروێشی بەڕێز
ئۆجەلان دەزانن و شوێن بەیت و بالوورەی دێمۆکراسی بۆ ترک دەکەون، با
واز لە پێ کێ کێ بهێنن و بگەڕێنەوە باوەشی رژێمی ترکیا. سەردەمی بیری
تاکپەرستی و حیزبپەرستی و سەرۆکپەرستیی بەسەر چووە، کەس پیرۆز نییە و،
کەس لەسەرووی نەتەوەی کورد و ئامانج و بەرژەوەندیی کورد و شەهیدانی
بێئەژماری نەتەوەی کوردەوە نییە!
بێگومان هەموو ئەندامانی دڵسۆز و نیشتمانپەروەر لە نێو پێ کێ کێ
باوەڕیان بەم پرنسیپە نەتەوەییانە هەیە و دەزانن کێشەی کورد لەگەڵ
داگیرکەرانی، کێشەی خاک و نەتەوەیەکی داگیر و دابەشکراوە، کێشەی
نەبوونی ناسنامە و بێخاوەنکردنییەتی لە نیشتمان و سەروەری و بڕیاردانی
سیاسی و، تاڵانکردنی کان و کانزا و بەربووی و زمان و کەلەپوور و مێژووی
راستینەی هەزارانسالەی، لە بەر ئەوە تەنێ بەدەرکردنی داگیرکەران لە
کوردستان کورد دەبێتە خاوەنی ماف و خاک و سەروەریی سیاسیی خۆی. ئەوەی
لە ولاتانی داگیرکەر چ چەشنە رژێم و دەوڵەتێک فەرمانڕەوان پێوەندیی بە
کوردەوە نییە و سەرقاڵکردنی کورد بە کێشەی نێوخۆیی وڵاتانی داگیرکەرەوە
لادان و دوورکەوتنەوەیەتی لە خەباتی رەوا و ئامانجی راستینە و مێژوویی
نەتەوەی کورد.
کوردستان بە هۆشیاریی نەتەوەیی رۆڵەکانی لە بەرامبەر پیلانی داگیرکەران
و سیاسەتکاری کورتبینی کورد دەپارێزرێت!
٢٨\٢\٢٠٢٥
ماڵپه‌ڕی سیروان کاوسی
|
