|
٢٨\١\٢٠١٣
بتی تابووەکانی
(نەریتئاین)تان دەشکێنین!
سەلام عەبدوڵا
لە وڵاتەکەمان نەریتی کۆمەڵایەتی کۆنەپارێز و ئاین بەیەک تێکەڵبوون و
کۆکتێلی سیستێمێکی مافیایی دڕندەیان بەرهەمهێناوە و دەبنە هۆی ئەوەی
پیاوان هەموو رۆژێک تاوان ئەنجام بدەن و، تاوانبارەکانیشیان ژیانی
ئاسایی خۆیان بەرێوە دەبەن.
کاتێ بەناوی نەریت و ئاینەوە پەیوەندی و دۆستایەتی لەنێوان کچ و کوڕ
دەبێتە تابوو، ئەو کات دەرگای کار و کردەی مافیایی دەکرێتەوەو تەواوی
کۆمەڵگە خۆی لەگەلیاندا دەگونجێنێت و وەهم رۆڵی سوڵتان دەبینێت، واتە
(شەوە، دوعا، مێردەزمە، جنۆکە، مەراز، قاوەگرتن، کردنەوەی دەمی قورئان،
دەستخوێندن) لە مێشک و پەیڤ و رەفتار جێگیردەبن و ژیان بەدەوریاندا
دەسوڕێتەوە، دەستوقاچی مرۆڤیش بە زنجیری کوێلایەتی تونددەکرێت، هەر کەس
و لایەنێک هەوڵبدات بەری پێبگرێت، ئەوا تۆمەتەکان ئامادەن وەک (کافر،
شوعی، بێڕەوشت، رۆژئاوایی)!
بە هۆی باڵادەستی تێکەڵەی (نەریت و ئاین)ەوە، دەستدرێژی سێکسی لەناو
خێزانەکان روودەدەن، بۆ نموونە لە خانەقین چوار حاڵەت روویداوە کە (سێ
خاڵۆ و مامێک دەستدرێژیی سێکسییان کردووە یان لەگەلیان رێککەوتوون) و
باس لە پەیوەندیی سێکسیی (خاڵ و برا و خۆشک و پور) دەکرێ و فرێدانی
کۆرپەیەکی تەمەن یەک رۆژ، هەروا لەم رۆژانە لە کەلار دەستدرێژی (باوک و
برا)یەک لەسەر کچ و خوشکی خۆیان روویدا، بەڵام ئێمە پرسیار دەکەین:
- چەندە ژمارەی ئەو جۆرە رووداوانە کە تاونبارەکانیشیان ناسراو نین؟
- چەندە ژمارەی ئەو منداڵانە کە دەبن بە قوربانی تیرۆری سێکسیی پیاوان؟
- چەندە ژمارەی ئەو کچانە کە لە ماڵەوە بریندار دەکرێن و نە پۆلیس، نە
ئاسایش و نە دادگاکان پێیان دەزانن؟
ژمارەی ئەو تاوانانە زۆر ترسناکن و خۆیان لە ژمارەی تیرۆری دەروونیی و
فیزیکیی کچان و ژنان دەدەن، بەڵام هیچ دەزگا، بنکە و رێکخراوێک ناتوانێ
وڵامی ئەم پرسیارانە بداتەوە:
رۆژانە کچان و ژنان و منداڵان رووبەڕووی سێکسکردن بە زۆرەملی، لێدان،
جەمێن، هەڕەشە، ترساندن، ناوزڕاندن، پارە وەرگرتن، بڵاوکردنی ڤیدیۆ و
وێنەی کچان بە رووتیی یان دەستکاریی وێنەکانیان بە فۆتۆشوپ و
بڵاوکردنیان.
ئەو جۆرە تاوانانە دەبنە هۆی ئەوەی کچان و ژنان پەنا بۆ ترسناکترین
شێوەی خۆکوشتن ببەن (خۆسوتاندن، خۆ خنکاندن بە پەت یان غاز) یان بە
خواردنی بڕێکی زۆر لە حەپ، وایان لێ دەکەن خۆیان کۆتایی بە ژیانیان
بهێنن و هەندێ جاریش باوک، شوو و برا دەیانسوتێنن یان دەیانخنکێنن و
ناوی لێدەنێن (قەزا و قەدەر) و پرسەشیان بۆ دەنێن.
کۆمەڵگەکەمان بە شێوەی کار و کرداری مافیایی بەرێوەدەچێ و بەم شێوەیە
زیاتر لە هەر شوێنێکی ئەم سەرزەمینە تاوانی نامرۆییانە بەرهەمدەهێنێ.
ئێمە دەڵێین بەسە و کاتی ئەوە هاتووە دەستپێشخەریی بکرێ بۆ سنووردانان
بۆ ئەم دڕندایەتییە، بە واتایەکی تر دەبێ کار لەسەر شکاندنی تۆق و
زنجیری یاسا و رێسای باوی پەیوەندیی نێوان کچان و کوڕان بکرێ: بتی
(نەریتئاین) بشکێندرێ، ئێمە پێیان دەڵێین ئەوە بەری کارەکانتانە، تەنها
رسوایی و سەرشۆڕیی و تاوانە!
ماڵپه‌ڕی سه‌‌لام عه‌بدوڵا
|
