|
٢٠\٧\٢٠٢٤
بانگەوازێك بۆ
ڕێکخراوەکانی مافی مرۆڤ، یەکیتیە کرێکاریەکان و ئازادیخوازان:
بەرامبەر بە
لەشکرکێشیی حکومەتی تورکیا بۆ سەر خەڵکی کوردستان وەرنەدەنگ!
 ماوەیەکە
حکومەتی تورکیا بە هەزاران سەرباز و تانك و زریپۆشەوە، لەژێر ناوی
پاراستنی سنوورەکان و شەر لە دژی پەکەکە، هێرشێکی زەمینی بەرفراوانی بۆ
نیو قووڵایی کوردستانی ناوچە سنوورییەکان دەستپێکردوە، کە بە هۆیەوە بە
دەیان خەڵکی گوند نشین لە ژن و منداڵ پیر و پەکەوتەی ئاوارە و
بێخانەولانە کردوە و چەندین ڕەز و باخ و ماڵی هاوڵاتیانی سوتاندوە.
تەنانەت سوپا و لەشکریان گەیشتوونەتە ناو شاری دهۆك و ژیان و ئاسایشی
خەڵکیان خستۆتە مەترسییەوە. ئەمە سەرباری ئەوەی لە ماوەی ڕابردودا
چەندین خەڵکی سڤیل بە هۆی هێرشی بەردەوامی تورکیاوە ژیانیان لەدەستداوە
یان برینداربوون.
ئەم لەشکرکێشیی و عەسکەرتاریەتەی حکومەتی ئۆردوگان بەشێکە لە
ململانیەکی ناوچەیی کە تورکیا دەیەوێ بە سوودوەرگرتن لە دۆخی تازەی
جیهان و کێشمەکێشی نێوان زلهێزەکان، جێگای پێی خۆی لە ناوچەکەدا تۆکمە
بکات، بە تایبەتی نەخشی کاریگەریی هەبێ لە ئارایشدانەوەی ئایندەی
سیاسی- ئابوری- ئاسیشی عێراق و سوریادا. تورکیا دەیەوێت لە ڕێگەی
باڵادەستیی سەربازییەوە لە هەرێمی کوردستان و باکووڕی سوریادا، بەو
ئامانجەی خۆی بگات. بەو جۆرەش بتوانێ وەڵامێك بە دۆخی ناوخۆیی بداتەوە،
کە ئێستا دەسەڵاتەکەی ئۆردوگان لە هەموو کات زیاتر ڕوبەرووی نەفرەتی
خەڵکی کرێکار و زەحمەتکێش و ئازادیخوازی تورکیا بۆتەوە.
ئەوەی زیاتر دەستدرێژیی حکومەتی تورکیای بۆ سەر ناوچەکانی کوردستانی
عێراق ئاوەڵاکردوە، کەڵك وەرگرتنە لە بیدەنگی ڕێکخراوی نەتەوە
یەکگرتووەکان لە لایەك و رەزامەندیی ئەمەریکا و هەردوو حکومەتی عێراق و
هەرێمە لە لایەکی دیکەوە، بە تایبەتی دوای سەردانەکەی ئۆردوگان بۆ
بەغدا و ئەنجامدانی کۆمەڵێك رێکەوتن لەگەڵ حکومەتی عێراقدا.
بێگومان بیانووی تورکیا بۆ لەشکرکێشیی بۆ سەر کوردستانی عێراق، لێدانە
لە چەکدارانی پارتی کرێکارانی کوردستان- پەکەکە لەناو خاکی هەرێمی
کوردستاندا، بەڵام ئەوە تەنها پاکانەیەکە بۆ هێرشە بەرفراوانەکەی بۆ
داکوتانی قاچی خۆی لە ناو خاکی عێراق و دانانی کاریگەری لەسەر دەوڵەتی
عێراق تا تورکیاش وەکو یارزانێکی ناوچەیی و ڕکابەری ئێران، نەخشی باڵای
هەبێ لە عێراقدا، بە تایبەتی کە پرۆژەی (رێگای گەشەپێدان) وەکو
پرۆژەیەکی ستراتیژی بڕیارە لە نێوان کەنداو و تورکیادا بە خاكی عێراقدا
تێپەڕێ، کە تورکیا و عێراق و قەتەر و ئیمارات بە چەند ملیار تێیدا
هاوبەشن، بە پاڵپشت و هاوکاریی چین.
ئیمە لە فیدراسیۆنی سەراسەری پەنابەرانی عێراقی لە کاتێکدا بە توندیی
سەرکۆنەی ئەم هێرش و لەشکرکێشییەی حکومەتی تورکیا بۆ سەر خەڵکی
کوردستان دەکەین، هاوکات داوا لە رێکخراوی نەتەوە یەکگرتوەکان و تەواوی
ڕێکخراوەکانی مافی مرۆڤ و یەکیتی کرێکاریی و ئازادیخوازان دەکەین کە بە
ئەرکی شایستەی خۆیان هەڵسن و گوشار بهێنن بۆ دەوڵەتی تورکیا کە:
١- دەستبەجێ لەشکرکێشیی سەربازی و تۆپبارانکردنی گوند و ناوچە
سنوورییەکان ڕابگرێ.
٢- تەواوی هێزەکانی تورکیا لە کوردستان بچنە دەرەوە تا خەڵکی گوند و
ناوچەکە بگەڕێنەوە بۆ سەر ماڵ و ژیان و گوزەرانی خۆیان.
٣- قەرەبووکردنەوەی دانیشتوانی گوندەکان کە زیانیان پێگەیشتوە.
١٢\٧\٢٠٢٤
فیدراسیۆنی سەراسەری پەنابەرانی عێراقی
Dashty Jamal
Secretary
International Federation of Iraqi Refugees-IFIR
Tel:07856032991 Fax:08712664391
www.federationifir.com
www.csdiraq.com
|
