|
بۆ وەزارەتى
رۆشنبیریى بەڕێز....!
کوا
رێزلێنانەکەتان بۆ نووسەران و هونەرمەندان ؟؟
حەمەى ئەحمەد رەسوڵ
کەس نییە لەم دونیایەدا لە نووسەر و رۆشنبیر
و هونەرمەند هەستیارتر و کەساستر
و بێنەواتر، لە هەموو روویەکیشەوە.. لە ئابووییەوە بگرە تا بە
کۆمەڵایەتى و دەروونى و کەسایەتى دەگات..!
نووسەر کەسێکە دووچارى شێرپەنجەى خوێندنەوەو نووسین بووە.. پێویستى
بەدەرامەت و دراوە بۆ کڕینى کتێب و رۆژنامەو گۆڤارو تەنانەت سیدیش..
نووسەر و هونەرمەندى راستەقینە لە بوارى
خوێندنەوە و نووسین زیاتر هیچ شتێکى دیکەى
دونیایی ئیغراى ناکات.. نانێکى ئاسایی و قومێک ئاوى ساردى هەبێت، بەڵام
جێگەو شوێنێکى هێمنى دەستبکەوێت بۆ بیرکردنەوە و نووسین، ئیتر ئەوە
ئەوپەڕى ئاواتییەتى..
ئەوەندەش قەناعەتى هەیە کە ژوورو هەیوانێکى هەبێت بەسییەتى، کرێچی بێت
یان بەڕێکەوت لە باوکەوە بۆى مابێتەوە ئەوە بۆخۆى پاشایە و جێگیر و
سەقامگیرە.. بۆڵەبۆڵى بەسەر کەسدا نییە..بەڵام لەڕاستیدا زۆرینەى
نووسەرانى راستەقینە و هەقبێژ وسەربەست و سەربەخۆ لەڕووى ئابوورییەوە
کەمدەرامەتن و نەدارو هەژارن.. لەڕووى کۆمەڵایەتییەوە کێشەو ئاریشەیان
زۆرە، یان مناڵێکى زۆریان خستۆتەوە..یان کرێچین یاخود تەندروستى
خێزانیان باش نین..!
لەڕووى دەروونییەوە نووسەرو هونەرمەند کەسێکن هەمیشە پەشێوو نیگەران و
وەسواس و نائومێدن، خەمۆکى و دڵەڕاوکێ خەسڵەتى کەسایەتى زۆرینەیانە..
ئاسوودە و بەختەوەر نین.. خەمیان ئێجگار زۆرە.. مامە خەمەن.. خەم لە
هەموو شتێک دەخۆن.. لە هەموو شتێک دەکۆڵنەوە.. ئەوەى زۆر برینداریان
دەکات ئەوەیە کە نایەکسانى و نادادوەرى کۆمەڵایەتى و خۆدەوڵەمەندکردنى
ناشەرعییانە دەبینن و دەبیستن.. ئیتر گڕیان لێدەبارێت.. دڵیان
دەگووشرێت، کاتێکیش کوڕە مەنسول و بەرپرس و نووسەرانى حیزبى دەبینن کە
چۆن هایلایڤ دەژین، تەواو بێزارى و خەمگینى بیرکردنەوەیان دادەپۆشێت و
قەڵەمى نائومێد دەبن و لە نیشتمان و لە ژیان دەتۆرێن.. بۆچی؟؟ چونکە
نووسەر و هونەرمەند زۆر هەستیار
و دڵناسکن.. کەسێکن بۆ وڵات و میللەت دەسووتێن..
هوزارێکن و بۆ نیشتمانەکەیان
دەچریکێنن..بەڵام کە دە ناهەقى دەبینن و دەبیستن.. خوێن لە
دڵیانەوە بەرەو چاویان سەرئەکات.. بەرچاویان تاریک دەبێت..تووڕە
دەبن.. قسەى هەق وڕەق دەکەن.. خۆیان نانبڕاودەکەن( وەکو بەندە!!)
بەڵام ئەگەر ڕاسست دەوێت، لەگەڵ هەموو ناوهێنانێکى وڵات و نیشتماندا:
بەتایبەت لە هەندەران و لە کەناڵە بیانیەکانەوە دەستبەجێ چاویا قەتیس
دەمێنێ و دڵیان پەلەپەل دەکات و زۆرجاریش دەدەنە پڕمەى گریان، دڵیان
ئەوەندە سپییە لە شێوەى دڵى مناڵێکدا هیچى تیا نییە
و دواى تووڕەبوونەکەیان خۆیان لە هەڵوێستە توندەکەى خۆیان
پەشیمانن کە خوایە دڵى کەسی تریان ئەزییەت نەدابێت....!
لەبەرئەوە وەزیرى هێژا.. وەزارەتى رۆشنبیرى بەڕێزى کوردستان، ئایا
لەگەڵ ئەوەدان کە نووسەران و هونەرمەندان ئەوەندەى دیکە نائومێدتر و
دڵشکاوتر و کەساستر و بێنەواتر بین؟
پێتان خۆشە تووڕەتر و تۆراوتر و بێ ئینتماتر بین بۆ هەموو شتێکى ئەم
زێدە شیرینە؟
ئەوەتا لە سلێمانى هەموو پێنجى مانگێک بەڕێوەبەرایەتى ڕێزلێنان دەرگاى
کراوەیە و پۆلێک لە نووسه‌ران و
هونەرمەندانى بێ مووچەى حکومەت، بە باخەڵى گەرمەوە دەچنەوە ماڵەوە..
ئەوەى دەساڵ خزمەتى هەیە سەدو پەنجا هەزار دینار وەردەگرێت.. ئەوەى
پازدەساڵ خزمەتى هەیە دووسەدهەزار وەردەگرێت و......تاد. بەڵام دەساڵى
وەزارەت شەست هەزارە و پازدەساڵیش حەفتاو
پێنج هەزار وەردەگرین..!
بە نیسبەت بەندەوە: ئەمساڵ دەبێتە بیستودوو ساڵ خزمەتى نووسینم هەیەو
کەچى هێشتاکە حەفتاو پێنج هەزارەکە وەکو خۆیەتى و زیادى
نەکردووە..ئەمەش گلەیی خودى خۆم!
بەڕێزان وا نزیکەى بۆ 9 نۆ مانگ دەچێت ئەم ڕێزلێنانەتان پێنەداوین.. خۆ
ئەگەر تەنها پشتمان بەم مووچەیە ببەستایە لە برسانا دەمردین و لەژێر
قەرزدا چاومان دەردەهات..!
بەڕێزان حەز دەکەم ئەوەشتان پێڕابگەیەنم کە نووسەران و هونەرمەندانى
بەغداد مووچەى 375 هەزار دینار وەردەگرن و ساڵانە دەتوانن سولفەش بکەن..
لەبەرئەوە تکایە ئەو ڕێزلێنانەمان بۆ هەموار بکەنەوە چونکە ئەو بڕە
مووچەیە زۆر کەمە بە بەراورد لەگەڵ ڕێزلێنانەکەى سلێمانى و بەغدادا کە
(مانگانەش وەریدەگرن)!!
ئێستا خۆشبەختانە وەزارەتى دارایی یەکیگرتۆتەوە و هیچ کێشەیەک نەماوە
لە مەسەلەى دوو ئیدارەکەدا، لەبەرئەوە پێویستە نووسەران و هونەرمەندانى
هەردوو دەڤەرەکەى سلێمانى و هەولێر وەکو یەکترى ڕێزلێنان وەربگرن و
کەسى ئەملا ئیرەیی بە کەسی ئەولا نەبات..!!
برایانى زۆر بەڕێزم: ئەگەر بە نیازن ئەو بڕە ڕێزلێنانەمان ببڕن و ببینە
قوربانى ئەم قەیرانى بوودجە و تەقەشوفى داراییە، ئەوا سووک و باریک
پێمان بڵێن و با چیبدیکە چاوەڕوان نەبین، چونکە چاوەڕوانى بۆ شەیتانیش
دژوارە....!!
سلێمانى
31\3\2009
|
