٢٦\٦\٢٠١٦

بەریتانیا و کوردستان و سەربەخۆیی.

کامیل ژیر      

بەدەر لەوەی بۆدۆزی کورد باشترە یا نا، گشتپرسییەکەی ٢٣/٦/٢٠١٦ بەدەرچونی بەریتانیا لە یەکێتیی ئەوروپا، کۆتاییھات.. ئەشێ لەڕوی ئابوریەوە، ترازوی سودو زیانیان، بەلای چەپدا لاسەنگبێ! کەچی پرسی دەرچونیان لەکۆتوبەندی یەکێتیی ئەوروپی، یابڵێین بەدەسھێنانەوەی سەربەخۆییان، بەشی شێری بەرکەوت. ئەو زۆرینەیەی بۆ دەرچون لەیەکێتیی ئەوروپا دەنگیاندا، ھیچ دەربەستی ئەوە نەبون کەئەشێ ئابورییەکەیان بداتەدواە، بەھای پاوەن دابەزێ، بێکاری زیاتربێ و..ھتد.

ئەوە نەک ھەر بەریتانیا، خەڵکی جەزائیریش کە ملیۆنێ شەھیدیاندا لەپێناوی جیابونەوە لەفەرەنسا، توشی زیانێکی ئابوریی زۆربون. بەڵام سەربەخۆییەکەیان لاگرنگتربو. ئەو عەرەبانەی لەناو ئیسرائیلدا ئەژین، باری ئابورییان دەیانجار باشترە لەوانەی ژێر دەسەڵاتەکەی مەحمود یاسین، کەچی دەوڵەتی فەلەستینیان لاباشترە کە ئاشکرایە ئەو دەوڵەتە ئەبێ بە سواڵ بژی و خەڵکەکەی ھەناسەی سارد ھەڵکێشن بۆ ژەمێکی چەورو گەرم!

جا نەک ھەر مرۆڤ، کەوێکی ناو قەفەز کە بەبێ ماندوبون باشترین خۆراکی ئەخرێتە بەردەم و لەسەرماو گەرماو توفەنگی راوچی ئەپارێزرێ، بەرەڵایی و ئازادییەکەی لا باشترە کە ئەشێ بەسەد دەردیسەر بڕێک خواردن یا قومێک ئاوی دەسنەکەوێ. ئەم نمونانەش بەڵگەی گرنگیی ئازادین کە بەبێ سەربەخۆیی، ھیچ گەل و ھیچ مرۆڤ و ھیچ ئاژەڵێکیش، ئازاد نابێ.

با ئەنجامی گشتپرسییەکەی بەریتانیا، ببێ بە وانەیەک بۆ ئەو فەریکە رۆشنبیرانەی لە سەربەخۆیی کوردستان سڵئەکەنەوەو ھەمیشە کۆسپ و (تاکۆس-بەڵام) ئەخەنە بەر رەوڕەوەی دەوڵەتی کوردی.

٢٤\٦\٢٠١٦
ماڵپه‌ڕی کامیل ژیر