١٧\٩\٢٠١١

بۆمباباران و لەشکرکێشی، یان ترس لە شۆڕش.

عەبدوڵا مەحمود  

تائێستا، تۆپباران و لەشکرکێشی جمهوری ئیسلامی ئێران و ڕژێمی تورکیا بەردەوامەو بەپێی سەرچاوەکانی هەواڵ و بەیانی پەرلەمانی!! کوردستان سوپا یئێران بە قوڵایی ٢٠ کیلۆمەتر هاتۆتە ناو هەرێمی کوردستانەوە و تورکیاش جگە لە ملهوری سەربازی دەمێکە بارگەی جێخستووە.

دیارە کورتکردنەوەی دەستێوەردانی ئەم رژێمانە بە بۆردومانکردنی ناوچە سنوریەکان، یان هێرش و پەلامار بۆسەر بارەگاو هێزەکانی پژاک و پەکەکە، یان هێزە نەیارەکانی ڕژێمی ئێران و تورکیا... بێ ئامانج نییە. چونکە تۆباران و بۆمبابارنکردن و بەزاندنی سنورەکانی هەرێمی کوردستان، تەنها گۆشەیەک و دیوێکی ملهوڕی نواندنی ئەم ڕژێمانەیە کە نزیکەی ٢٠ ساڵە، ناو بەناو و لەژێر بیانو پەڵپی بێبنەمادا، ئەنجامی دەدەن.

ئێران و تورکیا، بەبەرنامەوە دەستێوەردانی خۆیان لە وەزعی سیاسی عێراق بەگشتی و کوردستان بەتایبەتی دەست پێکردووە. لەوکاتەوەی ڕژێمی بەعس لە کۆمەڵگای نێودەوڵەتی تەریک خراو پاشان نەخشەی جەنگی و جەنگ لەدژی بەپاکرا، هەردوو ڕژێمی ئیران و تورکیا، بەمەبەستی بەهێزکردنی ڕۆڵی سیاسی خۆیان لەناوچەکە و عێراقدا بەنەخشەو لەرێگای جۆربەجۆرەوە ئەم دەستێوەردانەیان دەستپێکرد. دۆسیەی ململانێی ئەمریکاو ئێران لەژێر ناوی بەرنامەی هەستەیی ئێران، دەوری ئێران لەپشتیوانی رەوتگەلی ئیسلامی شیعی لە خوارو ناوەراستی عێراق و رەوتگەلی ئیسلامی سونی لە کوردستان، تورکیاو ئێران و پیشبرکێیان لە ناوچەکە، مەسەلەی بوونی تورکمان لە کەرکوک و پێگەیان لە بڕیاری سیاسی عێراق، تا دەگات بە دۆسیەی سیاسی کوردستان و دۆخی هەڵواسراو کراوەکەی و دەسەڵاتی خۆجێی حزبەکانی کوردستان... کۆمەڵیک فایلی زنجیرەیین کەوای کردووە عێراق کوردستان بکەنە مەیدانێکی جەنگی سیاسی و دیبلۆماسی و گۆرەپانێک بۆ یەکلاکردنەوەی کێشە وململانیی نیوان خۆیان و ئەمریکاو پاراستنی بەرژەوەندییە سیاسی و ئابورییەکانیان.

لەو نێوەدا، دەیان بنکەو بارەگایی جاسوسیان لە ژێر ناوی جۆراوجۆردا، قوتکردۆتەوە. بە ئاشکرا رەوتگەلی سیاسی سەر بەخۆیان دروست کردووە، یان کەوتونەتە دەستەمۆکردنیان، وە لە هاوکاری و پشتیوانی حزب و لایەنەکانی موچەخۆری خۆیان دریغیان نەکردووە بۆ ئەوەی مەئموریەتی ئەم رژێمانە جێ بەجی بکەن و لەو رێگایەشەوە دەستێوەردانی خۆیان ببەنە پێشەوە.

ئەوەی لە دۆخی ئیستادا دەگوزەرێ، بیگومان زۆر فاکتەری تازەی لەپشتەوەتە. درێژە کیشانی دورگەی ئاوەڵاو کراوەی کوردستان و نەبوونی ئاسایشی سنوری بەهۆی نەبوونی ناسنامەی جێگاو ڕیگای حقوقی کوردستان لە جغرافیای رەسمی ناوچەکەو دنیادا. ململانێ و کێشمەکێشی باڵەکانی بۆرژوازی عێراقی لەسەر چۆنیەتی پێکهێنانەوەی قەوارەی دەوڵەتی عێراقی، ناکامی ئەمریکا لە عێراق و ناچاربوونی بە پاشەکشەی زوربەی هێزە چەکدارەکانی، بوونی فایلی کیشەی کەرکوک و تورکمان، ئامادەیی رەوتگەلی ئیسلامی سەر بەئێران و رەوتی باڵادەست و کریگرتەی ئێران لە پیکهاتەی حکومەتی!! عێراقدا" مجلس اعلی ئیسلامی و رەوتی سەدر و فەزیلەو...، بوونی رەوتگەلی ئیسلامی و ئامادەیی خۆشخزمەتی پارتی و یەکێتی زوربەی باڵەکانی ئۆپۆزیسیۆن! بۆ ئێران.... هەموویان زەمینەکان و ژینگەی دەستێوەردانەکانی ئیران و تورکیایان دروستکردووە.

بە جیا لەوهۆکارانەی سەرەوە دەورەی شۆرش و دۆخێ شۆڕشگێڕانە کە ناوچەکەی داگرتووە، تازەترین فاکت و بەهێزترین هۆکاری درێژەپێدانی دەستێوەردانەکانی تورکیاو ئێران و فراونکردنەوەیەتی.

پریشکی شۆڕش و ئاگری توڕەیی جەماوەر لە دەسەڵاتە سەرکوتکەرەکان و بۆ ڕاماڵینی نابەرابەری ئابوری و گەندەڵی... دەوری ئێران و تورکیای تەنییوە. سوریای دۆست و هاوسێی هەردوو ڕژیمی ئیران و تورکیا و... لە لێواری کەوتندایە بەدەستی جەماوەری توڕە لە سەرکوت و گرانی و برسێتی...تاد.

دەستپێکردنی شۆرش لە سوریا و بەردەوامی بۆ روخاندنی ئەم رژێمە، سێڵاوێکە لە تورەیی کە لەگەڵ خۆیدا، شەپۆلەکانی هەرئیستا کەنارەکانی ئەم رژێمانە دەلەرزێنێ... هێزی تورەو شاراوەی بۆ گۆرانکاری و شۆرش لە ئێران و تورکیادا... ڕادەپسکێنێ و ئامادەی دەکات و دەیجوڵێنی. ئیران و تورکیا بەدوای بەرگرتن بە سێڵاوی شۆڕشەدا... وێڵن. وێڵن تا جوڵەکان و ئامادەییەکان، تا هێزی شاراوە و ئامادەی ڕاسان دەستەمۆ بکەن، سەرنجەکان و چاوی تیژ سەر ئاڵوگۆڕەکانی ناوچەکە بگوازنەوە سەر کێشەو دۆسیەیەکی تر.

ئێران و تورکیا، وەک دوو رژێمی فاشستی دینی و ناسیونالیستی، لە کەنار ڕاپەرینی برسیەکان و خوازیارانی ئازادیدا کە لەسوریا دەستی پێکردووە، هاوکات وەکو دوو ڕژێم کە ئامادەنین کیشەی خەڵکی کوردستان بە چارەسەر بگەیەنن، ناچارن لە دۆخی شۆڕشگێرانەی ئێستای ناوچەکەو دنیادا، لە فەزای چاوکراوەیی و خۆ هۆشیاری جەماوەری و بەرین بونەوەی تورەیی و نەفرەت و نارەزایەتی ئۆردوی کرێکاران و زەحمەتکێشانی ناو کارگەو شارەکان، دەستەمۆی جەنگی سەر سنورەکان و پێکدادنی چەکداری و دەستێوەردانی ناوچەیی بکەن.

فاکتەکان و زەمینەکانی هەڵسان و ڕاپەرینی دنیای عەرەب و ناوچەکە، لە تورکیاو ئێراندا ئامادەیی بەرجەستەیان هەیە. سەرکوت و دیکتاتۆریەتی مەزهەبی ئێران و قەومی و فاشستی تورکی، قوڵبونەوەی قڵشتی چینایەتی فراوان، کێشمەکێشی باڵەکانی باڵای دەسەڵاتدارێتی ئێران و بۆ رزگارکردنی دەسەڵاتی ئیسلامی، درزە فراوانەکانی دەسەڵاتی رەسمی دەوڵەتی تورکیا لەگەڵ دەسەڵاتی سەرکردەو سوپا سالارە خاوەن کودەتا سەربازییەکان، درێژەدان بە زوڵمی نەتەوایەتی، لەگەڵ ئەو هەموو گەندەڵی و برسێتی و گرانییەی دەستی ناوەتە بینەقاقای ملیۆنەها ئینسانەوە...تاد، ژینگەی هەڵسانی ئۆردویەکی ملیۆنی لەدژی ئەم ڕژێمانە سازداوە.

ترس و هەراسی هەردوو ئەم ڕژێمە لە شۆرش و راپەڕینی جەماوەری، مەبنای جموجۆڵە دژی خەڵکی و ملهوری نواندنی ئەم دەورە تازەیەیە.

چونەسەری ئاستی دەستێوەردانەکانی ئێران و تورکیا و بۆدومان و لەشکرکێشی سەربازی ئیستا نەک تەنها بۆ پاشەپێکردن بە بزوتنەوەی شۆڕشگێرانەی خەڵکی کوردستان و نارەزاییتیە جەماوەریەکانیان کە لەشارەکاندا قوڵپدەدات، نەک بۆ دەستەمۆکردنی زیاتری دەسەڵاتی لۆکاڵی یەکێتی و پارتی، نە بۆ ململانێی لەسەر چۆنیەتی سازدانەوەی دەوڵەتی عێراق و نە بۆ ململانیی لەسەر قەڵەمرەوی باڵادەستی... بەڵکە لە بنەرەتدا بۆ ئەوەیە کە دەسەڵاتەکانیان لە مۆتەکەی شۆڕش دوربخەنەوە. ئەو شۆڕشەی لەسەر بنەمای پچرانی پەتی تەحەمولی ملیۆنی و ئینسانەکانی وێل بەدوای ئازادی و نان و بەرابەری و لە ژێر کاریگەری شۆڕشی وڵاتانی ناوچەکەدا، خەریکە وەجوڵە دەکەوێت.

لەشکرکێشی و مانۆرەکانی هەر دوو رژێمی ئێران و تورکیا لە ئاستی دنیا و ناوخۆ و لەسەر سنورەکان و ... هەوڵ تەقەلایەکی بەنەخشەیانە بۆ بەرگرتن بەشۆڕش و ڕاپەرین کە ئێستا لە سوریای پاڵ دەستیاندا، شەپۆڵ دەدات. بێدەنگەی ئەمریکاو غەربیش لەبەرامبەر بەم هێرشانە، نیشانەی پشتیوانیکردنی ڕاستەوخۆیە لەم هێرشانەو درککردنی هەلومەرجی خەتەرناک و لەدەست دەرچووی بزوتنەوەی شۆڕشگێڕانەی ئەم دەورەیەیە. بێگومان هەرهەوڵێک و هەر مانۆرێک کە بتوانێ فراونبونەوەو بەرین بوونەوەی دۆخی شۆڕشگێڕانەو شۆڕش، دوابخات یان بەلارێیدا ببات، لەلایەن ئەمریکاو غەربەوە قابیلی پشتیوانییە.

ناوەڕاستی سێبتەمبەری ٢٠١١
ماڵپه‌ڕی عه‌بدوڵا مه‌حمود