|
با نووکى
خامەکانمان بۆ جوانکردنى یەکتربێ ... نەک !!!
بەهرەوەر مەرزانى
هەر لەسەرەتاى دەستپێکردنى بانگەشەى هەڵبژاردنەکانى کوردستانەوە جۆرێک
لە گرژى و ناکۆکى قوڵى نێوان پارت و لایەنە سیاسیەکان خزایە نێو
نووسەران و رۆشنبیرانى گەلەکەمان کە لەبرى ئینتیما بوونیان بۆ نیشتمان
و نەوتەوەکەیان بەرژەوەندیییە تایبەتیەکانى خۆیان خستە پێشەوەى هەموو
دڵسۆزیەک بۆ گەل و نیشتمان و کەوتنە نێو گێژاوى شەڕى ناو زڕاندن و
جنێودان و لەکەدار کردنى خەبات و تێکۆشانى یەکترى .
ئەوەى مایەى خۆشحاڵى من و هەموو خەڵکى کوردستان بوو ئەو چەند رۆژەى
بانگەشەى هەڵبژاردنەکان بوو کە هەر یەکەو بەجۆرێک گوزارشتى لە راى خۆى
و بانگەشەى بۆ لیستەکەى دەکرد ، وەلێ ئەفسوس ئەوەى من بۆى نیگەران بووم
و ئەسەفى زۆرم بۆ دەخوارد ئەو نووسەرو رۆشنبیرە لاوازانە بوون کە
بەنووکى خامەکانیان کەوتبوونە وێزەى یەکترى و لەبرى هۆشیارکردنەوەى
خەڵکى ستەمدیدەى کوردستان و هاندانیان بۆ بەشداریکردن لە هەڵبژاردنەکان
بەشمشێرو تەورى وشەکانیان یەکتریان دەبڕیەوە .
لێرەدا من مەبەستم هەموو نووسەران و رۆشنبیرانى وڵاتەکەم نییە چونکە
هەر یەکێک لە ئێمە لە پاڵ ئینتیماى نیشتمانى و نەتەوەییمان ئینیما یان
سۆزمان بۆ پارت و لایەنێک هەیەو ئەمەش مافێکى سروشتى هەموو مرۆڤێکە ،
بەڵکو مەبەستم ئەو نووسەرە سەقەت و کەم ئەزموومانەیە کە نەیاندەتوانى
بەشێوەیەکى شارستانى و مەدەنیانە مامەڵە لەگەڵ بارودۆخەکەدا بکەن و پڕو
پاگەندە بۆ لیستى خوازراوى خۆیان بکەن ، لەبەرامبەردا ناچار دەکەوتنە
جنێودان و شتى سەیرو سەمەرەو دروستکردنى ناکۆکى لەنێوان خەڵکى کوردستان
و نانەوەى دووبەرەکى کە هەموو ئەمانەش جگە لەبەرژەوەندى داگیرکەرانى
کوردستان هیچى ترى بۆ گەلەکەمان تێدا بەدیناکرێت .
ئەوەى جێگەى نیگەرانى زیاترە دواى تەواو بوونى پرۆسەکەش کە لە پاڵ
هەموو کەم و کوڕیەکانى سیمایەکى شارستانیانەو سەردەمیانەى بە
میللەتەکەمان بەخشى کەچى تا ئێستا خامەى هەندێ لەنووسەران لەجنێودان و
شەڕ فرۆشتن نەکەوتوون و هەر بە زمانى زبر مامەڵە لەگەڵ بارودۆخەکەدا
دەکەن ، بێگومان ئەمەش مەترسیەکى گەورەیە بۆسەر ئەزموونى گەلەکەمان و
دیموکراتیەت لەو بەشە بچوکەى کوردستان کە بەخوێنى هەزاران لە رۆڵەکانى
گەلەکەمان بەدیهاتووە ، بۆیە پێویستە نووسەران و رۆشنبیرانى کورد وەک
ئەرکێکى نیشتمانى و نەتەوەیى لە برى وشەى ناشیرین و بریندار کردنى
یەکترى قۆڵى کوردانەى لێهەڵکەن و نووسین و وشەکانیان بۆ پاراستنى
دەسکەوتەکانى خەڵکى کوردستان بێت ، با هەموومان نوکى خامەکانمان بۆ
جوانکردنى یەکتربێت نەک ئەزموونەکەمان بخەینە ژێر تانەى دوژمنان و
ناحەزانى گەلەکەمان .
Bahrawar_s@yahoo.com
|
