|
|
|
٩\١\٢٠٢٢ چەند رەهەندی رەها!
دارا خونچە لە دوا دیدەنییم لە باخچەی ماڵ یەکسانیی وەل ئازادیی واژۆمانکرد؛ ١ ئیدی هەمیشە بێ ترس.. بە بێ پرس تا دوا لووتکەی سۆز و ئەوین تا ئەوپەڕی بەرزاییەکانی دەربڕین لە باوەشی یەکدی بنووین؛ خامەخوارانی بەردەرکی مەیخانان و باخچەی پشتەوەی تەلاری ماڵ خودانێ ٢ بە کۆشێ پەیڤی جوان جوان و شیرینەوە کردیانە یەک گەڕەلاوژێ و داڕسانێ: ٣ - هەرگیز ناکرێ دەنگ هەڵببڕی تەنانەت ناشێ وە دڕکیش بێژی تیژی! چون ئازادیی خۆی رەهایە و لە گوڵێ کاڵتر لە لێوانی داناچۆڕێ! * * * لەسەر خوانی ئازادییدا لە باوەشی ئەڤینداریی و ئاسوودەیی ئارام ئارام جوانییەکانمان گوڵوەچنێ کرد؛ گۆتیان: ''ئەی ئەی.. وەی لەوانە ئەی لەو بێ دینە قوزکەش و موونەرمانە وەی لەو عفریتە قوزفش و بێ ئاوڕووانە کوو رەوشت و دین و داب و دادستانیان لێ خراو کردین! ٤ (خوا!)یە گومڕا و سەرگەردان و نغرۆیانکەی''! * * * وەل ئازادیی لە جوانیی گوڵ و گوڵزار و دار و درەختی باخچەی ماڵی پاشا دەدواین؛ توندئاژۆیە وە ناو ئازادییخوازەکان هەڵیاندایێ: - نا نا هەرگیز.. هەرگیز نەکەی باخچەی پاشا وە خوێنی مە ئاودێر کرایە دەبی بە تیزاب بیسوتێنین دەگەڵ زەوی تەختی بکەین تاکو هەرگیز نەژیێتەوە! * * * هێییی ئازادیی.. داخۆ کەنگێ نەمانگەرەکە راوت کەین.. ٥، ٦ لە چارچیوەی رامیاربازیی سندمت کەین؟! ٧ ___________________________________________ ١- وەل: لەگەڵ، لەتەک. ٢- خودان: خاوەن، بەخێوکەر. ٣- داڕسان: هێڕشکردنەسەر وە قسە یان وە لێدان.. ٤- خراو: خراپ. ٥- داخۆ: ئاخۆ. ٦- کەنگێ: کەینێ، کەی. ٧- سندم: کۆت، پێوەند، بەستنەوە وە زنجیر یان وە پەت.
سەرەتای ٢٠٢٢ - هەولێر
|
|
|
