په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٤\٦\٢٠١١

به‌کارهێنانی چه‌کی کیمیاویی له‌ ململانێی ناوخۆیی ئیتر تاوانی جه‌نگه‌.


که‌سوکاری قوربانیانی شاری سه‌رده‌شت..
جه‌ماوه‌ری کوردستان..
پارت و ڕێکخراوه‌ کوردستانییه‌کان..

هه‌موومان ئاگادارین 24ساڵ پێش ئێستا ، له‌ به‌رواری 28-6-1987 فڕۆکه‌ مه‌رگهێنه‌ره‌کانی به‌عسی فاشی ، کاتژمێری 4،30 سه‌ر له‌ ئێواره‌ ژه‌هری قینی خۆیان به‌سه‌ر خه‌ڵکی کورد په‌روه‌ری شاری سه‌رده‌شتی قاره‌مان و گوندی ڕه‌شه‌ هه‌رمێ و ده‌وروبه‌ریان باراند ، 4 فڕۆکه‌ی مه‌رگهێنه‌ر ، به‌م تاوانه‌یان ، زیاتر له هه شت هه‌زار هاووڵاتی سڤیلی ئه‌م ده‌ڤه‌ر و شاره‌یان شه‌هید و بریندارکرد ، چه‌ندین خێزانیان له‌ بنه‌چه‌وه‌ پاککرده‌وه‌ ، تاکو ئێستا زیاتر له‌ 1000 هاووڵاتی بونه‌ته‌ قوربانی ئه‌و تاوانه‌ نامرۆڤانه‌یه‌ .


له‌ کاتێکدا ئێمه‌ یادی 24 ساڵه‌ی ئه‌و تاوانه‌ ده‌که‌ینه‌وه‌ ، هێشتا مه‌رگه‌ساتی سه‌رده‌شت نه‌بۆته‌ دۆزێک بۆ تاوانبارانی به‌غدا و له‌ رێگای خه‌مخۆرانی شاری سه‌رده‌شت مام عه‌لی ره‌حیمی ئه‌ندامی جێی شانازی رێکخراوه‌که‌مان هه‌وڵی جدی بۆدرا ، هێشتا برینداره‌کانی ئه‌م شاره‌ له‌ ئێش و ئازاردا ده‌ژێن و چاره‌سه‌ری پێویستیان بۆ نه‌کراوه‌ ، هێشتا ونبوه‌کان نه‌دۆزراونه‌ته‌وه‌ ، هێشتا له‌ لایه‌ن ڕه‌وه‌ندی کوردی و لایه‌نه‌ سیاسییه‌کان به‌ تایبه‌ت له‌ خۆرهه‌ڵاتی کوردستان و ده‌زگاکانی ڕاگه‌یاندنه‌وه‌ گرنگی به‌م مه‌رگه‌ساته‌ گه‌وره‌یه‌ نادرێت ، هێشتا سه‌رده‌شتییه‌کان به‌ ته‌نها یادی قوربانییه‌کانیان ده‌که‌نه‌وه‌ و له‌ شیندا هاوڕێیان بێکه‌سن.


ئێمه‌ له‌ رێکخراوی چاودێری کوردۆساید که‌ یه‌که‌م ده‌زگای کوردی بووینه‌ گرنگیمان به‌م یاداوه‌رییه‌ داوه‌و له‌ 8 ساڵی ڕابردوه‌وه‌ ، ساڵانه‌ یادمان له‌ قوربانیانی سه‌رده‌شت کردۆته‌وه‌ ، له‌ یادی 24 ساڵه‌ی ئه‌م تاوانه‌دا ، داوا له‌ هه‌موو لایه‌ک ده‌که‌ین ، ئه‌مساڵ ڕۆژی یاداوه‌رییه‌که‌ بکرێته‌ ڕۆژێک بۆ ڕسواکردنی دوژمنانی گه‌له‌که‌مان و به‌کارهێنانی چه‌کی کۆمه‌ڵکوژی کیمیاوی و هاوپشتی له‌گه‌ڵ داواکارییه‌کانی خه‌ڵکی ئه‌م شاره‌ .

تاوانی کیمیاباراکردنی شاری سه‌ره‌شت وه‌ک له‌دادگای تاوانباری بازرگانی مه‌رگ فرانس ڤان ئانرات دیاریکرا به‌تاوانی جه‌نگ،هه‌ردوو تاوانی نێونه‌ته‌وه‌یی جه‌نگ وتاوانی دژ به‌مرۆڤایه‌تی له‌خۆ ده‌گرێت ،نه‌کردنه‌وه‌ی دۆسیه‌ و سزا نه‌دنی تاوانبارانی ئه‌م تاوانه‌ نێونه‌ته‌وه‌ییه‌ تاوانێکی دیکه‌یه‌ به‌رامبه‌ر به‌خه‌ڵکی ئه‌مشاره‌ .

خۆشبختانه‌ له‌کاتێکدا یادی 24 ساڵه‌ی ئه‌م تاوانه‌ ده‌که‌ینه‌وه‌ ،پارساڵ له‌کۆنگره‌ی دادگای تاوانی نێوده‌وڵه‌تی له‌شاری که‌مبالای ئۆگه‌ندا "31-5 بۆ 10-6"،به‌کار هێنانی چه‌کی کیمیاوی له‌ململانێ ناوخۆییه‌کان وه‌ک تاوانی جه‌نگ په‌سه‌ندکرا ،ئه‌مه‌ش به‌هه‌نگاۆکی مه‌زن بۆ مرۆڤایه‌تی ده‌زانین بۆ قه‌ده‌غه‌کردنی چه‌کی کیمیاوی له‌جیهاندا و بنه‌بڕکردنی بۆ هه‌تا هه‌تایه‌ ،هه‌نگاوێکی مه‌زنه ‌بۆ دوباره‌ نه‌بونه‌وه‌ی (هه‌ڵه‌بجه‌کان وسرده‌شته‌کان،شێخ وه‌سانانه‌کان وگۆپته‌په‌کان و زه‌رده‌کان،سوێیسنانه‌کان و.....هتد ، )) ئه‌م سه‌رکه‌وتنه‌ له‌مرڤایه‌تی پیرۆز بێت )) .

پارت و ڕێکخراوه‌ سیاسییه‌کانی خۆرهه‌ڵاتی کوردستان

بێده‌نگی ئێوه‌ له‌ ئاست ئه‌م دۆزه‌ گرنگه‌ و گرنگی نه‌دانتان به‌م کاره‌ساته‌ گه‌وره‌یه‌ و کاره‌ساته‌کانی دیکه‌ی تاوانه‌ نێونه‌ته‌وه‌ییه‌کان که‌ به‌سه‌ر گه‌له‌که‌مان له‌ رۆژهه‌ڵاتی کوردستان هاتووه‌ ، مایه‌ی نێگه‌رانی ئێمه‌و خه‌ڵکی شاری سه‌رده‌شت و گوندی ڕه‌شه‌ هه‌رمێ و ته‌واو قوربانیانی کۆمه‌ڵکوژییه‌ له‌ ڕۆژهه‌ڵاتی کوردستان ، بۆیه‌ داواتان لێده‌که‌ین با هه‌موومان یه‌کگرتووانه‌ گرنگی به‌و دۆسیانه‌ بده‌ین ،گرنگییه‌ک له‌ ئاستی گه‌وره‌یی تاوانه‌کان و ژماره‌ی قوربانیانیان و و تێکۆشه‌ری و مێژووی پڕ له‌ شانازی شاری سه‌رده‌شتدا بێت.

 


چاودێری کوردۆساید
www.kurdocide.com
kurdocide@hotmail.com
28\6\2011

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک