٢٣\٦\٢٠٢٦

چالاکییەکانی ڕۆژی جیهانیی پەنابەران

لە سلێمانی بەڕێوەچوو.

ڕۆژی شەممە ٢٠ی حوزەیرانی ٢٠٢٦، فیدراسیۆنی سەراسەری پەنابەرانی عێراق - لقی کوردستان، لە باخی گشتیی سلێمانی، بە بۆنەی ڕۆژی جیهانیی پەنابەران، چەندین چالاکیی جۆراوجۆری بەڕێوەبرد.

لە سەرەتادا، داوای لێبوردن لەو بەڕێزانە دەکەین کە کاتژمێر ٤ سەردانیان کرد، بەڵام بەهۆی لێکتێنەگەیشتنێک لەگەڵ هێزە ئەمنییەکان، چالاکییەکان بۆ ماوەی کاتژمێرێک دواکەوت.

چالاکییەکان بریتی بوون لە:

پێشانگای فۆتۆگرافی: خستنەڕووی کارەسات و مەترسییەکانی ڕێگای کۆچی نایاسایی.نامیلکەی هۆشیاری: دابەشکردنی زانیاری بۆ گەنجان دەربارەی مەترسییەکانی کۆچکردن.گفتوگۆ و ڕاپرسی: گفتوگۆیەکی کراوە و گەرموگوڕ لەگەڵ هاووڵاتییان دەربارەی کێشەکانی کۆچ و دۆزینەوەی چارەسەرەکان.

پەیام و هەڵوێستی فیدراسیۆن:

لەم ڕۆژەدا، پەیام و هەڵوێستی فیدراسیۆن خرایەڕوو کە: «ئازادی سەفەر و هەڵبژاردنی شوێنی ژیانێکی ئارام، مافی سەرەتایی هەموو مرۆڤێکە.».

هەروەها ڕەخنەی توند لە کەمتەرخەمیی حکومەتی هەرێم و عێراق گیرا، بەهۆی نەبوونی هەلی کاروبێمافی هیرش بۆ سەرئازادیەکان، ناسەقامگیریی ئابووری و خراپیی خزمەتگوزارییەکان، کە هۆکاری سەرەکیی کۆچی گەنجانن.

بە توندی سەرکۆنەی سیاسەتی دیپۆرتی زۆرەملێ و نەژادپەرستانەی حکومەتەکانی ئەوروپا (بەتایبەت سوید، ئەڵمانیا و بەریتانیا) کرا، کە پێچەوانەی یاساکانی مافی مرۆڤ مامەڵە لەگەڵ پەنابەراندا دەکەن.

شایەنی باسە ژمارەیەکی بەرچاو لە هاووڵاتییان لەم چالاکییەدا بەشدارییان کرد.

لە کۆتاییدا، لقی کوردستانی فیدراسیۆن سوپاس و پێزانینی خۆی دەردەبڕێت بۆ هەموو ئەوانەی هاوکاریان کرد لە بەڕێوەبردنی ئەم چالاکییە، هەروەها بۆ بەشداریی گەرموگوڕی هەڵسوراوان، گەنجان، کرێکاران و چین و توێژە جیاوازەکان، کە بەشدارییان لە گفتوگۆ و ڕاپرسییەکاندا کرد.

هەروەها سوپاس بۆ ئەو بەڕێزانەی لە سەرەتای چالاکییەکەوە هاوکارییان کرد لەگەڵ ئاسایش و هێزە ئەمنییەکان بۆ ئەوەی چالاکییەکە بەڕێوەبچێت.

فیدراسیۆنی سەراسەری پەنابەرانی عێراقی / لقی کوردستان
٢٠\٦\٢٠٢٦