|
هه‌ر ریسوا بیَت
سه‌رجه‌م هیَرش و پیلانگیَرِییه دووژمنكارییه‌كان!!
وه‌ك ده‌زانریَت له‌رۆژی یه‌كی گوڵانه‌وه جاریَكی تر سوپای رژیَمی
توركیا به‌هاوكاری رژیَمی ئیَران و حكومه‌تى ئیَراق و بیَهه‌ڵویَستى سه‌رۆكایه‌تى
هه‌ریَم و حكومه‌ت و په‌رله‌مانى هه‌ریَمی كوردستان تۆپباران و هیَرشی
ئاسمانى بۆ سه‌ر گونده‌كانى بناری قه‌ندیل و ده‌وروبه‌ری ئه‌نجامدرا و
له‌ئاكامدا شه‌ش گه‌ریلای پارتى ژیانی ئازادی كوردستان (PJAK) شه‌هید
بوون و زیانیَكی ماددی زۆریش به‌ر گوندنشینان و ژینگه‌ى ده‌ڤه‌ره‌كه
كه‌وتووه. له‌كاتیَكدا ئیَمه ئه‌و هیَرشه درِندانه‌یه به‌توندی شه‌رمه‌زار
و ریسوا ده‌كه‌ین و رایده‌گه‌یه‌نین كه ئه‌م هیَرشانه پیلان و
كۆنسیَپتیَكی نویَی رژیَم و هیَزه ده‌سپۆت و پاشڤه‌رِۆیه‌كانی هه‌ریَمه‌كه‌ن
دژ به گه‌لی كوردستان و بزاڤه ئازادیخوازه‌كه‌ی، كه ده‌خوازن شكسته
مه‌زنه‌كانى خۆیان له ئۆره‌مار و زاپ بشارنه‌وه و له‌بیر خۆیان ببه‌نه‌وه.
هه‌روه‌ها ئه‌و رژیَم و هیَزانه شانبه‌شانى ئه‌و تۆپباران و هیَرشه
ئاسمانییانه ده‌خوازن له‌ریَگه‌ى ئه‌و درۆ و پروپاگه‌نده چه‌واشه‌كارییانه‌ی
خۆیانه‌وه زه‌بر له‌و مۆراڵ و جۆشوخرۆشییه‌ى گه‌ل بده‌ن كه له‌به‌رخۆدانه‌كانى
ئۆره‌مار و زاپ و سه‌رهه‌ڵدان و پیرۆزباییه شكۆداره‌كانى نه‌ورۆز وه‌ریگرتووه.
ئه‌وه‌ى جیَی گومان و مه‌ترسییه ئه‌و بیَده‌نگی و بیَهه‌ڵویَستییه‌ى
سه‌رۆكایه‌تى و حكومه‌ت و په‌رله‌مانی هه‌ریَمی كوردستانه له‌به‌رامبه‌ر
ئه‌و تۆپباران و هیَرشه ئاسمانییانه‌ى وه‌حشیانه ده‌كریَنه سه‌ر گه‌ل
و خاكی هه‌ریَمى كوردستان. ئه‌مه له‌كاتیَكدا پاراستنى سه‌روه‌ری هه‌ریَم
و خه‌ڵكه‌كه‌ی له‌ئه‌ستۆیان دایه و پیَویستبوو بیَده‌نگ نه‌بن و هه‌ڵویَستى
خۆیان له‌مرِووه‌وه به‌روونى بۆ گه‌ل و رای گشتى نیشان بده‌ن، هه‌روه‌ها
به‌هاناى ئه‌و خه‌ڵكه ئاوارانه‌وه بهاتبوونایه كه‌وا ناچاری ئاواره‌یی
و په‌رِاگه‌نده‌یی بوونه. هه‌ڵبه‌ته ویَرِای نیگه‌رانى و گومانى
زۆرمان له‌سه‌ر ئه‌و بیَده‌نگییه‌ی سه‌رۆكایه‌تى و حكومه‌ت و په‌رله‌مانی
هه‌ریَمی كوردستان، رایده‌گه‌یه‌نین كه ئه‌و بیَده‌نگی و بیَهه‌ڵویَستییه
به‌هه‌ر بیانوو و هۆكاریَكه‌وه بیَت به‌هیچ شیَوه‌یه‌ك ناكه‌ویَته
خزمه‌تى گه‌له‌كه‌مان به‌گشتى و باشووری كوردستان به‌تایبه‌تى. چونكه
مسۆگه‌ر ئامانج له‌و پیلان و هیَرشانه‌ی دووژمنان تیَوه‌گلاندنى هیَزه‌كانى
باشووری كوردستانه له‌دژایه‌تیكردنى بزاڤی ئازادیخوازی گه‌له‌كه‌مان
له‌پارچه‌كانى دیكه‌ى كوردستان. بۆیه ئه‌م بیَهه‌ڵویَستییه‌ى له‌ئارادایه
له‌هه‌مانكاتدا به‌واتاى په‌سندكردنى ئه‌و پیلان و هیَرشانه دیَت كه
دژ به‌گه‌له‌كه‌مان و بزاڤه‌كه‌ی دیَت. ئه‌مه‌ش پیَچه‌وانه‌ى ئه‌و
بانگه‌شه نه‌ته‌وه‌ییانه‌یه كه ده‌یكه‌ن. بیَگومان وه‌ك چۆن هه‌ر
هیَرش و پیلانگیَرِییه‌ك دژ به باشووری كوردستان له‌هه‌مانكاتدا هیَرش
و پیلانگیَرِیشه دژ به پارچه‌كانى دیكه‌ی كوردستان ئه‌وا مسۆگه‌ر هه‌ر
هیَرش و پیلانگیَرِییه‌ك دژ به پارچه‌كانى كوردستان له‌هه‌مانكاتدا دژ
به باشووریشه. له‌م چوارچیَوه‌یه‌دا بانگه‌وازی له‌سه‌رجه‌م گه‌له‌كه‌مان
و ته‌واوى پارت و لایه‌ن و ریَكخراوه مه‌ده‌نییه‌كان و رۆشنبیران له‌باشووری
كوردستان ده‌كه‌ین كه‌وا به‌چالاكی پرۆتستۆییانه هه‌ڵویَستى نارِه‌زاییانه‌ى
خۆیان ده‌رببرِن و فشار بۆسه‌ر سه‌رۆكایه‌تى هه‌ریَم و حكومه‌ت و په‌رله‌مانى
كوردستان بهیَنن تا هه‌ڵویَست بنویَنن و ئه‌و خه‌ڵكه په‌رِاگه‌نده‌یه‌ى
ده‌ڤه‌ره هیَرش بۆكراوه‌كان بپاریَزن و به‌هانایانه‌وه بیَن.
هه‌روه‌ها ویَرِای شه‌رمه‌زاركردنى هه‌ڵویَستى ئه‌نجوومه‌نى سه‌رۆكایه‌تى
و حكومه‌ت و په‌رله‌مانى ئیَراق له‌به‌رامبه‌ر هه‌موو ئه‌و سازشكاری و
تیَوه‌گلانانه‌ى كه‌وا له‌گه‌ڵ رژیَمه‌كانى ئیَران و توركیا ده‌یكات،
ئه‌وا پیَویسته ئه‌وه به‌بیر خۆیان بهیَننه‌وه كه‌وا به‌رخۆدانه مه‌زنه‌كه‌ی
گه‌ریلاكانى هیَزی پاراستنى گه‌ل (HPG) له(زاپ) وه‌ك چۆن به‌رگریكردن
بوو له كه‌رامه‌تى نه‌ته‌وه‌ییمان و پاراستنى هه‌ریَمی كوردستان، ئه‌وا
له‌هه‌مانكاتدا به‌رگریكردنیش بوو له "سه‌روه‌ری خاكی ئیَراق". بۆیه
سازشكردن و به‌شداربوون له‌هه‌ر پیلانگیَرِییه‌كی هه‌ریَمی و نیَوده‌وڵه‌تی
و بیَده‌نگبوون و بیَهه‌ڵویَستى له‌به‌رامبه‌ر ئه‌و تۆپباران و هیَرشه
ئاسمانیانه خۆی له‌خۆیدا په‌سندكردنى ئه‌و پیَشیَلكردنه‌یه كه‌وا له‌به‌رامبه‌ر
سه‌روه‌ری خاكی ئیَراق به‌رِیَوه‌ده‌چیَت، هه‌روه‌ها زه‌مینه‌ی زیاتر
بۆ ده‌ستیَوه‌ردانى هه‌ریَمی و قووڵكردنه‌وه‌ى كیَشه و گرفته ئه‌منییه‌كانى
دیكه ده‌ره‌خسیَنیَت، كه ئیدی ئیَراق به‌رگه‌ی ناگریَت.
له‌كۆتاییدا ویَرِای ده‌ربرِینی خه‌مگینى زۆرمان بۆ شه‌هیدبوونى (6) گه‌ریلاى
(PJAK) و پرسه و سه‌ره‌خۆشی خۆمان ئاراسته‌ى هه‌ڤاڵانى سه‌ركردایه‌تى
(PJAK) و سه‌رجه‌م هه‌ڤاڵانیان و بنه‌ماڵه و كه‌سوكارى شه‌هیدان و ته‌واوی
گه‌له‌كه‌مان ده‌كه‌ین و په‌یوه‌ستبوونى خۆمان به‌ریَبازی ئه‌و شه‌هیده
نه‌به‌ردانه و هه‌موو شه‌هیدانى ریَگای ئازادی دووپات ده‌كه‌ینه‌وه و
به‌شه‌هیدبوونیان تیَكۆشانی ئازادیخوازانه‌ی گه‌له‌كه‌مان شكۆدارتر و
سه‌ربڵندتره و گه‌یشتن به ئازادی و مافه ره‌واكانی نزیكتر ده‌كاته‌وه.
ــ نه‌مری بۆ هه‌موو شه‌هیدانى ریَگای ئازادی!
ــ هه‌ر ریسوا بیَت سه‌رجه‌م هیَرش و پیلانگیَرِییه دووژمنكارییه‌كان!
ــ ئیدی به‌سه بۆ بیَده‌نگبوون و بیَهه‌ڵویَستى !
ئه‌نجوومه‌نى پارتى چاره‌سه‌ری دیموكراتى كوردستان(PÇDK)
5.5.2008
_____________________________________________________________________________
بۆ
رای گشتی و هه‌موو ده‌زگاكانی راگه‌یاندن.
به‌رِیَزتان بانگهیَشت كراون بۆ ئاماده‌بوون له كۆنفرانسی رِۆژنامه‌وانی
سه‌باره‌ت به رِاگه‌یاندنی ئه‌نجام و برِیاره‌كانی چواره‌مین كۆنگره‌ی
پارتی چاره‌سه‌ری دیموكراتی كوردستان (PÇDK)
و ئه‌و گۆرِانكارییانه‌ی كه ئه‌نجامی داوه. كۆنگره‌كه‌مان له
شاری كه‌ركوك له‌رِۆژانی 1-3/5/2008 به‌رِیَوه‌چوو.
به ئاماده‌بوونتان خۆشحاڵین
ریَكه‌وتى:
سیَشه‌ممه 6/5/2008 ــ كاتژمیَر/
(10:30)ی به‌یانی
شویَن:
هۆڵی نه‌ورۆز ـ گه‌رِه‌كی ته‌په ـ كه‌ركوك
بۆ زانیاری زیاتر په‌یوه‌ندی بكه‌ن به‌م ژماره ته‌له‌فۆنه/
07704024227
كۆمیته‌ی راگه‌یاندنى
پارتی چاره‌سه‌ری دیموكراتی كوردستان
(PÇDK)
|
