٣٠\٩\٢٠١٠

بیرۆکەى لکاندنى باشوورى کوردستان بە دەوڵەتى تورکیاوە لە جێى خۆیدایە.

هیوا رەش   

دەمێکە ئیسرائیل نەقیزەیان تێوە ئەژەنێت و جوتکە لە ئێمە ئەوەشێنن ، دەسەڵاتدارانى عەرەبیى دابەشبوو بەسەر زیاتر لە بیست دەوڵەت و دەسگرتوو بەسەر زۆربەى نەوتى جیهان ، لە هیچ جێ و کاتێکدا نەسڵەمیونەتەوە لە دژایەتى کردنى نەتەوەى کورد ،لە لایەک فرمێسک بۆ فەڵەستینییەکان ئەڕێژن و خۆ لە هەمبەر ئیستیتانى جولەکە گیڤ ئەکەنەوە ، لە لایەکى تریشەوە خۆیان هەمان سیاسەتى ئیستیتانى نامرۆڤانەتر دەرهەق بە کورد پیادە ئەکەن ! بیرى شۆفینیزمیى شۆڕبۆتەوە بە ناخ و دەروونیاندا و بە هیچ کلۆجێک دان بە مافە ڕەواکانى گەلى کورددا نانێن و لە هیچ قوژبنێکى دنیادا ئەو هەموو سیاسەتە بەرامبەر گەلانى بندەست پەیڕەو نەکراوە کە خۆى لە ( تەعریب ، تەبعیس ، تەهجیر ، تەرحیل ، تەسحیح قەومیە ، سەهرلقەومى ، ئەرازى مەحروقە ، مەناتق مەحەرەمە ، جینۆساید و قڕکردنى بەکۆمەڵ و ئەنفال و کیمیاوى باران ) دا خۆى ئەبینێتەوە ، بێگومان ئەمە جەستەى ڕۆشنبیرانى عەرەبیشى کرمێ کردووە ، و لە ئاستى دڕندانەترین ڕەفتارى فاشیستانەى بەعسییەکان دەرهەق بە گەلەکەمان شانازییان بە ( قائد الامە العربیە ) کەیانەوە ئەکرد و بەشان و باڵیدا هەڵیان ئەگووت و بێنوزە و بێهەڵوێستانە کوێرەوەرى و نەهامەتى گەلەکەمانیان بە مەفخەرەى سەرکردە چەقۆکێشەکانیان ئەزانى .

ئێستا لەم سەرەمەرگ و لنگەفرتێیەى بەعسییەکان و دەستوپێوەندەکانیان کە لە لیستى ( عراقیە ) دا کەوتوونەتە ( انعاش ) ەوە ، لە کاتێکدا کە (عراق العربی ) لە لەتوپەت بووندایە ، هێشتا هۆش و بیریان لە ( مەترسى سەربەخۆ ) بوونى کورد غافڵ نەکردووە و هەمیشە لە هۆڵ و غەمى ( شمال الحبیب ) ن بۆ دۆخى ڕابردوو بیگێڕنەوە ، لە بەرامبەریشدا سەرکردایەتى سیاسى کوردستان لەبرى غەمە نیشتمانى و نەتەوەییەکان بوونەتە عێراقیى عەیارە بێغەل و غەش و شەو و ڕۆژ ئەنێنە سەر یەک بۆ پاراستنى ( وحدە العراق ) و کۆکردنەوەى لیستە عەرەبییەکان کە وەکو ئاردى ناو دڕکیان لێهاتووە لە بەرەیەکدا ، بۆ دووبارە بنیاتنانەوەى عێراقى هەڵوەشاوە و ( تشکیل الحکومە العراقیە من اجل ارجاع العراق الى مکانتها – القومیە - ) و ئەیانەوێت دەسەڵاتێکى دیکەى ئەنفال بخەنە سەرپێ و لە سبەینێدا وەکو گورگى برسى بەربێتەوە وێزەمان و چەندبارە وڵاتمان دووچارى قات و قڕى ببێتەوە !

بۆیە ئەگەر بە ئاراستەى دابڕانى باشور و بەستنەوەى بە باکورى کوردستان بیر بکرێتەوە و هەوڵ بدرێت بکرێتە بەرنامەى سیاسیى ئاییندەى گەلەکەمان ئەوا جگە لە سوود زیانێکى ئەوتۆمان پێناگات ، لەبەر ئەوەى :

1 – نیشتمانى چوار پارچەکراومان دوو پارچەى کۆئەبێتەوە و و ئەوسا ئەبێت بە سێ پارچە ، بەمەش هەنگاوێک نزیکتر ئەبیبنەوە لە دەوڵەتى سەربەخۆ .
2 – لە هەمان کاتدا دوژمنێکى دڕندەى عەرەبى عێراقمان لە کۆڵ ئەبێتەوە و چى تر خاکمان بە بەشێکى دانەبڕاو لە نیشتمانى عەرەبى دانانرێت .
3 – مەترسیى سەپاندنى شەڕى – ئاو – مان لەسەر کەم ئەبێتەوە بە تایبەتى لە هەڕەشەى گرتنەوەى ڕوبارى دیجلە لێمان.
4 - ڕێژەى دانیشتوان لە پارچەیەکدا چڕتر ئەبێتەوە و ئەبێتە هێزێکى کاریگەر بۆ داکۆکى کردن لە خۆمان و فشار دروست کردن لەسەر دوژمن .
5 – یەکێتى خاکمان گۆڕێکى بەرچاوى تێ ئەکەوێت .
6 – لە ڕاڕەوە نێودەوڵەتییەکاندا دەنگمان بڵندتر و پێگەمان بەهێزتر و کاریگەریمان بەرجەستەتر و سەنگمان زیاتر ئەبێت .
7 – گریمانەى گێڕانەوەى ناوچە داگیرکراوەکانى وەکو کەرکوک و موسڵ و خانەقین و مەخمور و شوێنەکانى تر تۆکمەتر ئەبێت .
8 – سنورێکى دەسکردى نێوان خاکى نیشتمانمان کەمتر و پەیوەندییە نەتەوایەتییەکانمان لەگەڵ هاونیشتمانیانى باکورماندا توندوتۆڵتر ئەبێت .
9 – ئومێد و وورەى زیاتر بە ڕۆڵەکانمان لە ڕۆژهەڵات و ڕۆژئاواى کوردستان ئەبەخشین بۆ زیاتر نزیک بوونەوەمان لە یەکتر و هەماهەنگیى لە تێکۆشان لە پێناوى سەربەخۆییدا .
10 – ئەتوانین ڕایەڵەى پەیوەندییە نەتوایەتییەکانمان لەگەڵ هاوزمانەکانى ترمان لە دەوروبەر لەسەر بنەماى کوردبوونمان بەهێزتر بکەین .
11 – دەسبەردارى کولتورى سەقەتى کوشتوبڕ و شەڕانگێزى و نائارامى و داگیرکاریى عەرەبى ئیسلامى ئەبین و لە کلتورى ئەوروپى قۆناغێک ئەچینە پێش .
12 – دوژمنمان کەمتر ئەبنەوە و لە چوارەوە ئەبن بە سێ .
13 – زیاتر بە دنیاى دەرەوە ئەبەسترێینەوە و کرنەوەیەکى باشمان بۆ ئەڕەخسێت .
15 – لەگەڵ سەرنج و تیبَبینى زۆر و ڕەخنەى توندمان لەسەر دڕندایەتى ڕژێمى کەمالیستى تورکیا بەڵام ئەتوانین سوود لە ( کرانەوە و ئەو دۆخە نیمچە دیموکراسییە) ى بەڕێوەیە لەو وڵاتەدا وەربگرین .

ئەمە و وێڕاى لەبەر چاو گرتنى ئەو دانپێدانانەى دەوڵەتى عێراق بە مافە نەتەوایەتییەکانمان و داننان بە هاوبەشیى کورد و عەرەب و تەماشا کردنى نەتەوەى کورد وەکو نەتەوەى سەرەکى و دووەم لە عێراقدا ، بەڵام مێژوو سەلماندوویەتى هەموو ئەمانە لە کاتى بەهێزبوونى دەسەڵاتدارێتى عێراقدا گەردەلوولى شۆفینیزمى ڕاپێچیان ئەکات و هیچ زامنێک نیە بۆ پاراستنى گەلەکەمان لە دەسدرێژییەکانیان ، بۆیە بیر کردنەوە بە ئاراستەى چوونە پاڵ تورکیا لەم بارودۆخەدا بە پەسەند ئەزانم .

ماڵپه‌ڕی هیوا ره‌ش