٢١\٨\٢٠٢٠

بەپیرەوەنەچوونی خەڵکی کوردستان بە بانگەوازەکەی شاسوار و نەوەی نوێ،

تا رادەیەک لە دەڤەری سەوزیش چی دەگەیەنێ؟

تاهیر عیسا       

سەرباری لەباریی زەمینەی بابەتی بۆ راپەڕین و جۆشوخرۆشی خەڵکی کرێکار و رەنجدەری کوردستان، بۆ باشترکردنی ژیان و گوزەران و مووچە و دەستکەوتە مادییەکانیان، بەڵام کۆششەکانی شاسوار و جووڵانەوەکەی، هەمدیسان لە ناو ئەم هەلومەرجە بابەتییەدا، چرووک و مایەپووچ دەبێ.

خەڵکی کرێکار و رەنجدەری کوردستان، ئەگەر بەشی ئەوەش ئامادەکاریی سیاسی و چینایەتیانەیان نەبێ، بۆ خۆڕێکخستن و تێکۆشان، لە دژی دەسەڵاتی مافیایی لە کوردستان، بەڵام بایی ئەوەندە بە پێی مێژووی پتر لە دوو دەیەی رابردوویان لە رووبەڕووبوونەوە و ناڕەزایەتیاندا، ئەزموونی ئەوەیان پەیداکردوە، کە بەدوای دەنگی هەموو دۆڵ و زوڕنایەک نەکەون ئەمجارە!

بای ئەوەندە وشیارییان هەیە، بتوانن لەوە تێبگەن، کە شاسواریش وەک گەنەیەک "پندێک" و زەروویەک لە ناو جەستەی کۆمەڵگای کوردستان و لە ناو زۆنگاوی گەندەڵکاریی لە کوردستاندا، وەک بازرگانێکی تەڵەکەباز و چاوچنۆک، هەڵتۆقیوە و دەیەوێ، بە هەر نرخێک بێ سواری شەپۆڵی ناڕەزایەتیەکانیان بێ و بەرەو ئامانج و بەرژەوەندییە سەرمایەداریەکانی هەنگاو هەڵگرێ.

دەتوانن لەوە تێبگەن، کە شاسوار لە باشترین باری بانگەشە و بانگەوازەکانیدا بۆ خۆپیشاندان و هێنانە سەرشەقامی خەڵک، نموونەیەکی باشتر لە گۆڕان و ڕەوتە (ئیخوانیی) و ئیسلامیەکانی تر نابێ و نموونەیەکی باشتریش لە حەڤدەی شوبات، کە لە پێکدادانی کاسەی خوێنی رژاوی دەیان خۆپیشاندەری هەژار و نەداردا، کرایە دەستمایەی کۆبوونەوە نهێنییەکانی (مەسیف و سەری ڕەش) و لە رێکەوتنی ژێربەژێری دوور لە چاوی خەڵک و میدیادا، نۆشکرا و کۆمەڵێک دەستکەوتی مادییان بۆ خۆیان لێچنیەوە، پێشکەش ناکا.

ناتوانێ لە باشترین باری خۆیدا، لە باوکی هەژاران، کە ئەمڕۆ کوڕەکانی میراتگریی زەوی و گرد و تەپۆلکە و سەرمایە و کۆمپانیایەکانن، باشتربێ.

توانیویانە لەوە تێبگەن کە شاسوار و نەوەی نوێش، بە دوای هەمان ئامانجێکەوەن کە گۆڕان بەدوایەوە بوو، کە ئەمڕۆ لەگەڵ خانە شێرپەنجەییەکانی دەسەڵاتداریی ئەم کۆمەگایەدا، حکومەتی هاوبەشیان هەیە و هاوسۆز و هاوپەیمانی یەکترن و خەڵکی هەژار و نەداریش دەبێ هەر لە ئەژنۆی خۆیان بدەن.

شاسوار، وەک نوێنەری رەوتێکی لیبڕاڵی سەرمایەداریی، کە وەک لە بەرنامە و کارنامەیاندا دیارە، کە بەدوای ئامانجی چینایەتیانەی خۆیانەوەن، کە لە باشترین باریاندا، ناتوانێ نمایشی رەوتی لیبڕاڵی جیهانیی وڵاتانی ئەمەریکا و ئەوروپاش بکا، کە لە سێبەریاندا، خەڵک تەنانەت نەیانتوانی لە تەمەنی دوور و درێژی دەسەڵاتدارییاندا، لە دامودەزگایەکی تەندروستییانەی تێروپڕدا بەهرەمەند بن و بە هەزاران کەسیان لە بێ ئۆکسجینیی و بی دەرمانیی و بێ دکتۆریی و بێ قەرەوڵەییدا، بەوپەڕی ئازارەوە گیانیان سپاردند.

ئەم رەوتە لیبڕاڵیەی لە ئاستی جیهاندا، لە وەڵامدانەوە بە خواست و داواکاریی کرێکاران و رەنجدەران، نەک هەر بێدەربەستە، بەڵکو هەر رۆژە لە کۆششی لێسەندنەوەی ئەو ماف و ئازادییانەشی دایە، کە لە مێژووی خەبات و تێکۆشانی چینایەتیانەی خۆیدا، بەدەستیهێناون و نموونە هەرە پێشکەوتووەکەشی، لە خنکاندنی "جۆرج فلۆیدی" رەش پێستدا، بینیمان کە تا ئێستاش رق و قینی خەڵکی کرێکار و رەنجدەر و ئازادییخوازیی ئەمەریکا و جیهانیش لە بەرامبەریاندا نەنیشتۆتەوە.

شاسوار و جووڵانەوەکەی، کە بانگەشەیەکی لەم جۆرەی هەیە و لە هەڵمەتی راگەیاندنی هەڵبژاردنی پێشووش، نموونە قێزەونەکەی لەوەدا دەردەکەوت، کە ململانێ چینایەتیەکانی کۆمەڵگای کوردستانی لە ناو تەپوتۆزیی نەوەی نوێدا وندەکرد و نموونەی خۆی وەک بازرگانێکی دزیی سەرکەوتوو، بۆ تەواوی گەنجانی کوردستان بەگشتیی دەکرد، ئەمەش بۆ خۆی چاوداخستن و خۆ بێبەرییکردنێکی راشکاوانەی یاسایە کوێرەکانی سیستەمی سەرمایەداریی و خاوەنداریەتی تایبەتیی و کاری بەکرێ و زیدەباییە، کە سەرچاوەی هەموو جەور و ستەم و چەوساندنەوەیەکی مرۆڤ لە لایەن مرۆڤی سەرجەم کۆمەڵگا و سیستەمەکانی جیهانی ئەمڕۆیە.

شاسوار و جووڵانەوەکەی، چیەتی و نێوەرۆکی سیاسیی تەڵەکەبازانەی خۆیان، زیاتر لەوەدا نیشاندا، کە خوازیاری هەڵبژاردنی پێشوەختە و هەڵوەشاندنەوەی حکومەت و درێژەدان بە هەمان سیستەم و گاڵتەجاڕیی هەڵبژاردن و نوێنەرایەتیی پەڕلەمانن، لە کاتێکدا باش دەزانن، کە ئەوەی ئەنجامەکانی هەڵبژاردن، لە کوردستاندا یەکلادەکاتەوە، بانگەشە و پڕوپاگەندە و خستنەڕووی پڕۆژە و بەرنامە و بەرنامەسازیی حیزب و رێکخراوەکان نییە، بەڵکو جگە لە سەرمایەی زەبەلاح و میدیای زەبەلاح، لە ناو پڕۆسەی هەڵبژاردن لە کوردستاندا، ئەوە میلیشیا و هێزی چەکداری زەبەلاحە، سەرکەوتوو و براوەکان دەستیشان دەکا.

شاسوار و رەوتەکەی، بە دروشمی هەڵبژاردنی پێشوەختە، بیانەوێ و نەیانەوێ، جارێکی دیکە بەم دروشمەیان، دەیانەوێ دەسەڵات و سیستەمی سیاسیی گەندەڵکاریی هەرێم، لە هاتنەدەنگ و تێکۆشانی وشیارانەی چین و توێژەکانی خوارەوە، بپارێزن.

کۆمەڵگای کوردستان، وەک هەموو کۆمەڵگاکانی تر لە جیهاندا، کۆمەڵگایەکی چینایەتییە، کە کێشە و گیروگرفتە قووڵەکانی لە دەسەڵاتی کەمایەتییەکی قازانجپەرست و دز و مشەخۆردا، سەرچاوەی گرتووە و دەبێ بۆ کۆتایی هێنانیشیی، خەباتێکی چینایەتییانەی هەمە لایەنەی کارساز بگیرێتەبەر و چین و توێژە بێبەشەکانی کۆمەڵگا خۆیان رێکخراوبکەن و دەسەڵاتێکی جەماوەریی لە شوێنی کار و ژیان و گەڕەکەکان و شار و شارۆچکەکاندا دابمەزرێنن، کە لە جەماوەریی بوونەوەی ئەم دەسەڵاتە جەماوەرییەدا، دەتوانێ کۆتایی بە نەخشی پارتیە بۆرژوازییەکان و دەسەڵاتی میلیشیاییان بهێنێ و کەنارگیریان بخا.

هەڵبژاردن لە هەلومەرجێکی لەو جۆرەدا کە زەمینە خودییەکانیشی بەرجەستەیە، دەتوانێ واتای خۆی پەیدابکا و دەسەڵاتێکی سۆڤیەتیی "شوورایی" کە خوارەوە نوێنەرایەتی سەرەوە دەکا، لە رێگای هەڵبژاردنی نوێنەر لە کارگە و فەرمانگە و شوێنی ژیان و گەڕەک و شار و شارۆچکەکان، کە لە کۆتاییدا شوورای سەراسەریی وڵات دادەمەزرێنێ و هەموو دەمێکیش ئەو ئەنجوومەنی نوێنەرایەتییە، کە لە رێگای دەسەڵاتی خوارەوەی کۆمەڵگا دامەزراوە و لە ژێر چاودێریی لێپرسینەوە و لێپێچینەوەی هەمیشەیی دایە، پێچەوانەی سیستەمی پەرلەمانیی کە بۆ چوار ساڵ جارێک لە رێگای پەنجەمۆریی خەڵکەوە رەوایی دەسەڵاتدارێتی چوار ساڵ مسۆگەر دەکەن و بۆ چوار ساڵیش خەڵک رەوانەی ماڵەوە دەکەنەوە و لە هەر جۆرە ویست و چاودێریی و دەستتێوەردانێکی راستەوخۆش بێبەشیان دەکا.
 

١٥\٨\٢٠٢٠

taheresa_9@hotmail.com