چه‌ند جارم ووت   

 ئه‌مانه‌ جێی متمانه‌ نین  

قۆڵی غه‌زه‌ل مه‌ئاڵێنن له‌که‌مه‌ریان

نه‌سلی دڕکن

لاشه‌یه‌کی مینڕێژکراون به‌سوژن

هاوڕێی گوڵ و ڕه‌یحانه‌ نین.

چه‌نجارم ووت

ئه‌مانه‌ دارێکی زڕن

نه‌بۆن و به‌رامی گوڵێ

نه‌تامی هه‌رمێ و پرته‌قاڵ

چاوه‌ڕێی چین له‌سێبه‌ری

ڕووته‌ڵه‌ داری تلیاک و

وه‌هم و خه‌یاڵ.

چه‌نجارم ووت

په‌رژینی ماڵ

له‌پوشی به‌ڵێن و خه‌یاڵ

دروست مه‌که‌ن

زۆر بێ ئامانه‌ ئه‌م ده‌هره‌

ئه‌وان که‌دێن .. دیاری ده‌ستیان

مه‌نجه‌نیقێک ، گڕی کینه‌و

بیابانێک ، ته‌فره‌دان و

پوشه‌خورمایه‌کی غه‌دره‌

چه‌نجارم ووت

به‌گریانم بۆ په‌رژینێ

مه‌که‌ن که‌یفێ

ئه‌و ده‌مانه‌ ئێوه‌ که‌ڕ بوون

له‌سه‌ر ڕه‌نگ کردنی پردێ

سه‌رقاڵی کابوسی شه‌ڕ بوون

گوێتان نه‌گرت

وه‌لێ حه‌یفێ.

 3- 8- 2008