بەرنامەى خوانى گەلى کوردستان
سەرەتایەک بۆ تێکشکاندنەوەى کەسایەتى تاکى کورد.

(مەپرسە ئارەزوى چى جۆرە خواردنێک دەکەى ، بپرسە بۆچى خەڵکى کوردستان هەژارن).

پێشڕەو حەمید 

ئینتهازیەتى دەسەڵات و ناعەدالەتییەکانى دەسەڵاتى کوردی هۆکارگەلێَکى گەورەن بۆ هەژارکردن هەزاران خێزانى کوردى و دروستکردنى تاک گەلێکى بیمارو تێکشکاو لە کۆمەڵگاى کوردیدا ، خودى دەسەڵاتیش لەداوى دروستکردنى ئەو قەیرانانە بۆ ڕەوشى گوزەرانى ( تاک و خێزان ) ى کوردى ، هێشتا نابەرپرسانە بەناوى هاوکارى کردن و باشترکردنى ڕەوشى شێواوى ژیانیان لەڕێگەى چەندین کەناڵى جیاوازەوە سەرقاڵى زیاتر تێکشکاندنى ناخى مرۆڤەکانەو لە ڕێگەى نیشاندانى ئەو مرۆڤانەوە لە شاشەى تەلەفزێونەکانانەوە و لە ڕوپەڕى ڕۆژنامەکانیاندا ، جارێکى تر بانگەشەى پلە دوى مرۆڤ و بەکەم تەماشاکردنى ئەو مرۆڤانەدەکات کە دورن لە دەسەڵاتەوە و نەبونەتە دار دەستى .

گەرچى هیچ مرۆڤێک ناخوازێت لە ساتێکى هەمو تەمەنیدا بەدەست هەژارییەوە گیرۆدەببێت و داواى هاوکارى بکات بۆ دەربازبونى لەو دۆخە ئازار هێنەرەى کە تێى دەکەوێت ،بەڵام کەناڵە حیزبیەکان بۆ جوانتر کردن و میکیاژ کردنى ڕِوخسارى دزێوى دەسەڵات و ناعەدالەتیەکانى ، مرۆڤەکان دەکەنە نێچیرو بەناوى هاوکارى کردنەوە هێندەى تر لەبەرامبەر ڕەحمى بێویژدانى دەسەڵاتدا بچوکیان دەکەنەوە و هێندەى تر ناخیان تێکدەشکێننەوە ، وەک ئەوەى کە لەبەرنامەى (خوانى تەلەفزێونى گەلى کوردستان) دا دەیان بینین .

بەرنامەى خوانى تەلەفزیونى گەلى کوردستان یەکێکە لەو بەرنامانەى ترى دەزگاى ڕاگەیاندنى حیزبى کوردى کە بەناوى هاوکارى کردنەوە هەوڵى تێکشکاندنى کەسایەتى تاکى کوردى ئەدات و هەژارى و دەستکورتى خێزانەکان دەقۆزێتەوە هەندێک کەسیش نائاگایانە ئەو جۆرە هاوکاریکردنانە بە کارێکى باش دەزانن و چەندین خێزانى ترى هەژاریش چاوەڕوانن ستافى ئەو بەرنامەیە بڕۆنە ماڵەکانیان و هاوکارى یەکى ڕەمزى بکرێن ؟! نیشاندانى چەنددیمەنێکى ماڵ و وێنەى ئەو کەسانەى کە پێکەوە خێزانێکى هەژار دروست دەکەن لەسەر شاشەى تەلەفزێون ئەمڕۆ یەکێکە لەترسناکترین کار کە خودى تەلەفزێنى گەلى کوردستان دەیکات و مرۆڤەکان لە ڕوى دەرونى و خێزانى و کۆمەڵایەتیەوە تێک دەشکێنێت ؟ چونکە نیشاندانى دیمەنى خێزانێکى هەژار لەتەلەفزێۆنەوە نیشاندانى نهێنى چوارچێوەى خێزانێکە ، لەکاتێکدا تەواوى خێزانەکان لەنێوان چوار دیواردا بەمەبەستى پاراستنى نهێنێکانینان شتێکیان بونیاد ناوەو ناویان لێناوە ( خانو ) کەچى بەناوى سوکترکردنى بارى گوزەرانى ناخۆشى خێزانەکان زومى کامێرایەک تەواوى نێهێنەیکان دەخاتە سەرشاشە و لەدواى خۆى چەندین خوێندنەوەو چیرۆک بۆ مرۆڤەکانى ترى کۆمەڵگا بەجێدەهێلێت لەکاتێکدا نیوەى کۆمەلگاى کوردى کار بۆ سوککردن و تڕۆکردنى یەکتر دەکەن .

سەرە ڕاى بونى ڕێژەیەکى زۆرى هەژارى لەکوردستاندا ، هێشتا بەرنامەى ( خوان ) ى تەلەفزێونى گەلى کوردستان نەیتوانییەوە قسە لەسەر ئەو هۆکارانەبکات کە خێزانەکانى هەژار کردوە و لەهیچ بەرنامەیەکیدا پەنجەى نەخستوەتەسەر ئەو هۆکارانەى کە بۆچى دەبێت خێزانێک نانى ژەمێکێان بپێ دابین نەکرێت و کەسە نەخۆشەکانیان لەبەر پێى پارەى ناتوانێت سەردانى نەخۆشخانەبکات بەمەبەستى چارەسەرکردنیان ، لەکاتێکدا سەروەت و سامانى میللەتێک بەهەدربڕوات و بەهۆى هەڵیسانى ڕێژەى گەندەڵى لەکوردستاندا چینى باڵادەست و چینى مرۆڤەهەژارەکان تادێ بەرەو زیادکردن دەڕوات ؟

خوانى تەلەفزێونى گەلى کوردستان بۆچى لەکاتى دواندنى خێزانەکاندا قسەلەسەر ئەو هەمو ناعەدالەتیانەناکات کە دەسەڵاتى کوردى داهێنەریەتى و بۆچى یەکەسەر قسە لەسەر ئەوەدەکات ئاخۆ حەزیان لەچى جۆرە خواردنێکە تا بۆیان ئامادەبکات ؟ بۆمەگەر خودى کەناڵەکە نازانێت هەرلەدواى تەواوبونى بەرنامەکەیان خێزانەکان جارێکى تر برسیان دەبێتەوە و چاوەڕوانى ژەمێکى خۆشتر دەکەن ؟

ئەگەر بەرنامەى (خوان) دەیەوێت دور لەئەجینداى حیزبییەوە کار بۆهاوکارى کردنى خەڵکانى کەم درامەت بکات ئەوا لەبرى ئەوەى وێنەى کەسەکان نیشان بدات و ئیشتهایان تاقى بکاتەوە بەگێرانەوى چیرۆکەکانیان بینەران توشى ئازار بکەن ، ئەوا باشترە کە بەرلە هەرشتێک ئەو بەرنامەیە درێژەێنەدەن و ڕایبگرن و ستافى بەرنامەکە ناوى سەرجەم ئەو خێزانانە لاى خۆیان دیکۆمێنێت بکەن و بەشێوەیەکى نێهێنى و دور لەو زومى کامێراوە کۆمەکیان بکەن ، ئەگەر نـا ئەوا با ستافى بەرنامەى (خوان) بپرسن (بۆچى هەمیشە سەر خوان هەیە پڕە لە پێکەنین و تێرى ، سەر خوانیش هەیە پڕە لەبرسێتى) ئینجا بەردەوام بن لە تێکشکاندنى کەسایەتى تاکى کوردى .