٢٠\١\٢٠١١

 بێن تێ ... بێن تێ.

هیوا رەش   

ئەمەى سەرەوە نە واژەیەکى بیانییە و نە ڕۆژێک لە ڕۆژان بیرم لێى کردۆتەوە بەر گوێم بکەوێت، ئەو دەمە من سەرپەل بووم ، بڕوا بکەن زیندانى بەعسییەکان کارێکیان پێ کردووم زۆربەى شتەکانیان بیر بردوومەتەوە بۆیە داواى لێبووردن لە خوێنەران ئەکەم لە دیارى کردنى کاتەکە و دەستنیشان کردنى شوێنەکە و ناوهێنانى هاورێکان، تۆ بڵێى ئەمە هۆنینەوەى خەیاڵ بێت! یان زۆرێک لەو هاوڕێیانەى وەکو من هێشتا تاجى شەهادەتیان لەسەر نەناوە و ماون شایەتحاڵى ڕووداوەکانن ؟ئاى لەو دەمانە خۆزیا منیش شەهید دەبووم و ئەم ڕۆژەى ئێستا هاتۆتە دى وەکو ئاواتێکى وەدینەهاتوو دەمبردە ژێر گڵەوە چش لەوەى دایک و باوک و خوشک و برام لەبەردەم بارەگا حزبییەکاندا دەست وەڕوویانەوە دەنرا و لە پاشملەیاندا پێیان دەگووتن : ((ئەمانە زۆر سەیرن کێ پێى وتوون کوڕەکانتان شەهید بن ، خۆ بۆ ئێمە شەهید نەبوون ؟ !)) .

بە هەرحاڵ (( بێن تێ ، بێن تێ )) سەرەتا و بۆ جارى یەکەم لە زارى هاوڕێى تێکۆشەرى خاکى و پشوودرێژم هاوڕێ - مام ئەسکەندەر - ژنەفتم ، لەم کاتەى ئەو بەعسییانەى ئێستا لەسەر دەستى سەرانى کورد خەریکە هێدى هێدى دێنەوە سەر شانۆى سیاسى ئەوان خاوەن دروشمى = امە عربیە واحدە . دات رسالە خالدە = بوون و ئاڵاى قڕ کردنى گەلى کوردیان بە - ئەنفال -ى ریسالەکەیانەوە گیرسابۆوە ، ئەو کاتە بە تواناى هێزى جەماوەر و پێشمەرگە پارێزگاریى لە - قەرەداغ - ى جێدەستى داگیرکاریى ئیسلامتورکى عوسمانلییەکان ئەکرا نەبادا قەرەداغ لە سەر دەستى ئیسلامعەرەب ناوى بگۆڕدرێ بۆ - جبل اسود -!

ئێمەى بە ژمارە کەم و بە چەک و تفاقى سادەوە قەراغى لانکەى شۆڕشە یەک لە دوا یەکەکانمان ئازاد کرد و لە چنگى بەعسییانمان دەرباز کرد و ئەوانیش وەکو هەمیشە پیشەى ترسنۆکانەیان پەنایان وەبەر چەکى کیمیاوى برد .

لە یادمە ، وا ئەزانم ئێستایە ! هەندێک شت هەن بۆ ئەزەلى لە یادم ناچن ! ئەو دەمەى 8 فڕۆکەى جەنگیى بەعسییە فاشیستەکان گەییشتنە ئاسمانى ناوچەکە و هێندەى نەبرد لە نزیکمانەوە گرمە و لرمە پەیدا بوو ، ئەمجارەیان جیا لە زرمە زرمى تر ، دوکەڵێکى چڕ و دەنگێکى نزمتر دەوروبەرمانى تەنى، و بێ ئەوەى درک بە کارەساتێکى چاوەروانکراو بکەین ، شەهید سیڤەر هاوارى کرد ::: هاوڕێ هیوا با ناوچەکە جێبهێڵین مام ئەسکەندەر ئەڵێت (( کیمیاوییان لێداین ))، ئەوسا لە مەبەستى ((بێن تێ ، بێن تێ)) ى مام ئەسکەندەر نەگەییشتم کە بۆنى کیمیاوى میوانى بەرلووتمانە تا شەهید سیڤەر بۆى ڕاڤە کردم کە مام ئەسکەندەر دەڵێت : بۆن دێ . بۆن دێ ! جێگەى ئاماژە پێدانە کە کاریگەرترین بەرکەوتووى کیمیاوى لەم مەیدانەدا و لەو هاوڕێیانەى لەگەڵ ئێمەدا بوون کاکە - ئاسۆ بیارەیى - بوو ، لێرەوە ئەوپەڕى ڕێزم بۆ مام ئەسکەندەر و سڵاو و حورمەتیشم بۆ هاوڕێ ئاسۆ کە لەوێ دەمەدا بە - ئارام هەورامى - ناسرابوو ، بەو هیوایەم ئەم سەرەداوەى سەربوردەى نەهامەتیمان زیندوو بکەنەوە و لە فەتان بیانپارێزن تا مێژووى بەرخودانى هێزى پێشمەرگە و جەماوەر نەکەونە خانەى نەمانەوە .

ماڵپه‌ڕی هیوا ره‌ش