|
٢٢\٩\٢٠١٦
چەپ و کۆمۆنیست
ئەوەندەی راستڕەوکان
زیانیان بە
بزووتنەوەی سۆشیالیستی گەیاندوە.
زاھیر باھیر
-
بەشی پێنجەم -
• تەکنەلۆجیا و سروشت و
ژینگە و ئیکۆلۆجی:
لایەنێکی دیکەی خراپیی لە پێشکەوتنی تەکنەلۆجیا بە تێزی مارکس و
مارکسیییەکان کە بە مەرجێکی سەرەکی بۆ شۆڕشی سۆشیالیستی، دادەنێن ، لە
ڕاستیدا خاڵێکیشە لە دژایەتیکردنی ژینگە و ئاژەڵ و تەواوی
گیانلەبەرانی سەر ئەم گەردوونە . ھاوکاتیش ئەو بایاخ و بەھا گەورەیە کە
خودی مارکس بۆ مرۆڤی دڕندەی داناوە کە " بەنرخترین سەرمایەیە لە
دوونیادا"!!
ئەوەندەی من بزانم 'لینین' شتێکی وای لەسەر ژینگە و سروشت و
بوونەوەرەکانی دیکەی سروشت ، نەنوسیوە ، ئەوانەشی کە نوسیوێتی، ئەویش
وەکو مامۆستا‌کەی ، مارکس، لە ڕوانگەی پاوانەکردنییەوە بۆ دابینکردنی
خۆشگوزەرانی بۆ مرۆڤەکان ، یا ڕاستتر بۆ کرێکارەکان، قسە و باسی لەسەر
کراوە.
مارکس لەسەر پاراستنی ژینگە و سروشت شتی نوسیوە ، بەڵام ھزر و ئایدیای
بە کردەوە دژایەتی سروشت و بوونەوەرانی دیکەی جگە لە مرۆڤ، کردوە. ئەو
خواستویەتی کە مرۆڤ سروشت پاوانە بکا و سەری پێدانەوێنێ بۆ خواست و
خۆشی مرۆڤ ، کە ئەمەش لای مارکس تەنھا و تەنھا لە ڕێگای تەکنەلۆجیاوە
دەبێت، ئیدی لەم بارەدا لای ئەو گرنگ نەبووە کە تەکنەلۆجیا سروشت و
ژینگەکەی وێراندەکات و بونەوەرەکانی لەناودەبات یا لانی کەم
کەمیاندەکاتە وە و ڕەویان پێدەکات. ھاوسەنگی لە نێوان سروشت و مرۆڤدا ،
مرۆڤ و تەکنەلۆجیادا ، لای مارکس ونبووە . ئەو ھاوسەنگییەی کە چەندێک
سروشت خزمەت بە مرۆڤ دەکات و بەرەو پێشەوەی دەبات ، ئەوەندەش مرۆڤ
دەبێت خزمەت بەو بکات و وەکو سەرچاوەی سامانێکی بەھادار کە دەتوانرێت
تەواو یپێداویستیەکانی ژیان لە ھەموو بوارەکاندا بۆ مرۆڤ دەستەبەر بکات.
ئەوەی کە ئەمڕۆ بەسەر مرۆڤدا بە ھۆی کارەساتە سروشتییەکانی وەکو لافاو
و ھەریکان و زیادبوونی پلەی گەرما و ڕودانی کارەساتی دیکە، دێت،
دەرئەنجامی دژایەتیکردنی سروشتە لە ڕێگەی تەکنەلۆجیاوە بۆ کەڵەکەکردنی
زیاتری سەرمایە ، کە ئەمەش مرۆڤکردە ، واتە کاری مرۆڤە نەک شێتبوونی
سروشت.
تەکنەلۆجیاو چڕبونەوەی چینی پڕۆلیاتاریا و گەیشتن بە قۆناخی
سەرمایەداری ھیچ وەختێک و ھەرگیزیش تەنانەت مەرجی لاوەکیش نین بۆ
بیناکردنی کۆمەڵی سۆشیالیستی/ ئەنارکیستی . ئەوەی کە بنەما زەروور‌ییەکانی
بنیاتنانی ئەو کۆمەڵە، دەسەپێنێت، کۆ‌مەڵێکی پڕ لە کەمایەتییەکی
دەستەبژێر، لە ھیراشییەت، لە باڵادەستی و دەسەڵات و پاوانەکردنی کۆمەڵ
و خێر و خۆشییەکانی سروشت و ناو کۆمەڵ، لەگەڵ ھەبوونی زۆرینەیەکی
بندەست و فرمانپێکرا و ڕەنجدەر و چەوساوە و بەشخوراو لە کۆمەڵدا .
ئەمانەش لە ھەموو قۆناخەکانی کە لەسەرەوە باسمکردن ، جگە لە قۆناخی
کۆمەڵی سەرەتایی کۆمۆنوێڵی، بوونیان ھەبووە، ئیدی ئەوە گرنگ نییە لە
سەردەمێکدا کۆیلە، جوتیار یاخود کرێکار بووە . ڕاستە شێوەی
چەوساندنەوەکان ، کۆمەڵەکان گۆڕاون بەڵام جەوھەری چەوساسندنەوەکان ، کە
لە ڕێی ھەبوونی کۆمەڵە چینایەتییەکە و کۆمەڵی ھیراشییەوە ، بووە، ھەر
ماوەتەوە زیاتر وچڕتریش بووەتەوە.
___________________________________
بەشی سێیەم و چوارەم:
www.emrro.com/cepukomonist3u4.htm
بەشی یەکەم و دووەم:
www.emrro.com/cepukomonist1u2.htm
ئەیلوولی ٢٠١٦
- لەندەن
ماڵپەڕی زاهیر باهیر
|
