بژى یەکى ئایار جەژنى جیهانى چینى کرێکار.

هەموو ئایارێک دەنگى چینى کرێکارى جیهان، ئەو چینەى کەزۆرینەى کۆمەڵگاى مرۆیى ئەمڕۆ پێکدەهێنێ، دژى ستەم و چەوسانەوەى نیزامى سەرمایەدارى هاوچەرخ بەرزدەبێتەوەو خەبات بۆ باشبوونى ژیان و گوزەرانى ئەو چینەو دامەزراندنى کۆمەڵگایەکى ئازادو یەکسان و دادپەروەر پەرەدەستێنێت.

چینى کرێکارى عێراق، وەکو بەشێکى جیانەکراوەى چینى کرێکارى جیهان، لەچەند دەیەى رابردوودا هەمیشە یادى یەکى ئایارى بەرزراگرتووەو ئەو جەژنە نێونەتەوەییەى خۆى یادکردۆتەوەو بەدروشمى جۆراوجۆرو خواستە هەنووکەیى و بنەڕەتى و چارەنوسسازەکانى خۆیەوە لەو رۆژەدا هاتۆتەمەیدان، بەهۆى ئەم خەباتە لێبڕاوەوە رۆژى یەکى ئایار لەعێراقدا پشوویەکى رەسمیەو بووە بەسومبلێک بۆ ناڕەزایەتى و مانگرتن و خۆپیشاندان لەدژى ستەم و چەوسانەوە بەشێوەیەکى گشتى و ستەم و بەربەریەتى سەرمایەدارى بەشێوەیەکى تایبەتى..

سەرەڕاى ئەو بارە ناهەموارەى یەخەى بەچینى کرێکارى عێراق گرتووە لەسایەى داگیرکارى ئەمریکاو سندانى تیرۆریزم و هێزە تیرۆریست و سەلەفیە جۆراوجۆرەکان و ژیان لەکۆمەڵگایەکى بێ دەوڵەت و دامەزراوەکاندا، هێشتا ئەو چینە لەسونەت و تەقالیدە خەباتکارەکانى خۆى لەوانەش لەبەرزراگرتنى یەکى ئایار دانەبڕاوەو هەموو ساڵیک لەو یادەدا جۆشى بەخەبات و تێکۆشانى خۆى داوە بۆ باشترکردنى ژیان و گوەزەرانى، هەر فرسەتێکى بۆ هەڵکەوتبێ لەدژى ئەم بارە ناهەموارەى ئێستا دەنگى ناڕەزایەتى قووڵى خۆى لەرێگەى نەقابەو کەسایەتیەکانیەوە بەرزکردۆتەوە خوازیارى ماف و داخوازیە هەنووکەیى و بنەڕەتیەکانى بووە و لەناڕەزایەتى و مانگرتنە جۆربەجۆرەکانیدا دەریبڕیوە، رەنگە باشترین نموونەى ئەم کارە مانگرتنەکانى یەکساڵى رابردووى کەرتى نەوت و بەتایبەتى ئەو مانگرتنەبێت کەلەلایەن سەندیکاى کرێکارانى نەوتى باشوورەوە رێکخرا. ئەو مانگرتنەو دەیان مانگرتن و خۆپیشاندانى لەوجۆرە پێدەچێت لەقۆناغى داهاتوودا بەهێزتر دووبارەببنەوە.

واقعیەت ئەوەیە کەبارودۆخ و ژیانى چینى کرێکارى عێراق لەخراپبوونى بەردەوامدایە و سیاسەتى خێوێیکردنەوەو نەبوونى ئەمنیەت و بێکارى بەربڵاو هێندەى تر ژیانى ئەو چینەى لەمەنگەنەداوە، زیادکردنى هەر ماوەجارێکى مووچەو کرێى کرێکاران و فەرمانبەران لەبەرئەوەى هیچ جۆرە هەنگاوێکى ترى بۆ گەشەپێدانى پیشەسازى و کشتوکاڵى و بەرقەرارکردنى عەدالەتى کۆمەڵایەتى و پەرەپێدانى رۆڵى چینى کرێکار لەبوارى ئابوورى و گەشەسەندندا بەشوێندا نەهاتووە بووەتە هۆى بەرزبوونەوەى زیاترى رێژەى هەڵئاوسان و چوونەسەرى گرانى و هاتنەخوارەوەى تواناى کڕینى کرێکاران و بەشمەینەتانى‌تر، هەروەها بووتەهۆى زیاتربوونى قەڵشتى نێوان داهاتەکان و زیاتربوونى داهاتى چینە باڵادەستەکان و بۆرۆکراتەکانى دام و دەزگاکانى دەوڵەت و بەڕێوەبەرەکان و باقى ئەو توێژانەى کەوەکو مشەخۆر خەریکن داهات و سامانى گشتى هەڵدەلووشن و دام و دەزگا گشتیەکانى حکومەت بۆ قازانجى خۆیان و کۆمپانیاکان و دامەزراوە تایبەتەکان بەکاردەهێنن.. لەلایەکى ترەوە داگیرکارى ئەمریکاو هەژموونى کۆمپانیاکانى و باڵادەستى هێزە تائیفى و میللیشیاییەکان و سەوڵى تیرۆریستان، وەهەروەها سیاسەتەکانى بانکى جیهانى و ێندوقى دراوى نێودەوڵەتى کەبەسەر خەڵکى عێراقدا سەپاندوویانە و حکومەتى عێراق لەئەستۆى گرتووە لەبوارى خێوێیکردنەوەو کشانەوەى دەوڵەت لەپشتیوانى خزمەتگوزاریە کۆمەڵایەتى و تەندروستیەکان و دەرگائاوەڵاکردن بۆ کەرتى تایبەت و کۆمپانیا بەدناوە ناوخۆیى و جیهانیەکان، هەموو ئەمانە خراپترین هەلومەرجى مێژوویى بەسەر چینى کرێکارى ئەم وولاتەدا سەپاندووە.

لەکاتێکدا کەچینى کرێکارى ئەم ووڵاتە لەبەرانبەر ئەو بارودۆخەدا دەستەوئەژنۆ دانەنیشتووە ئیتر کاتى ئەوە هاتووە لەدژى ئەو هەلومەرجە لێبڕاوتر رابوەستن و وەکو چینى سەرەکى کۆمەڵگاى عێراق رۆڵى خۆى بگێڕێت، کاتى دامەزراندنى سەندیکاو نەقابە کرێکاریە چالاکەکان و بەرەوپێشبردنى بزووتنەوەى داواکاریەکانە، کاتى بەرزکردنەوەى خواستى زیادکردنى مووچەکان بەپێی رێژەى هەڵئاوسان و گرانى و دابینکردنى کارى گونجاوو فراوانکردنەوەى تۆڕى زەمانەتە کۆمەڵایەتیەکان و دابینکردنى یاساکارێکى پێشکەوتووە کەناوەڕۆکەکەى پێوانەو بنچینەکانى رێکخراوى نێودەوڵەتى کار و هەموو ئەو رێککەوتننامە گرنگانەى تر بآ کەماف و ئازادیەکانى چینى کرێکار و ناڕەزایەتیەکانى دانپیادادەنێن..

یەکێتى کۆمۆنیستەکان لەعێراق وێڕاى پیرۆزبایکردن لەچینى کرێکارى عێراق بەبۆنەى یەکى ئایارو بانگەشەى کرێکاران و خەڵکى بەشمەینەت بۆ ناڕەزایەتى دەربڕین و کەڵکوەرگرتن لەهەموو شێوەکانى خەبات و ناڕەزایەتى لەچەشنى خۆپیشاندن و ئیعتێام و گێڕانى مەراسیمەکان، هاوکات پشتیوانى بێدرێغى خۆى بۆ خەباتى چینى کرێکار لەپێناوى داخوازیەکانیدا دووپاتدەکاتەوەو هاوشانى هێزو رێکخراوە چەپ و کرێکارى و شەعبیەکانى تر بۆ باشکردنى ژیان وگوزەرانى چینى کرێکارو چارەسەرکردنى بێکارى بەربڵاوو دامەزراندنى نەقابەو سەندیکا کرێکارى و پێشکەوتووەکان خەبات دەکات..

دەست لەناو دەست بۆ ژیانێکى باشتر بۆ چینى کرێکار.

بژى سۆشیالیزم

یەکێتى کۆمۆنیستەکان لەعێراق
30 ی نیسانى 2008