٢٢\٤\٢٠١١

بێمافیى خەڵک لە نێو مەنگەنەى رژێمى فەرمانڕەوایى رەش و دەسەڵاتخوازیى ئۆپۆزیسیۆنى تاریکدا.

هیوا رەش     

زمانى فیکر غائیبە و کێردى زەبر و زەنگ لە سەر زمانى دیالۆگ ئەبریسکێتەوە ، داواى خەڵک پێشێل کراوە و شەڕ و ململانێکان فڕێ دراونەتە گۆڕەپانى خۆپیشاندەرانەوە ، سیاسەتچییەکانیش خاوەن مافیان وەلا ناوە و خۆیان چوونەتە نێو گەمەیەکى گەرمى دۆڕان و بردنەوەدا ، لەم هاوکێشە پڕ کێشمەکێشەدا لە سەر مێزى قومارى سەرکردەکان بادەى پڕ خوێنى لاوانمان نۆش ئەکرێت و گرەو لە سەر مافە زەوتکراوەکانیان ئەکەن .

دواى بیست ساڵ لە دزى و تاڵانیى ، دەسەڵاتدارانمان هەموویان دەستپاکن و یەکێَکیان نەکەوتنە نێو قەفەسى تاوانەوە و دادوەرێک لێیانى نەپرسیوەتەوە ( ئەمەت لە کوێ بوو ؟ ) ، بیست ساڵە خاکمان ئەدۆشن و خوانى خۆ بە هەرزان زانیى بۆ کۆمپانیا دەرەکییەکان ئەڕازێنرێتەوە و بۆندى خوێن مژینى خەڵک واژۆ ئەکرێت و هێشتا خۆیان بە نیشتمانپەروەر و خەڵک بە گێرەشێوێن و ئاژاوەگێڕ ناوزەد ئەکەن ، ئەمەیە ئەڵێن : (( هەتا خاوەن ماڵ دزى گرت ، دز خاوەن ماڵى دایە دادگا )) .

پێویستە ڕَۆژێک زووتر چاکسازیى بنەڕەتیى لە خۆیاندا بکەن و لە سەر پشتى ئەزمونى وەدەست هاتووى ڕەنگین بە خوێنى شەهیدان و ئەنفال و کیمیا باران بێنە خوارێ و دەسەڵات ڕادەستى گەل بکەنەوە و ماڵ بۆ خاوەنەکانى بگێڕنەوە و پەند لە مێژوو وەر بگرن و بەر لەوەى بە سۆنگەى گەندەخۆرانەوە ڕیسەکەمان لێ ببێتەوە بە خورى با نسکۆى کۆمارى کوردستان دووبارە یەخەمان پێ نەگرێتەوە و نەکرێتە قوربانیى بۆ بنەماڵە بە حیزب کراوەکان .

زمانى فیکر غائیبە و کێردى تۆڵە لە سەر زمانى دیالۆگ نراوە و داواى خەڵک زەوت کراوە و کۆنە قینى خۆیان خستۆتە مەیدانى ناڕەزایەتى جەماوەرەوە ، سیاسەتچییەکانى ناڕازى لە بەشى خۆیان و چاویان مۆلەقە بۆ کورسى هاوپیشە گەندەڵەکانى ڕابردوویان و ڕایئەگەیەنن (( یان ئۆینەرەم یان زیفلەرەم - یان یارى ئەکەم یان تێکى ئەدەم )) ، بوونەتە دەم و دەست و سەر و ڕیش سپى و نە بایان دیوە و نە باران ، خەون بە مەرگ و خوێنەوە ئەبینن و بیر لە دامەزراندنى ئەمارەتى بیارە ئەکەنەوە و لە سەر مێزى دانوستان لەگەڵ دەسەڵاتدا بۆ وەدى هێنانى مشتێک دۆلارى زیاتر و بڕێک دەسەڵاتى فراوانتر ئەڵێى بە دەم مەلائیکەتەوە پێ ئەکەنن و قومار بە خوێنى مناڵ و لاوانى نیشتمانەوە ئەکەن و بیرى خۆیان ئەبەنەوە کە بێشەرمانە فوویان بە زوڕناى دەسەڵاتدا کرد و بە هەمان گوفتارى بێشەرمانەى ئەوان بە خۆپیشاندەرانیان ووت : گێرەشێوێن و ئاژاوەگێڕ ، کەچى ئێستا بە ناچاریى بۆ گەییشتن بە مەرامى گڵاو فرمێسکى تیمساحییان بۆ ئەڕێژن ، بۆیە هەقى وایە پەندى (( ناچاریى سەر بە ماڵى دوژمندا ئەکات )) بگۆڕن بە (( ناچاریى سەر بە ماڵى گێرەشێوێن و ئاژاوەگێڕ ئەکات )) ، ئەگینا ئەبوو ئێستا ڕووگیر بوونایە و باسیان لەوە نەکردایە کە پشتیوانى لە داواى شەقام ئەکەن ، چونکە ئەوان بوون تۆمەتیان بە سەر شەقامجا بەشاندەوە و ناو و ناتۆرەى نابەجێیان لێ نان .

پێویستە ڕۆژێک زووتر دەست لە بەرۆکى خەڵکى ناڕازیى بەر بدەن و لە سەر پشتى خۆپیشاندانەکانیان بێنە خوارێ و حیزباوى نەکەن و بە ئامانجە تراویلکەییەکانیان دەنگى نەعرەتەى گەروویان نەتاسێنن و داواى ڕەواى خەڵکى زەحمەتکێش بە هەواکێشى حیزبەوە پەلکێشى حوجرە تاریکەکانى سازشى بێ ئەرزش نەکەن .

ئەمبەر و ئەوبەر ، دەسەڵات و ئۆپۆزیسیۆن دوو ڕووى دراوێکى قەڵپى بەدفەڕن ، هەردووکیان دز و گەندەڵن ، کەڵبە تیژ و تینوو بە خوێنن ، پاڵەوانى شەڕى ناوخۆن ، جەللاد و بکوژن ، فسفس پاڵەوانى بیارە و خێڵى حەمە و کەپکى حەمەداغا و کڵاو قاسمن ، خاوەن هێزى ئابورى و ڕاگەیاندن و سەربازین ، لە سیاسەتا ئاوەڕووت و موفلیسن ، بەرامبەر داگیرکاران چۆک دادەر و کۆیلەیەکى ئاست نزمن ، دەستیان بە سەر موڵک و ماڵى خەڵکیدا گرتووە ، ئابڕووى نەتەوە و نیشتمانپەروەرییان بردووە .

قوتابیان و خوێندکارانى خوێن گەرم ، کاتى خۆى پەلەم کرد و لە دوا قۆناغى خوێندندا سەرى خۆم هەڵگرت و خستمە باوەشى سەرکردە ڕوومەت ناسک و پێست پەمەییەکان و بۆ ئەوەى فریاى شۆڕش بکەوم بووم بە پێشمەرگە ، کەچى ئەوان ناوى پیرۆزى پێشمەرگە ڕیسوا ئەکەن ، میوانێکى ڕەزا گرانى جەللادەکانى ژوورەکانى ئەشکەنجەدان بووم و زیندانم کردە ماڵى سەرەکى ڕێگەى خەباتى پاراستنى سەروەریى گەلەکەم ، ئەوەتا ئەم هەرچى و پەرچییانە گەمە بە مێژوومانەوە ئەکەن و سەروەرى گیرفان ئەخەنە سەرووى سەروەریى نیشتمان و زیندانەکانیان تەژییە لە دیلى شەڕى ناوخۆ و بێسەر و شوێن کراوان ، کونجى زیندانەکانیان کردۆتە قەڵاى بەرگریى لە ئارەقەى تکاوى تەوێڵیان و کەچى باس لە مافى مرۆڤ و دیموکراسى و ئازادى و دادپەروەریى ئەکەن ، گەنجان و لاوانى پڕ لە جۆش و خرۆش ، تەواوى تەمەنى گەنجى و لاوى خۆم کردە بەردەبازى سەرکردە چاوچنۆکە پڕ لە خولیاکانى پلە و پایە و بە ویستى خۆم بوومە ماشەى دەستى سەرکردە ناکردە ناکەس بەچە ناسنامە شاراوەکان ، هەورازى تەمەنم بڕى و گەل بە بە قەد پاڵى ئاواتى خۆى نەگەیى ، ئەى ئەوانەى وەکو من هەورازى ژیان ماندووى کردوون و ئێستا بەرەو نشێو گلۆر ئەبنەوە ، وریا بن لە گزى ، دزى ، درۆ ، دووڕوویى ، فێڵ و تەڵەکەبازى و ساختەچێتى سیاسەتچییەکان ، پەچەى ڕوویان هەڵماڵن ، بیرى ڕۆڵەکانتان بهێننەوە کە بە درێژایى تەمەنمان عەباس و هەیاس ، خدر و وەلى ، ئەحە و حەمە ، هەر ئەمانە سەرکردە بوون ، پاڵەوانى کورد کوشتن بوون ، ملکەچى دوژمن بوون ، چاوساغى داگیرکەر بوون ، تاڵانچى و گەندەڵ بوون ، دیکتاتۆرى سەر کورسى بوون ، ئێستا هەندێکیان لە سەر عەرشى دەسەڵات دانیشتوون و هەندێکیشیان زمان بە لێویاندا ئەهێنن و لیک دەر ئەدەن ، ئەیانەوێ جڵەوى نۆرە گەندەڵیى بگرنە دەست ، هەردوولا ، هەمیشە هەندێک ( ڕۆشنبیر ) ى نەفامیان ڕاگرتووە ، ڕاوێژکارى دابەستە ئەلەوەڕێنن ، قەڵەم بە کرێ ئەگرن ، تاوانەکانیان بۆ ئەکەن بە داستان ، شکستییەکانیان بە سەرکەوتن بۆ تۆمار ئەکەن ، نەتەوەپەروەریى ، نیشتمانپەروەریى ، ئازایەتى و قارەمانێتیى ، دڵسۆزى و لێبووردەیى ، ئازایەتى و دەستپاکییان لە سەر تاپۆ ئەکەن ، دەزگاى ڕاگەیاندنى سێرک ئاسایان پڕ کردووە لە بیرمەند و سیاسى و ڕۆشنبیر و نووسەر و هونەرمەندى موهەڕیجى نغرۆ لە پارەى دزراوى گەل و بە شان و باهووى تێکشکاویان هەڵ ئەدەن و بە درۆ خەڵک چەواشە ئەکەن ، تەلەفزیۆنەکانیان کردۆتە تازیە خانەى درۆیینە و بۆ مەرگى قوربانییانى پیاوکوژیى لە سەر دەستى خۆیان فرمێسک ئەبارێنن.

ج - م - ن - ح - ع - س - ق ، ئەم فەرخە دیکتاتۆرانەى گەل و ئەم سیاسییە بچوکە دیموکرات هەزەلییانەى دەربارى دیوەخانى دوژمنان ، دەمێکە سیاسەتیان کردۆتە پیشە و کاسبیى پێوە ئەکەن ، کاتى ئەوە هاتووە بڵێن : ئیتر بەسە و چى تر ڕێگە نادەین بازرگانیى بە خوێنى ئێمە بکەن و خۆ بە دروشمى بریقەدارى ناو بەتاڵەوە با بدەن ، کاتى ئەوە هاتووە بەر لەوەى کش مەلیکتان لێ بکەین ، بتان ڕشێنینەوە ئەو دزییەى بردووتانە و خواردووتانە لە لووت و گەرووتانى بهێنینەوە .

ئۆپۆڵات ( ئۆپۆزیسیۆن و دەسەڵات ) ، گورگن و ئێمەیان کردۆتە مەڕە لات ، ئەوان ڤایرۆسن و دەمیان ژەنیوەتە سامانى وڵات ، بۆ ئەوەى بە مەرام بگەن ، بە یەکتر بە کوشتمان ئەدەن ، ئەوان بازرگانى شەڕن ، ئەوان لە ئاستى ئاشتى و ئارامیى ، دەعبایەکى کەڕن ، دەبا هەموومان پێکەوە بۆ ئازادیى بە ئازادیى دوور لە کۆت و پێوەندى ئەوان پێکەوە بە یەک دەنگ هاوار بکەین ، بژى ئازادى ، بمرێ نادادى.

ماڵپه‌ڕی هیوا ره‌ش