١٣\١٠\٢٠١٧

براوە و سوودمەندی سەرەکیی لە پرۆسەی گشتپرسییدا.

زاھیر باھیر      

قسەی من لەسەر ئەوە نییە کە ئایا مەسعود بارزانی خۆی گەمژە بوو، خەڵەتا یا خەڵەتێنرا، ئەوە باس و خواسێکی دیکەیە.

بە ڕای من ئەوەی کە قازانجی تەواوی کردو براوە بووە ئەردۆگان و ئاکەپە و میتی تورکیی بوون، ھەر وەکو ھەمیشە لەم سیاسەتەشیاندا زۆر سەرکەوتوو بوون. دوور نییە کە ئەوان لە پشتی بارزانییەوە نەبووبن و ھانیان نەدابێ تاکو ئەوەی کە ئەوان ویستیان و دەیانەوێ سەر بگرێ. ئەردۆگان و میتی تورکی زیرەکترین کەس و دەزگەی سیخوڕیین کە توانیویانە و دەتوانن چەندە سیناریۆ دروستبکەن لە پێناوی بەرژەوەندیی خۆیان و مانەوەیاندا.

مێژوی نزیکی ئەوان ئەمەی سەلماندووە ھەر لە دروستکردن و یارمەتی دانی داعش و ڕێکخراوە تیرۆریستییەکانی دیکە و فشارھێنان بۆ ئەوروپا بە کردنەوەی دەرگای پەنابەر بەڕویانا و زیرەکانە یاریکردن لە نێوانی ئەمەریکا و ڕوسیا و ئیسرائێل و وڵاتانی کەنداو و عێراق و ئێران و ھەتا سوریاش. تەڵەدانان بۆ پەکەکە و ئاڵاندنیان لە شەڕەوە تاکو توانا و وزەیان کەم کەنەوە و شارەکانی کوردستان خاپوور بکەن و جەماوەرێتی پەکەکەش لە تورکیا و ئەوروپا کەمبکەنەوە و لە لیستی ڕەشی تیرۆریزمەکان، نەسڕرێتەوە و قۆستنەوەی کودەتاکەی فەتحوڵا گوڵەن بە قازانی خۆیان و کڵاونانە بان سەری داعش و زۆری تر.

ئێستاش بە تیری گشتپرسیی چەندەھا نیشانێان شکان : بارزانییان پێ سووک و سەلێم کرد، قەوارەی ھەرێم بچوکتر دەکرێتەوە ، ڕق و کینەی نێوانی کورد و عەرەبیان زیاتر کرد. لەگەڵ ئێران وعێراق-دا بەرەیەکی نوێیان دروستکرد بۆ بەگژاچونی کورد، لەگەڵ وڵاتانی عەرەبی و ئیسلامیدا پەیوەندییەکەی بە ھێزتر دەبێ، لەگەڵ (جامیعەی ئەزھەر)دا ڕێکتر دەبێ، توورکمانەکانی کەرکوکی باشتر کردە خۆی، پێگەی خۆی لای ڕوسیا باشتر بەھێز دەکا سەبارەت بە ھەناردەکردنی نەوت و سوککردنی گەمارۆی ئابوریی لەسەر کوردستان وەکو مەرجێک لەسەر ڕوسیا، ھەروەھا لای ئەو کۆمپانیا بێگانانەی کە لە کوردستانا ھەن ھەمان شتە.

لەگەڵ ھەموو ئەوانەشی کە وتم ، ھێشتا بارزانی چەند کارتێکی بەدەستەوەیە گەر بیەوێ ژیرانە بەکاریانبھێنێ، واتە وەکو خەنجەرەکەی کابرا ھەر ھەڵیکێشێ بەڵام نەیوەشێنێ، لەوانە:

ھەڕەشەی راشکاوانە بە دەرکردنی سەرجەمی کۆمپانیا تورکییەکان لە کوردستاندا، یاساخکردنی گەشت بۆ تورکیا، قەدەخەکردنی ھەموو زنجیرە دراما و سینەماییەکانی تورکیا، نەرمکردنی پێیەک بۆ سەردانی قیبلەی کوردان، قەندیل، لە لایەن کوڕەوە یا زاواوە، ھەڕەشکردن لە تورکیا کە بنکە سەربازییەکانیان، دەبێت لەوێ ھەڵگیرێن و بکشێنەوە بۆ تورکیا، چاودێریکردنی سیخوڕەکانی میت و ھەراسانکردنیان و تەسککردنەوەی بواری چالاکییان، سازشکردنی تەواو لەگەڵ یەکێتی و ئیسلامی و " گۆڕان" و ئامادەبوون بە ھەموو مەرجێکیان جگە لە وازھێنان لە سەرۆکایەتی ھەرێم، ھەڕەشەی داخستی زانکۆ و پەیمانگە تورکییەکان و ناردنەوەی مامۆستاکانی.

بۆ ئەوەشی ئەمانە بکرێ پێویستی بە ١٠ ملیار دۆلارە بۆ ماوەی ٦ مانگ تاکو بژێوی خەڵکی لە کوردستاندا باشبکا و خەڵکی خۆ لەبەر کاردانەوەی تورکیا رابگرن. ١٠ ملیار دۆلاریش بۆ خێزانی بارزانی و تاڵەبانی وەکو ١٠ دینارە بۆ ھەر یەکێک لە ئێمە.

ئەمانە ھەندێک کارتن کە لە دەست بارزانیدایە گەر بتوانێ ژیرانە بەکاریانبھێنێ، ئەو کاتە ئەردۆگان و تورکیا ھیچ چارێکیان بۆ نامێنێتەوە جگە لە سازشکردن نەبێ.

٩\١٠\٢٠١٧ - لەندەن
ماڵپەڕی زاهیر باهیر