١٨\٩\٢٠١٧

جێگرەوەیێک کە مافی گشتپرسیی و سەربەخۆیی خەلکی کوردستان ناسەلمێنێ رەتدەکەینەوە.

جارێکی تر ئەمەریکا و بەریتانیا هەولیان داوە لەڕێگەی چەند نوێنەرێکیانەوە کە گشتپرسیی ٢٥ سێپتەمبەر نەکرێ و باس لە جێگرەوەیێکی نهێنی دەکەن کە لەگەل بارزانی خستویانەتەڕوو. مەکگورگ، نوێنەرەکەی ئەمەریکا بە ئاشکرا ڕایگەیاند کە ئەوان نایانەوێ گشتپرسیی بکرێ و ئەم هەولانەشیان بۆ ڕێگرتن لە خەلکی کوردستانە بۆ بەرپاکردنی گشتپرسیی و جێگرەوەکەیان گەڕانەوەیە بۆ گفتوگۆ لەگەل حکومەتی عێراق و چاکسازی فیدرالیزمی قەومی ومەزهەبی شکست خواردووی عێراق.

سەرەتا پێویستە بزانین کە هەلوێستی ئەمەریکا و بەریتانیا کە مافی خەلکی کوردستان لە گشتپرسیی و سەربەخۆییدا ناسەلمێنن نیشانی دەدا کە ئەم جێگرەوە و بەلێنانەشیان بۆ سەرپەرشتی گفتوگۆی نێوان هەولێر و بەغداد بۆ چارەسەری کێشەی کورد و پارێزگاری لە بەرژەوەندی خەلکی کوردستان نیە و بە پێچەوانەوە ئەوان درێژەی هەمان سیاسەتی پێشوی ٢٦ سالی ڕابردویان لە عێراقدا دەدەن کە کوردستان وەک کارتی گوشار بەکاردێنن.

ئێمە وەک خەلکی کوردستان گشتپرسیی و سەربەخۆیی بەمافی ڕەوا و بێ مەرجی خۆمان دەزانین و هەر لایەنێک و هەر جێگرەوەیێک کە بیەوێ دەست لەم مافە هەلگرین ڕەتدەکەینەوە و بە دژایەتی خواست و بەرژەوەندیەکانی خەلکی کوردستانی دەبینینەوە.

ناوەندی سەربەخۆیی کوردستان دەسەلاتدارانی کوردستان ئاگادار دەکاتەوە لەم هەولەی ئەمەریکا بۆ ڕێگاگرتن لە گشتپرسیی و سەربەخۆیی و بانگەوازی خەلکی کوردستان دەکا بۆ گوشاردانان لەسەر دەسەلاتدارانی هەرێم کە لەپێناو بەلێنی کاتی بەشە فیدرالی بودجە و داهاتی نەوت و دەسەلاتیان خواستی گشتپرسیی و سەربەخۆیی خەلکی کوردستان نەکەنە قوربانی.

نابێ گفتوگۆ لەگەل حکومەتی عێراق وەک جێگرەوەی گشتپرسیی وسەربەخۆیی بەهیچ شیوەیەک قبول بکرێ، لەبەرئەوەی گشتپرسیی مافی خەلکی کوردستانە بۆ بریاردان لەسەر جیابونەوە لەعێراق و ئەم مافە لەلایەن دەولەتی عێراقەوە دژایەتی دەکرێ و پەرلەمانی عێراق و حکومەتی عەبادی بەبڕیاری ڕەسمی ڕایانگەیاندوە. کردنی گفتوگۆ لەگەل حکومەتی عێراق بە جێگرەوەی گشتپرسیی تەنیا مانای دەست هەلگرتن لەمافی گشتپرسیی و سەربەخۆییە و فرسەتدانە بە دەولەتی عێراق تاکو بەشیوەی حکومەتەکانی پێشوی پاشایەتی و عەسکەری و بەعس و مالکی و عەبادی هەمان کارەساتی کوشتار و ژێردەستەیی بەسەر خەلکی کوردستندا دەسەپێننەوە و ڕێکەوتن و ئەنجامی گفتوگۆکان پێشێل دەکەن.

خەلکی کوردستان کە سەدەیەکە گیرۆدەی کێشەی ستەمی قەومی و بێ دەوڵەتی و گیرۆدەی فیدرالیزمێکی شکست خواردوە لە عێراقدا، ئەگەر لەم فرسەتەی ئێستادا دەست هەڵگرێت لەم خواستەی خۆی بۆسەربەخۆیی و رفراندۆم ئەوە بێگومان لە دژی بەرژەوەندیەکانی خۆیەتی. هەربۆیە سەرەڕای سەختی ئاستەنگیە نێو دەوڵەتی و ناوچەییەکان دەبێ ڕێگاچارەیەکی سیاسی و پشتیوانیەکی نێونەتەوەیی بۆ داوا ڕەواکەمان پەیدا بکەین و لەسەروو ئەوانەشەوە باوەڕبون بە هیزی خۆمان، هێزی جەماوەری کوردستان پەیدابکەین.

پێویستە کۆمەڵگەی نێودەوڵەتی ئەم پێداگریەی خەڵکی کوردستان لەخواستی گشتپرسیی و سەربەخۆیی و ئەم چاوەڕوانیەی لەخۆی ببینێ تاکو بزانێ کە ئەم خەڵکە ناتوانن چیتر بەدیار خۆشباوەڕی و فریودان و کردنیان بەکارتی گوشارەوە دابنیشن . بەڵکو پێویستە دەزگا نێودەوڵەتیەکان بزانن کە خەڵکی کوردستان وەک خەڵکی فەلەستین ، تەیموری ڕۆژهەڵات ، باشوری سودان ، کۆسۆڤۆ ، بیابانی ڕۆژئاوا و چەندین شوێنی تر دەیانەوێ ماف و مەسەلەکەیان لە ئاستی نێودەوڵەتیدا بەڕەسمی بناسرێ و مامەڵەی لەگەڵ بکرێ و کۆنگرەی نێودەوڵەتی لەلایەن نەتەوە یەکگرتوەکان لە سەر کێشەکەیان بکرێ و کاری جدی بکا بۆ چارەسەرکردنی ئەم کێشەیە و گوشارنهێنرێ بۆ ئەمەریکاش کە ئەم مافە بسەلمێنێ.

ناوەندی سەربەخۆیی کوردستان ڕایدەگەیەنێ کە لە ئێستادا ڕێگای عەمەلی و خێرا بۆ بەدەستیهێنانی پشتیوانی نێودەوڵەتی و سەلماندنی مافی خەڵکی کوردستان لە رفراندۆم و سەربەخۆییدا بەرپاکردنی گشتپرسیی و کردنە ئەمری واقیعی سەربەخۆییە نەک چاوەڕوانی گۆڕانی سیاسەت و بەرژەوەندی ئەمەریکا و ئەوروپا و ڕوسیا و وڵاتانی ناوچەکە .دەبێ وەک خەڵکی کوردستان خۆمان رفراندۆم بکەین تا وەک ئەمری واقیع دانمان پێدابنرێ و لێرەوە گوشاربهێنین کە مافی ڕاگەیاندنی دەوڵەتی سەربەخۆمان بۆ بەڕەسمی بناسرێ لەلای نەتەوە یەکگرتوەکان و کۆمەڵگەی نێودەوڵەتی.

ناوەندی سەربەخۆیی کوردستان
١٥\٩‏\٢٠١٧