٣\٣\٢٠١١

جەماوەرى ناڕازى لە نێوان بەرداشى دز و قازى.

هیوا رەش    

کاتێک ناوى پارتى و یەکێتى دێنە پێش ، ڕێک ئەم قسەیەم بیر دێتەوە : (( کابرایەک لە دوکانێکدا مامەڵەى شت دەکات و لە ئاکامدا لەگەڵ دوکاندارەکەدا ڕێک ناکەوێ و کەللەیى دەبێت و شەقێک لە تەنەکەیەکى بەردەم دوکانەکە دەدا کە ئاگرى تێدا کراوەتەوە ، گڕى تێ بەر دەدا و دوکاندارەکە دەسووتێنێ ، ئینجا کابرا دەیەوێ ڕا بکا ، بەڵام دراوسێ دوکانى سووتاوەکە پڕ بە کابراکەدا دەکات و دەیگرێ ، کابرا دەست بۆ خەنجەرى بەر پشتێنى ئەویش دەبات و دەیکات بە لاسکیدا و دەیکوژێت ، لە دواییدا بە خەنجەرى خوێناوییەوە هەڵدێ و لە ڕێگادا دوو پۆلیس باڵانگژى دەبنەوە ، بە ڕاست و چەپدا خەنجەر ڕادەوەشێنێت و ئەوانیش بە لادا دەخا ، هەرچى چۆنێک بێت دەیگرن و پاشان دەدرێتە دادگا ، لە ڕۆژى دادگایى کردنەکەیدا هەموو ئەو تاوانانەى دەخەنە بەردەم کە ئەنجامى داوە ، لە وەڵامدا دەڵێ : جەنابى حاکم بەخوا گوناهم نیە و بێتاوانم ، من چى بکەم ئەو خەڵکە خۆیان توڕەهاتن و ناتوانن لەگەڵ مندا بژین، دادوەریش پێى دەڵێت : ڕاست دەکەى کوڕم ، تۆ لەسەر هەقى و بێتاوانى و ئەو خەڵکە ناهەق و توڕەهاتن ، ئەستەمە تۆ بتوانى لەگەڵیاندا بگوزەرێنى ، بۆیە بڕیارماندا ژوورێکى تاکەکەسیت بۆ تەرخان بکەین و بۆ هەتاهەتایە لەو خەڵکە دوورت بخەینەوە )) ، سەربارى ئەو هەموو دزى و تاڵانى و گەندەڵى و ناڕوونى و بەرتەسک کردنەوەى دیموکراتییەت و بەکەڵەگا کردنى حیزبەى لە لایەن پارتى و یەکێتیەوە پیادە کراوە و دەکرێ ، کەچى هێشتا بێشەرمانە خەڵکى خۆپیشاندەر بە ئاژاوەچى و گێرەشێوێن لە قەڵەم دەدەن ، ئەمەیە کە دەڵێن : ( هەتا خاوەن ماڵ دزى گرت ، دز خاوەن ماڵى گرت ) ، بێگومان ڕۆژێک مێژوو دەبێتە دادوەر و لە تۆڵەى دابڕان و ستەمەکانیان لە خەڵک ، فەرمانى زیندانیى هەتا هەتاییان لە زبڵدانى مێژوودا بەسەردا دەدا .

قسەیەکى کوردەوارى هەیە دەڵێ : ( یەکجار زستان سەختە و بڕایەوە ) ، سەبارەت بە دەسەڵاتى کوردیش یەکجار ستەمکارە و بیبڕینەوە باشترە لەوەى بیڵێینەوە و دەبێ عەوداڵى ڕێگا چارەى ئازادى بین ، ئەویش سانا نیە و دەبێ وەکو شێرپەنجە سستمەکە لە ڕەگەوە دەربهێنین و نەهێڵین بە دروشم و بەڵێنى سڕکەر ساردمان بکەنەوە و دووبارە ڕەفتارە ناشرینەکانیان سەر هەڵداتەوە و مەرگەساتەکانمان بەسەردا دووبارە بکەنەوە .

با بێینە سەر ئۆپۆزیسیۆن کە ئەمڕۆکە خۆیان کردووە بە قازى و بە پێى بالۆرەى حیزبایەتى خۆیان دەڵێى : هەورى بەهارانن یان دەڕەوێنەوە یان پڕ بارانن ، ئەمانیش میزاجى بەرژەوەندى حیزبیى چۆنیان لێ بخوازێت ئاوها ڕەفتار دەکەن ، ئەگەر لە حوجرە داخراوەکانى کۆبوونەوەکانیان لەگەڵ دەسەڵاتدا بە دەمیانەوە پێ بکەنن ، ئەوا ئەوسا پێکەنینیان بە خواستى ڕەواى جەماوەر دێت و زوڕناى ( نەیار ) ەکانیان بە گوێى جەماوەرى بێمافدا دەدەن و بە ئاژاوەچى و گێرەشێوێن بە قاڵبى دەسەڵاتدارێتى تاڵانچى مەحکومیان دەکەن ، ئەگەریش بیانبوغزێنن و قاچى کورسییان لەق بکەن و دەمى قاسەیان لێ کلۆم بدەن ، سوارى شەپۆڵى ناڕەزایەتى جەماوەر دەبن و بەرەو نغرۆ کردنى خواستە ڕەواکانیان سەرشێتانە و بێگوێدانە ئاییندە و چارەنووسى ئامانجەکانى خەڵک ملى ڕێگەى هات و نەهات دەگرن و لە ڕاگەیاندنەکانیانەوە لە برى جەماوەر داد و فیغان دەکەن .

لە نێو بەرداشى دز و قازیدا دەبێ جەماوەر بە وریاییەوە ڕەفتار بکەن :

1- جگە لە نوێنەرانى خۆیان ئیعاز لە هیچ لایەنێک وەرنەگرن و بڕواش بە بەڵێنى هیچ لایەنێک نەکەن و بێ لە نوێنەرەکانى خۆیان متمانەش بە هیچ لایەنێک نەبەخشن .
2- دەبێ هەڵسوکەوت و گوتارى نوێنەرانیان دەربڕى ناخى جەماوەر بێت .
3- ڕێککەوتن و موجامەلەى نێوان حیزبەکان ڕەت بکەنەوە کە دەیانەوێ جەماوەر بکەنە بەردەباز بۆ گەییشتن بە بەرژەوەندییە حیزبییەکانیان .
4- هەوڵ بدرێ مۆرکێکى سەرتاسەرى و بە دوور لە ناوچەگەریى بئاڵێندرێتە خۆپیشاندانەکانەوە و هەماهەنگیى تەواو لە نێوان گشت کوردستانییاندا بنیات بنرێ .
5- ڕێگە نەدرێ سەراى ئازادى بکرێ بە مینبەرى پڕوپاگەندەى حیزبى .
6- سیاسەتى - خورمیش - ى ئۆپۆزیسیۆن تەنگەبەر بکرێ و داواى هەڵوێستى ڕوونیان لێ بکرێ ، چونکە کۆى دەنگەکانیان لە هەڵبژاردن بە گوێرەى کورسییەکانى ئۆپۆزیسیۆن - گۆڕان ، کۆمەڵ و یەکگرتوو - خۆى لە ( 000 750 - حەوتسەد و پەنجا هەزار ) دەدا ، ئەمەش هێزێک نیە دەسەڵاتداران بتوانن چاوى هەڕەشەیان لێ سوور بکەنەوە ، ئەگەر مەبەستیان بێ نەک دەسەڵاتداران ناچارى بەخۆداچوونەوە دەکەن بەڵکو عەرشى جەبەروتیان دەهێننە لەرزە ، بەڵام وەکو دەردەکەوێت نایانەوێ جەماوەرى خۆیان - استهلاک - بکەن ، بەڵکو دەیانەوێ لە ڕێگەى کەناڵ و میدیاکانى ڕاگەیاندنەکانیان و هەندێک ڕمۆزنى خۆیانەوە خاوەندارێتى خۆپیشاندانەکان و بازرگانى بە خوێنى ڕۆڵەکانمانەوە بکەن .
7- دەبێ لە بەرنامەى چاکسازى و بەخۆداچوونەوەى دەسەڵاتدا نوێنەرانى خۆپیشاندەران تەرەف بن و ڕاستەوخۆ چاودێریى نیەتپاکیى دەسەڵات بکەن ، لەبەر ئەوەى دەسەڵات و ئۆپۆزیسیۆن جێگەى متمانە نین تا بتوانن لە نێوان خۆیاندا دڵسۆزانە کار بۆ ئەم مەبەستە بکرێ ، چونکە ئەوان مارن و ئێمەش مارانگاز ، دروشم و هەڵوێست و بەڵێنەکانى ڕابردوویان گەواهیى ڕووى ڕاستەقینەیانە .
8- پێویستە پێشهات و پێشخستنى ڕووداوەکان ڕۆژانە بۆ جەماوەر ڕوون بکرێتەوە .
9- دروشم و داواى جەماوەر ڕێک بخرێ و دیار و ئاشکرا بن و خۆ بەدوور بگیرێ لە شتى ناشرین کە ببێتە مایەى گاڵتەجاڕى بە کەس و حیزبێکى دیاریکراو .
10- گفتوگۆ و دانوستان ڕاستەوخۆ لەگەڵ سێ سەرۆکایەتییەکە ( هەرێم ، پەرلەمان و حکومەت ) بکرێ و لەگەڵ ئەم و ئەو حیزب و لایەن ڕەت بکرێتەوە و لە دەرگیان نەدرێ .

بۆ ئەوەى بەرداشى دز و قازى نەمانهاڕێت ، دەبێ خۆمان خاوەنى خۆمان بین و لە خۆمان بەولاوە کەس بە ڕیشسپى نەگرین.

ئەمڕۆ بێ یا سبەى سەرکەوتن هەر بۆ گەلە.

ماڵپه‌ڕی هیوا ره‌ش