٢٣\٥\٢٠١٢

بانگەک ژ بۆ کۆمەلگەھا ناڤنەتەوی - دڤێ کورد و مافێن وانێن رەوا نەیێن پاشگوھکرن.

مەکسیم ئیسا      

پێشڤەچوونێن داوی د ئەنجوومەنا نشتیمانییا سووری دە بوون جھێ ئەندیشەیێ، نەخاسم کو پرانیا نوونرێن کوردان خوە ژێ ڤەکشاند، ژ بەر کو داخوازێن وان ھاتن پاشگوھکرن. داخوازێن کوردان د سووریا پێشەرۆژێ دە پشتی ھلوەشینا رێژیما ئەسەد ئەڤن:

١- پێکانینا چاکسازیێن کو وەکھەڤیا د ناڤبەرا پێکھاتەیێن گەلێ سووری دە تەڤی تێڤەلیا وییا نەتەوی و ئۆلی مسۆگەر بکن.
٢- رێدایینا ب پرلایەنیتیا رامیاری و پارتیتی.
٣- دامەزراندنا ئەنجوومەنەکە نشتیمانی و کۆمیتەیەکێ، کو تێ دە ھەموو پێکھاتەیێن گەلێ سووری ب تێڤەلیا تۆفێن خوە بەشدار بن، دا کو دەستوورەکی نوو ژ وەلێت رە ل سەر بنگەھنە دەمۆکرات بێتە دانین، کو ڤەناسینا ب تێڤەلیا نەتەوی و ئۆلی، ئازادیێن گشتی، نەخاسم ئازادیا نێرین، دەربرین و راگھاندنێ، پرلایەنیتیا رامیاری و جوداکرنا دەستھلداریان مسۆگەر بکە. ھەروھا دانینا یاسایەکە ھەمدەمی ژ بۆ ھلبژارتن و پارتیان و ئاڤاکرنا کۆمارا یاسایێ ل سەر بنگەھا نەناڤەندیا رامیایی و دانینا بنگەھێن کۆمارەکە فەدەرال. دڤێ کو دەستوور پاراستنا ھندەکاھیێن نەتەوی و ئۆلی و مافێن وانێن بنگەھین مسۆگەر بکە. ھەروھا دڤێ راپرسینەکە گەلێری ل سەر دەستوور چێ ببە، دا کو خەیسەتا رەواییێ وەرگرە و بێتە ئەرێکرن.
٤- چارەسەرکرنا دۆزا کوردی ب شێوەیەکی دەمۆکرات و دادمەند د چارچەوەیا یەکیتیا وەلێت دە ل سەر ڤان بنگەھێن ژێرین:

- ئەرێکرنا مافێ چارەنووسی ژ بۆ گەلێ کورد ل سووریێ.
- مسۆگەرکرنا بەشداریا کوردان د ژیانا رامیاری و ئابۆری د وەلێت دە.
- مسۆگەرکرنا ڤەگەرینا ھەموو کۆچبەرکریێن کورد ژ بۆ ناڤچە و وارێن خوە.
- پاشەکدایینا زیانا کو گھایە جۆتکارێن کورد،یێن کو رێژیمێ ئەو ژ زەڤی و ئارزیێن وان بێپار کرن و ئەو ژ ناڤچەیێن وان ب زۆرێ دوور خستن.
- تونەکرنا پرۆژەیا کەمبەرا ئەرەبی،یا کو د ریا وێ رە زەڤیێن جۆتکارێن کورد ژ وان ھاتن ستاندن و ژ بۆ ھن جۆتکارێن کو ژ ناڤچەنە دن ھات بوون بجھکرن، ھاتن دایین و داگروار ژ وان رە ل ناڤچەیێن کوردی دە ھاتن ئاڤاکرن.
- ڤەناسینا دەستووری ب گەلێ کورد ل سووریێ و ب مافێن وییێن نەتەوی و چاندی.
- رێدایینا دانووستاندنا ب زمانێ کوردی و ڤەکرنا دبستان و زانینگەھێن کوردی.
- ڤەگەراندنا ناسنامەیێ ژ بۆ کەسێن بێناسنامە و ڤەناسین ب ھەموو مافێن وان مینا وەلاتیێن دن.
- ڤەوەژاندنا ناڤچەیێن کوردییێن کو ژ پاشکەتن، گوھنەدانا ب مەبەست ژ ئالیێ رێژیمێ ڤە دنالن.

داخواز و مافێن رەوایێن کوردان ھەیا ئانھا تێنە پاشگوھکرن و ئەڤ یەک کووربوونا ھێز و ئاکاما ترکی ل سەر رکبەریا سووری باش زەلال دکە. د دەستپێکا شۆرەشا سوورییا ل دژی چەوساندن و رسواکرنا رێژیمێ ژ ملەت رە، ترکیێ خوە مینا ناڤبەرۆکەکی د ئاریشەیا سووری دە ددا ناسین. پاشێ خوەست ب رۆلا پشتگر ژ رکبەریێ رە رابە. ئەڤ لڤ و لەباتا ترکیێ نە ژ بۆ بەلاڤکرنا دەمۆکراسی و پشتەڤانیێ د ناڤچەیێ دەیە، لێ بەلێ ژ بۆ بھێزکرنا رۆلا خوەیا ھەریمی ڤێ یەکێ دکە. ئەو دترسە، کو رۆلەکە کوردان د سووریا نوو دە ھەبە،یا کو گەرەک کۆمارەکە دەمۆکرات بە و ھەروھا دترسە، کو ئەڤ یەک ل وێ ب ئاوایەکی نە ئەرێنی ڤەگەرە. ژ بەر وسا رکبەریا کوردییا سووری ب چاڤەکی ترسۆک ل فرەھبوونا رۆل و ھێزا ترکی ل سەر ئەنجوومەنا نشتیمانییا سووری دنێرە.

دڤێ کۆمەلگەھا ناڤنەتەوی و کۆمارێن ئەورۆپی کار بکن و رێ نەدن، کو مافێن ھندەکاھیان د سووریا پێشەرۆژێ دە بێنە پاشگوھکرن، ژ بەر ئەو سووریا پێشەرۆژێ دێ ب ھێمنی و پێشڤەچوونێ شا نەبە، بێیی ڤەناسین و مسۆگەرکرنا دەستووری ژ بۆ مافێن کوردان و ھندەکاھیێن دنێن د وەلێت دە.

ژ بەر ڤێ یەکێ دڤێ پشتەڤانیا رکبەریا کوردی ژ بۆ دەمۆکراسی و مسۆگەرکرنا مافێن گەلێ کورد ل سووریێ بێتە کرن.

ناڤەندا کوردی ژ بۆ لێکۆلین و راوێژکاریا یاسایی - یاسا