٢٧\١\٢٠١٨

بە هەزارن کەس لە لەندەن و کۆڵن

هێرشی تورکیا بۆ سەر عەفرین و

سیاسەتی نێودەوڵەتییان شەرمەزار کرد.
 

ئەوڕۆ ٢٧\١\٢٠١٨ پاش هەفتەیەک لە هێرشە دڕندانەکەی سوپای ئەردۆگانی دیکتاتۆر و داگیرگەری کوردستان بە هاوکاریی گرووپە تیرۆریستە ئیسلامییەکانی نێو سوریا بۆ سەر شاری عەفرین.. هەزاران کەس لە کوردانی هەموو پارچەکانی کوردستان و دۆستەکانیان لە هەردوو وڵاتی بەریتانیا و ئەڵمانیا رژانە سەر شەقامەکانی لەندەن و کۆڵن.
 

لەندەن - بەریتانیا - ٢٧\١\٢٠١٨                                      کۆڵن - ئەڵمانیا - ٢٧\١\٢٠١٨        

بێجگە لەوەی بە دەیان دروشمی سەربەخۆخوازیی و دژ بە شەڕ و داگیرکارییان لە بەرانبەر حکومەتە ملهوڕ و فاشیستە ئیسلامییەکەی تورکیا بەرزکردەوە.. سەرجەمی ئەو وڵاتانەشیان ریسوا و شەرمەزار کرد کە هەر یەکەیان بە پێی بەرژەوەندیی تەسکی مادیی و رامیاربازانە و دژەمرۆییانەیان چاو لەو هێرشە هۆڤانەییەی تورکیا دەنوقێنن یان راستەوخۆ پشتگیریی دەکەن بە تایبەتییش وڵاتە زلهێزەکان، هەروا زۆر بە توندیی هۆشدارییان دایە نەتەوە یەکگرتووەکان و هەموو ئەو رێکخراو و کۆڕ و کۆڕبەندە جیهانییانەی کە خۆیان بە پارێزەی مافی مرۆڤ و دیموکراسییەت و ئازادییەکانەوە دەزانن کەچی لە بەرامبەر ماف و ئازادییەکان و سەربەخۆیی گەلانی چەساوەی کوردستان بێدەنگیی هەڵدەبژێرن و وەک ئەسپی شەترەنج لە لایەن وڵاتە چەوسێنەر و داگیرکەرەکان بە تایبەتییش وڵاتە زلهێزە ملهوڕەکان یارییان پێدەکرێ.

ئیدی پێویستە ئێستا سەربەخۆخوازانی میللەتەکەمان لە هەموو پارچەکانی کوردستان لە پاش کارەساتەکانی شەنگاڵ و کەرکووک و سووری ئامەد و کۆبانێ و عەفرین و هێرشی دڕندانەی کۆماری سێدارەی ئیسلامیی ئێران بۆ سەر شار و شارۆچکەکانی رۆژهەڵات... باش لەوە تێبگەن کە بێجگە لە خۆیان و هێندەک کەسی کەم لە نێو میللەتانی دراوسێ و میللەتانی جیهان کە مافی مرۆڤیان بۆ گرنگە هیچ کەس و لایەنێکی دیکەی دەسەڵاتدارانی وڵاتان و رێکخراوە جیهانییەکانی بە ناو مافی مرۆڤ و دژە شەڕ و بەرگرییکەر لە ماف و ئازادییەکان و یارمەتییدەری گەلە هەژار و بندەستەکان بە هانایانەوە نایێن.. دەبێ بە دەستی خۆیان ماف و ئازادییەکانیان وەدەستبهێنن و چیدیش گوێ لە حیزب و لایەنە کوردییەکان رانەگرن کە بەرژەوەندی تەسکیی حیزبیی و خێڵەکیی و بنەماڵەیی و دینیی و ناوچەگەریی و کۆنەپەرستیی و چەتەگەریی و پیاوسالاریی و کەسیی کوێری کردوون، بەڵکە دەبێ خۆیان یەکگرتووانە بێنە نێو گۆڕەپانی خەبات و بە بێ جیاوازیی پشتیوانیی لە بەرخۆدانی گەریلایەکانی باکوور و شەرڤانانی رۆژاوا و پێشمەرگە و شەرڤانانی رۆژهەڵات بکەن چونکە تەنیا ئەوانن پارێزگاریی لە شکۆمەندیی و ماف و ئازادییەکانیان دەکەن.. ئاسۆی سەرکەوتنیش زۆر نزیکە.

٢٧\١\٢٠١٨
ئەمڕۆ