١٣\١١\٢٠١١
    چەند ‌کورتە شیعرێکی ئەمازیغیی.

سەعید بلغربی                           وه‌رگێڕانی: یوسف عیزەدین

"دەلاقەیەک بۆ سەر خەمەکانم".

شار وێنەی من نییە!!؟
شەقامەکانم دەریای بێزارین،
شۆستەکانم کەنار خەونی
پەرش و بڵاون،
ئەم دەنگەدەنگەش...؟!
شار و من و زام
یەکین!؟
"خاکی خۆر".

لەنێوان من و بۆشاییدا
بۆشاییەک ھەیە،
لەخاچم دەدا ،
بە لک و چڵی بیرۆکەکانمدا..
وەک برووسکە ون دەبم
تا لە مەرگێک رێبگرم
کە لە خاکی خۆردا چاوەڕێمە
تا لەوێدا بۆ نێو گۆڕێک بچم.

"وەسیەت".

ئەگەر زانیبات دنیا
مشتێ ئازار و
زەلکاوێکی پڕ ھەڵەیە
ئەی کۆرپەلە
کورترین ھەنگاوت
نەدەنایە ناو..
بێ دوو دڵی و ختوورە
بگەڕێوەو ببەرەوە
بە دڵۆپە سپێرمێکی ئیفلیج..
پاکێتی خۆت بۆ ئازار
مەکە ‌بە قوربانیی؟!

"دەستەسڕێکی تەڕ".

خەم وەک رووبار
دەستەسڕەکەی
تەڕ دەکا
تا دوا ھەودای..
پرسیم:
وەک فرمێسک خەمت سوێرە؟!
بە زمانێک،
کە لە ئامێزی نابوو بێدەنگیی
وتی: تاڵە.. تاڵە.. تاڵ
لە خامۆشیدا جێم ھێشت و
کەوتمە ڕێ...

___________________

ژێدەر: sa.d/archive/2006

www.isuria.jaran.com

ماڵپه‌ڕی یوسف عیزه‌دین