بێنه‌زیر بۆتۆ کوژرا ... ده‌نگی ژن ناکوژرێت .

فـه‌هـد گـرده‌وانی

{{باوه‌ڕناکه‌م هیچ موسڵمانێکی راسته‌قینه‌ هه‌ڕه‌شه‌م لێبکات‌و بمکوژی،چونکه‌ ئیسلام هه‌ڕه‌شه‌کردن
له‌ ئافره‌ت و موسڵمان  کوشتن  قه‌ده‌غه‌ ده‌کات و ئه‌وانه‌ی ئه‌و کارانه‌ بکه‌ن ده‌چنه‌ دۆزه‌خ .}}

ئه‌و ده‌سته‌ی به‌ خوێنی ئه‌نتی[دژی] دیموکراسی سوور بووه‌ ، ئۆقره‌ ناگرێت هه‌تا رۆژانه‌ جه‌رگی میلله‌ت بریندار نه‌کات و تێکۆشه‌رانی شه‌هید نه‌کات . بێنه‌زیر بۆتۆ خۆشی و ئارامی ئینگلیستانی گۆڕیه‌وه‌ به‌و ژیانه‌ سه‌خت و جه‌نگه‌ڵیه‌ی پاکستان . بۆتۆ ویستی په‌یامه‌که‌ی بگه‌ینێت و له‌ناو میلله‌ته‌که‌ی سه‌ربه‌رزانه‌ شه‌هیدبێت بۆیه‌ گه‌ڕایه‌وه‌ وڵات و ده‌ستی کرد به‌ دژایه‌تی کردنی سیسته‌می دژی دیموکراسی و ئیسلامه‌توندڕه‌وه‌کانی تێڕۆڕیست . بۆتۆ ده‌یزانی له‌ناوبردنی به‌ده‌ستی ئیسلامه‌ تێڕۆریسته‌کان ئاسانه‌ و ده‌کرێ له‌ناوی ببه‌ن به‌ڵام سه‌ری خۆی بۆیان نه‌وی نه‌کرد و [بورکه‌]ی له‌سه‌ر نه‌کرد . بۆتۆ وه‌کو باوکی به‌و رێگایه‌دا ماڵئاوایی له‌ پاکستان کرد ، رێگای تێکۆشان له‌پێناوی دیموکراسیه‌ت بۆ پاکستان و ژیانه‌کی ئاسووده‌ بۆ خه‌ڵکی وڵات . بێنه‌زیر بۆتۆ یه‌که‌م سه‌رۆکوه‌زیرانی ژن بوو له‌ وڵاتانی ئیسلامیدا که‌ له‌ هه‌ڵبژاردندا سه‌رکه‌وتنی به‌ده‌ست هێنا . هه‌شت ساڵان له‌ دووره‌ وڵاتی ژیا ، به‌ڵام هه‌رده‌م له‌گه‌ڵ میلله‌ته‌که‌ی ده‌ژیا . ژه‌نه‌ڕاڵ موشه‌ره‌ف [په‌رویز موشه‌ڕه‌ف 11/8/1943 ] داوای لێکرد نه‌گه‌رێته‌وه‌ چونکه‌ ئیسلامه‌ ئیرهابیه‌کان ده‌یکوژن به‌ڵام گه‌راوه‌و بۆ ئه‌وه‌ی شه‌هیدبێت و له‌ناو میلله‌ته‌که‌ی بژی .

ئه‌گه‌ر موشه‌ره‌ف ده‌ستی له‌ کوشتنی بێنه‌زیر بۆتۆ هه‌بێت ، بۆ ئه‌وه‌ی هیچ سه‌رکرده‌یه‌کی لێوه‌شاوه‌ و به‌ناوبانگی به‌رامبه‌ر نه‌بێت له‌کاتی هه‌ڵبژاردندا ، ئه‌ی بۆ کاتی خۆی رێک ده‌که‌وت له‌گه‌ڵ بێنه‌زیر بۆتۆ و پاش ئه‌و چه‌ند ساڵه‌ ده‌ربه‌ده‌ری یه‌ رێگای گه‌ڕانه‌وه‌ی دا .بۆ موشه‌ره‌ف ئیسلامیه‌توندڕه‌وه‌کانی سه‌ر به‌ القاعده‌ و تالیبان ترسناکن یان ژنه‌کی دیموکراتیخوازی وه‌ک بێنه‌زیر بۆتۆ . تێڕۆڕ نابێت سه‌ربکه‌وێت هه‌موو ده‌نگه‌کانی که‌ پشتگیری بێنه‌زیر بۆتۆ ده‌که‌ن واده‌ڵێن و به‌توندی ئه‌و کوشتنه‌سیاسیه‌یان تاوانبارکرد . ئه‌و تاوانبارانه‌ ، ره‌نگ و بۆنی ئیسلام به‌رامبه‌ر خه‌ڵکی جیهان ره‌ش و بۆگه‌ن ده‌که‌ن ، نابێت رێگایان پێبدرێت بازرگانی به‌ناوی ئیسلام بکه‌ن . کوشتنی ژنێکی به‌وه‌فای نیشتمانه‌که‌ی وه‌کو بێنه‌زیر بۆتۆ و خه‌ڵکی بێتاوان به‌و شێوه‌یه‌ هیچ ناوی لێنانرێت تێکۆشان ، به‌ڵکو به‌ کارێکی ترسنۆک و بێره‌وشتانه‌ له‌قه‌ڵه‌م ده‌درێت . ئه‌و مێشک ژه‌نگاوی یانه چاویان به‌رایی نه‌ده‌هات ببینن ژنه‌کی خاوه‌ن شه‌هاده‌ و خوێنده‌وار و عیلمانی[سێکولار] ده‌سه‌ڵاتی هه‌بێت له‌ وڵاتێکی ئیسلامی و باوکسالاری وه‌کو پاکستان . بۆیه‌ بڕیاڕیان دابوو که‌ هه‌ر بگه‌ڕێته‌وه‌ له‌ناوی ببه‌ن و دیسان وڵاتی پاکستان بۆ ته‌نگوچه‌ڵه‌مه‌یی و نائارامی ببه‌نه‌وه‌ دواوه‌ .‌ نه‌واز شه‌ریف[محه‌مه‌د نه‌واز شه‌ریف 25/12/1949]ی سه‌رۆکوه‌زیرانی پێشوو داوای کرد که‌ موشه‌ره‌ف ده‌ست له‌ سه‌رۆکایه‌تی به‌ربدا و واز له‌ کورسی یه‌که‌ی بهێنێت له‌به‌ر ئه‌و کاره‌ساته ،‌ رۆژی 8ی کانوونی دووه‌م به‌شداری هه‌ڵبژاردن ناکات . په‌رویز موشه‌ره‌فی سه‌رۆکی پاکستان بۆ گیانی پاکی بێنه‌زیر بۆتۆ سێ[3] رۆژ ماته‌مینی له‌ سه‌رتاسه‌ری وڵات راگه‌یاند و خه‌ڵکی پاکستان به‌ سه‌ربه‌رزانه‌ له‌ته‌نیشت گۆڕی باوکی ناشتیان .

کورته‌باسێکی ژیانی ئه‌و ژنه‌ تێکۆشه‌ره‌ :
بێنه‌زیر بۆتۆ له‌ 21/6/1953 له‌شاری که‌راچی[ژماره‌ی دانیشتوانی نزیکه‌ی 12ملیون که‌سه‌] له‌دایک بووه‌ .له‌ 27/12/2007 له‌ شاری راولپه‌ندی کوژرا . ئه‌و هێزو توانایه‌ی له‌ بێنه‌زیر کۆببۆوه‌ که‌ له‌ خێزانێکی سیاسه‌تمه‌دار له‌دایک بووه‌ و کچی {{زولفه‌قار عه‌لی بۆتۆ له‌ شاری لارکانا له‌ 5/1/1928 له‌دایک بووه‌ . له‌ راوڵپه‌ندی 4/4/1979له‌ سێداره‌ درا. له‌ 1971 ــ 1973 سه‌رۆکی پاکستان بوو . له‌ 1973 ــ 1977 سه‌رۆک وه‌زیرانی پاکستان بوو. دایکی ناوی بێگم نه‌سره‌ت 21/9/1929 کورده‌ و خه‌ڵکی کوردستانی ئێرانه‌ .ئێستاکه‌ له‌ دوبه‌ی ده‌ژی و تووشی نه‌خۆشی بووه‌ .هاوسه‌ره‌که‌ی ناوی ئاسف عه‌لی زه‌رداری یه‌ و سێ منداڵیان هه‌یه‌}} بوو . بێنه‌زیر له‌ 1988 ــ 1990 و له‌ 1993 ــ 1996 سه‌رۆکوه‌زیرانی پاکستان بووه‌ . له‌ ساڵی 1988 بێنه‌زیر ده‌بێته‌سه‌رۆکی پارتی گه‌لی پاکستان [پ.پ.پ]و له‌ هه‌ڵبژاردن سه‌رده‌که‌وێت و ده‌بێته‌ یه‌که‌م سه‌رۆکوه‌زیرانی ژن له‌ پاکستان . له‌به‌ر دزی و گه‌نده‌ڵی له‌ حوکم لای ده‌به‌ن و ده‌رده‌کرێت ، دیسان ساڵی 1993 ده‌سه‌لات ده‌گرێته‌وه‌ ده‌ست و ساڵی 1999 به‌ تاوانی ره‌شوه‌ وه‌رگرتن تاوانبار ده‌کرێت و ئه‌ویش له‌ وڵات راده‌کات . ژیان له‌ ئینگلیستان و ئیماراتی عاره‌بی به‌سه‌ر ده‌بات هه‌تا له‌ 18/10/2007 گه‌ڕاوه‌ وڵات بۆ ئه‌وه‌ی به‌شداری له‌ هه‌ڵبژاردن بکات و پاکستان به‌ره‌ و دیموکراسیه‌ت ببات ، به‌ڵام به‌داخه‌وه‌ ده‌ستی ئه‌و تێڕۆڕیسته‌ نامه‌ردانه‌ شه‌هیدیان کرد .

ستۆکهۆڵم
28/12/2007