|
١٨\٢\٢٠٢١
بەر لە دادگەییکردنەکە گوتمان خودی مەسرور
خۆی سیناریۆیەکەی داڕشتوە و
هەر خۆیشی لە جیاتی دادگە و دادوەران بڕیارەکان و سزایەکانی دەرکردوە!
 بە پێی دەنگوباسەکان ئەمڕۆ سێشەمە ١٦\٢\٢٠٢١ لە دووەم رۆژی
دادگەییکردنی زیندانیانی بادینان پێنج کەس بە ناوەکانی (شێروان شێروانی،
گوهدار زێباری، ئەیاز کەرەمی، هاریوان عیسا، شڤان سەعید) هەر یەکەو ٦
ساڵ سزای زیندانییکردنیان بەسەردا سەپێندرا.
هەڵبەتە ئێمە وەک ''ناوەندی کاری ئازادیی دەربڕین'' بێجگە لە
سەرکۆنەکردن و شەرمەزارکردنی ئەو بڕیارەی سەرۆکی بە ناو حکومەت کە بە
ناوی دادگەوە دەریکردوە، بە هیچ جۆر و شێوەیەک دان بە رەوایی هەبوونی
ئەو دادگە و داوەرییانەی کوردستاندا نانێین و پێمانوایە هەر لە
بنچینەدا بۆ ئەوە دانەمەزراون کە پارێزگاریی لە ماف و ئازادییەکانی
هاوڵاتییان بکەن بە تایبەتییش لە پرسە رامیاریی و کۆمەڵایەتییەکاندا
بەڵکە بە پێچەوانەوە کۆمەڵە داشێکی دامەی پارتییەکان و دەسەڵاتە
بنەماڵەیی و مافیاییەکەی کوردستانن و لەجیاتی بەرزەفتکردنی تاوانکاران
هەر خەریکی ئەوەن لە رێگەی کۆمەڵێک یاسا و رێسای ئەوپەڕی
کۆنەپەرستانەوە سادەترین ئازادییەکانی خەڵک سەرکوت بکەن.
هەر بۆیە ئێمە نە پێویستمان بەوە هەیە لەو گەڕەلاوێژێیە شەرمئامێزانە
بدوێین کە لە نێوان (دادوەران و داواکاریی گشتیی و سەندیکایە
سیخوڕییەکەی رۆژنامەنووسان و رێکخەری راسپاردەکان و دەزگەکانی مافی
مرۆڤ و نموونەکانی دیکەیان لە نێو سیستەمە دژەمرۆییەکەیان)ەوە
بەڕێوەدەچن و لە نێو بە ناو دادگە و دادوەرییەکانیان دەگوزەرێن کە
تەنیا بۆ چاوترساندنی خەڵک و دەرخستنی هەژموونی جەور و ستەمی خۆیانە،
نە پێویستمان بە باسکردنی ئەو دەنگوباس و لێدوانە سووک و چرووکانەیە
هەیە کە لە لایەن (بە ناو پارێزەران و رامیاربازە سازشکارەکانی نێو
دەسەڵات و دەرەوەی دەسەڵات و بە ناو چالاکوانان و میدیاکارە
رەنگاوڕەنگەکانی سێبەری دەسەڵات و پارتییەکان)ەوە بە سنگ دەرپەڕاندنەوە
پەخشیان دەکەن کەچی لە راستییدا کار و پیشەیان تەنیا ئەوەیە کە لە
تەڕیی بخۆن و لە وشکیی بخەون! ئەگەر نا پێشێلکردنی ئازادییەکانی
دەربڕین و جەور و ستەمەکانی دیکەی ئەو دەسەڵاتدارانە زۆر لەمێژە لەوە
دەرچووە بە قسەکردن و بەو جۆرە گوشارانە چارەسەر بکرێن.. بەڵکە
راستترین هەنگاوی سەرەتایی هەر ئەوەیە کە دەست لە نێو دەستی ئەو
ئازادییخوازنە بنێن کە بە هیچ جۆر و شێوەیەک لە رێکخراوە سێبەرەکان و
دادگە و دادوەرییەکان و هیچ دامودەزگەیەکی فەرمیی و نافەرمیی
دەسەڵاتداران و پارتییەکان بەشدار نین و تێیاندا سوودمەند نین.
ئیدی بە شێوەیەکی گشتیی بە تێڕوانینی ئێمە باشترین و لەبارترین وەڵام
بۆ ئەو بڕیار و هەڵسوکەوتە بێ ئابڕووییانەی دەسەڵاتداران و پارتییەکان
کە بە ناوی داد و دادوەرییەوە بڵاویاندەکەنەوە.. هەر ئەوەیە کە
ئازادییخوازان بێ زەقکردنەوەی جیاوازییە لاوەکییەکانیان خۆیان لە
رێکخراوگەلێکی ئازاد و دوور لە فەرهەنگی پارتیایەتی و دەسەڵاتخوازیی
رێکبخەن و بە پشتبەستن بە هێزی لەبن نەهاتووی جەماوەر کە زۆربەی هەرە
زۆریان لە لایەن کەمینەیەکی زۆر کەمی دەسەڵاتدارانەوە لە سەرەتایترین
ماف و ئازادییەکانیان بێبەش کراون.. بە شێوەیەکی رێکخراو بایکۆتی
تێکڕای دەسەڵاتداران و هەموو ئەو کەس و لایەنانەش بکەن کە بە شێوەیەکی
ناڕاستەوخۆ لە بەرژەوەندیی پارتییەکان دان و یارمەتییدەرن لە
درێژکردنەوەی تەمەنی ئەو سیستەمەدا کە تاکڕەویی و ملهوڕیی تێیدا
باڵادەستە و گاڵتەیان بە ژیان و گوزەرانی چین و توێژە بەشمەینەتەکان و
سەربەخۆیی کوردستان و یەکسانیی رەگەزیی و سەرجەم ماف و ئازادییەکانی
دیکەی خەڵکی کوردستان دێ و بەهای مرۆڤەکان تەنیا لە چەندیەتیی
سەرمایەکانیانەوە دەبینن.
ناوەندی کاری ئازادیی دەربڕین
١٦\٢\٢٠٢١
rojnamen@yahoo.com
|
