٨\١١\٢٠١١

چاو سوورەکان!

جەلال قادر    

ھەر لە مندالییەوە سوورە خووی گرتبوو بە مێروولە کۆکردنەوە. ھەر کات شارە مێروولەیەکمان بدۆزیایە بانگی سوورەمان دەکرد. سووورەش لە خۆشیا ھەلدەپەڕی و کیسەیەک نایلۆن یان بتلێک شووشەی دەھێنا پڕی دەکرد لە مێروولە و بە غاردان دەگەڕایەوە ماڵ.

سوورە نە چاوی سووربوو نە قژی ، لێ لە مندالییەوە جار جار بەری چاوی سوور دەبوو بۆیە ناوماننا سوورە !
نەماندەزانی بۆچی سوورە مێروولە کۆدەکاتەوە و بەخێویان دەکات . ئەگەر بچویتایە ناو حەوشەکەیان بن دیواری مالەکەیان پربوو لە شارە مێروولە.
لە سەردەمی مندالی واماندەزانی ئەمە ئارەزوویەکی کاتییە سوورە خووی پێوە گرتووە، کەچی ئێستا تەمەنی بەناو سالاچووە و مێروولە لەگیرفانی دایە و بۆ ھەرکوێ بچێت لەگەل خۆی مێروولەکان دەبات .

لە سەردەمی ھەرزەکاری ئەو کاتەی ڕێگامان لە کچان دەگرت ، سوورە سەرقالی مێروولە کۆکردنەوە بوو .
لە بیرمە جارێکیان ( بەھار) کە جوانترین کچی گەڕەک بوو بە منی وت : بە سوورە بلێ واز لە مێروولە گرتن بھێنێ منیش دەبمە دەزگیرانی .
ئەو ڕۆژانە ئێمە بۆ پەیدا کردنی دەنکێ دەچووینە ئاسمان ..کاتێ ڕاسپاردەکەم بە سوورە گەیاند . سوورە بە قوڕگی پڕ لە گریان وتی : پێی بلێ ناتوانم ..
وتم : سوورە چیت لە مێروولە داوە .. بەھار بکە مێروولە و لەگەلی وازی کە !
سوورە ڕایکردوو لێم دوور کەوتەوە!

ئەم نھێنی بەخێو کردنی مێروولەیەم لێببووە مەراق و نەمدەزانی بۆ ئەم گیانلەبەرە ئەوەندە گرنگە بەلای سوورەوە؟!
لە مندالییەوە تا سەردەمی ھەرزەکاری سوورە ڕوخسارێکی ڕێک و پێک و ئاسایی ھەبوو . لە تەمەنی گەنجی بەدواوە سوورە ڕۆژ بە ڕۆژ روخساری زشت وترسناکی ھەبوو . بۆیە سوورە بووە کەسێکی گۆشە گیرو دوورلە ھەموو شت .

سوورە لەگەل مندا پەیوەندییەکی بەھێزی ھەبوو . ھەر پرسیارێکی ھەبوایە لێیدەپرسیم ، ھەر نھێنیەکشی ھەبوایە بۆی دەدرکاندم .
ھەرگیز حەزی نەدەکرد کەس ھەوالی مێروولەکانی بپرسێ !.بەو ھەوالپرسینە وەڕس دەبوو!
خەلکێک ھەبوون گالتەیان بە سوورە دەکرد کەچی من پەیوەندیم لەگەلی نەپساند ھەردەم دەمویست لە نھێنی بەخێو کردنی مێروولەکانی بگەم .

دەمەوئێوارەیەک لەگەل سوورە لەسەرتەپۆلکی گردێکی دوور شاردانیشتبووین . ئەو ئێوارەیە سوورە روخسارێکی خەماوی لێنشتبوو .
منیش وتم : سوورە گیان ئێمە دوو ھاوڕێی مندالین و پێویست ناکات ھیچ شتێک لەیەکتر بشارینەوە.. ‌ چەند ڕۆژێکە لە چاوەکانت دیارە شتێک ڕوویداوە و ناتەوێ پێم بلێیت؟
وتی : تا ئێستا ھیچ شتێکمان لەیەکتر نەشاردۆتەوە ، بەلام نھێنیەک ھەیە تا ئێستا نەم درکاندووە!
وتم : نھێنی چی؟
وتی : نھێنیەکە ئەگەر بیدرکێنم سەرتاپای ژیانم و ژیانت دەگۆڕێ !
وتم : دەیگۆڕێ بەرەو باشتر؟
وتی : نەخێر زۆر خەراپتر!
وتم : دە بیدرێکێنە ، گۆم چەند قول بێت مەلاوانی خۆشترە!
وتی : ئەم گۆمە بنی پڕلە گووە ، کەس ناتوانێ مەلەوانی تیا بکات!

ئاوڕێکم لێدایەوە بینیم فرمێسک لە چاوەکانی دێتە خوارێ !
دەستم خستە ملی و وتم : بمبوورە وامزانی گالتە دەکەیت !
بە قورگی پڕ لە گریان باوەشی پێما کرد و وتی : ھاوڕێ گیان خەراپم لێقەوماوە!
توند لەباوەشم گرت و ساتێک بێدەنگ بووین ..

ئنجا وتم : ئەی ئەوە نیە منت لەگەلدایە!
سورە چاوی لە دوکەڵە ڕەشەکەی ئاسمانی شارەکە کرد و وتی : لێرە خۆر چەند زوو ئاوا دەبێت !
وتم : دوکەل و تەپو تۆزی شارەکەیە بەری خۆر دەگرێت !

بە دەنگێکی نزمەوە وتی : ھاوڕێ گیان چیت لێبشارمەوە ..تۆ دەزانی من لە وەتەی خۆم ناسیوە حەز بە کوشتن دەکەم !
وتم : کوشتنی چی ؟
وتی : کوشتنی مرۆڤ !
وتم : قسەی قۆڕ..تۆ مێروولەیەکت پێ ناکوژرێ!
وتی : بەڕاستمە ..حەز بە کوشتنی مێروولە و ھەموو گیانلەبەرێک دەکەم .
وتم : لە کەیەوە ئەم حەزەت لەگەلدایە ؟
وتی : لە مندالییەوە !
وتم : جا لە مندالییەوە ئێمەش ھەر کوشتن و کوشتار دەبینین !

سوورە تاوێک بێدەنگ بوو..ئنجا وتی : ھاوڕێ گیان ..وادیارە تۆ لێم تێناگەیت ..من بەڕاستمە..ھەست دەکەم ‌ کرمێک ..دەنگێگ لە ناو مێشکمدایە و پێمدەلێ بکوژە !
وتم : ئەمە نھێنیەکە بوو ؟
وتی : بەلێ !
وتم : جا ئەو کرمە بۆ ناکوژی!
وتی : لە مندالییەوە تا ئێستا بەرگریم لەخۆم کردووە ، دەترسم ڕۆژێک بە قسەی کرمەکە بکەم!
وتم : سوورە ..تۆ کەسێکی زۆر مھرەبانیت باوەڕ ناکەم بە قسەی ئەو کرمە ھەلخەلەتێی !
وتی : تۆ لە من تێناگەیت .. برا کەسێک ھەیە لەناخمە دەژێت و پێمدەلێ بکوژە دایکت ، باوکت ھاوڕێکانت ..ناتوانم چیتر بەم شێوەیە بژێم .
وتم : ئای کە خۆم بەدەبەنگ دەزانم چۆن تا ئێستا ھەستم بەم شتە نەکردووە!
وتی : کەس نازانێت .. زۆرجار بیر لە خۆکوشتن دەکەمەوە !
سەرم سووڕما بوو ، وتم : سوورە تۆ بەڕاستە یان پێمڕادەبوێری؟
وتی : چیتر ناتوانم ئەم نھێنییە لەگەل خۆم ھەلگرم ..تۆ دەزانی بۆ مێروولە بەخێو دەکەم ؟
وتم : نەخێر.
وتی : بۆ ئەوەی سەریان لە بنڕا ھەلکەنم !

ئاوڕێکم لێدایەوە و وتم : تۆ زۆر زالمی !
وتی : لە مندالییەوە بەری چاوم کە سوور دەبوو ئەگەر گیانلەبەرێکم بکوشتایە سوورییەکەی چاوم کالتر دەبوەوە . لەو ڕۆژەوە دەیان پشیلە و سەگ و مارو دوپشک و چۆلەگە و بالدارنەما نەی کوژم تا دواجارخووم بەم مێروولانەوە گرت .
وتم : ئێستا دەزانم بۆ ( بەھار) ت لە خۆت دوورخستەوە !
وتی : خۆشەویستی ( بەھار ) وایلێکردم خۆڕاگرتربم !
وتم : خۆشەویستی چی ! تۆ مێروولە نەما نەیکوژی !
وتی : بۆیە چیترنامەوێ بژێم !
وتم : گوێبگرە سوورە . ئەم نەخۆشییەت زۆرترسناکە ..بەس تۆ دەتوانی چاکە وخەراپە لەیەکتر جوودا کەیتەوە ئیتر ئەم بەد خووە چییە گرتووتە!
وتی : من لەوە دەترسم ڕۆژێک بە قسەی ئەو کرمە بکەم و ژیانی کەسێک لەناوبەرم .
وتم : ئیستا چیبەکەین ؟
وتی : نازانم !
وتم : سوورە ، منیش سەرم لێشواوە ..ھەرگیز باوەڕ ناکەم تۆ وا بیرکەیتەوە !

پاشان سوورە وتی : نەگەڕیینەوە بۆناو شار ؟
وتم : بۆ نا ..سوورە دەترسم ڕۆژێک بێت بمکوژی !
وتی : ئەمە یەکەمین جار نییە ..کرمەکە پێمدەلێ بیکوژە !
وتم : ئەو کرمە لە کوێیە با من بیکوژم !
وتی : لە سەرتاپای لەشمە !
وتم : دەزانی چی سوورە چەند ڕۆژێکیتر مۆلەتم بەرێ چارەسەرێک دەدۆزمەوە بۆ ئەو کرمە !
وتی : بەسەرچاو ..

پێکەوە بە پیاسە لەسەر ڕێگا پڕ لە زبل و پیسیەکەی قەراخ شار گەڕایەنەوە بەرەو مال . خۆزگەم دەخواست نە ئەم نھێنیەم بزانیایە و نە سوورەم بناسیایە .
چی دەبوو ئەگەر سوورە نەبوایە ؟ لە مندالییەوە بمردایە ! کێ نالێ ڕۆژێک وەک مێروولەکان سەرم لە لەشم جوودا ناکاتەوە ؟
نا پێش ئەوەی بمکوژێ من دەیکوژم ..دەبێ تا چەند ڕۆژیکتر چاوەڕوانبم ئەگەر چارەسەرێکم نە دۆزی ..چارەسەری دەکەم !
سوورە دەستی خستە سەرشانم ( لە ترسا ڕاچلەکیم ) وتی : ھاوڕی گیان بیر لەچی دەکەیتەوە ؟
ویستم بلێم بیر لە چارەسەرێک دەکەمەوە .. سوورە چاوی لە چاوم بڕی و بزەی پێکەنیین گرتی منیش ویستم پێبکەنم و بلێم : دەمزانی گالتەت دەکرد !
کەچی بەری چاوی سوورە سوور ھەلگەڕابوون !.
سوورە کیسەیەکی پڕ لە مێروولەی لە گیرفانی دەرکرد و یەک یەک سەری مێروولەکانی قرتاند!

منیش وتم : سوورە لە پێش چاوم ئەم کارە مەکە !
سوورە وتی : ھا ئەوە چنگێ مێروولە تۆش سەریان ھەلقرتێنە !
وتم : من بۆ دەبێ وابکەم ؟
وتی : بەرچاوت سوور بووە ..تا کەسێکت نەکوشتووە ..سەری مێروولەکان دەربێنە .
وتم : نەخێر ..من نە بەری چاوم سووربووە و نەکەسش دەکوژم !
سوورە وتی : من دەبینم بەری چاوت سوور بووە ..ھەر ئێستاش بیرت لە کوشتن دەکردەوە .
وتم : کوشتنی چی ؟!
وتی : بگرە ئەم چنگە مێروولەیە و شەرم مەکە !

چنگە مێروولەکەم لە دەستی سوورە وەرگرت ..بە بێدەنگی سەری مێروولەکانم قرتاند . وردە وردە سووری بەر چاوم کالتر بوەوە .. روخسارشم زشتر وترسناکتر دەبوو!

ماڵپه‌ڕی جه‌لال قادر