٥\٦\٢٠٢٢

بە بۆنەی رۆژی جیهانیی منداڵانەوە.

عەلی حەمەڕەشید    

منداڵە خۆشەویستەکان، هاوڕێ ئێسک سووک و گوڵڕووەکانم.

ئای کە ئەم ژیانە بە ئێوەوە جوان و رەنگین و ڕازاوەیە، ئێوە پڕن لە هەموو جوانییەکان، بناغە دانەری کۆمەڵگەن، رووناکییەکی خۆر ئاسای نەکوژاوەن بۆ شانۆی ژیان. چەندە سەرنجڕاکێشە کە دەبینین بە پەنجە نەرم و ناسک و وردیلەکانتان تابلۆی دڵگیری سروشتی کوردستان دەکێشن، بە کەمانچە و پیانۆ و گیتار ئاوازی خۆش خۆش لێدەدەن، لەسەر پەڕاوەکانی بەردەستتان بە وشەی گوڵ هەناری هیوا و حەز و خەون و ئەندێشەکانی ناختان وێنا دەکەن بە راستیی و راستگۆیی. چەندە خۆشە لە رۆژی جیهانیی منداڵانیشدا ئێوەی منداڵانی کوردیش وەکو منداڵانی جیهان خەونەکانتان باڵاتر و گوڵی هیواکانتان گەشاوەتر و خۆشییەکانتان بێسنوورتر بێ. چونکە پتر هەست بە بوونی خۆتان و رۆژی خۆتان و جیهانە رەنگاڵەییەکەی خۆتان دەکەن. خونچەی لێوەکانتان بە نمەی زەردەخەنە و دڵە بچکۆلەکانیشتان بە شنەی شادیی پتر دەگەشێتەوە.. پیرۆزە ئەو رۆژە لە ئێوە.

ئەم هۆنراوەیەش دەکەم بە دیاریی بۆ سەرجەم منداڵان:

رۆژی خەون و جوانی.
وا رۆژی منداڵانە
گشت دڵخۆشین بە جارێ
نم نم بارانی شادی
بە رووماندا دەبارێ.
 *   *   *
ئاهەنگ و فیستیڤاڵی
مۆزیک و گۆرانییە
چونکە جیهانی ئێمە
پڕ لە خەون و جوانییە.
 *   *   *
خۆشیی وەکو شنەی با
دڵی کردووین بە هەوار
گۆرانی بۆ ژین دەڵێین
ئێمەی ژیکەڵە و نازدار.
 *   *   *
بە دەنگی ناسک و خۆش
دەکەوینە گفتوگۆ
خۆزگەکانمان دەردەبڕین
بە هێمنیی و لەسەرخۆ.
 

ماڵپەڕی عەلی حەمەڕەشید